ປະຊາມະຕິມິນດາເນົາ ຟິລິບປິນ ມີສຽງສ່ວນໃຫຍ່ຮັບຮອງຕັ້ງເປັນເຂດປົກຄອງຕົນເອງບັງຊາໂມໂຣ

ສຳນັກຂ່າວຕ່າງປະເທດລາຍງານ 26 ມັງກອນ 2019 ວ່າ: ຄະນະກຳມະການການເລືອກຕັ້ງແຫ່ງຊາດຟິລິບປິນ ປະກາດຜົນຂອງການລົງປະຊາມະຕິກ່ຽວກັບຮ່າງກົດໝາຍ “ອົງປະກອບບັງຊາໂມໂຣ” (Bangsamoro Organic Law) ຫຼື BOL ເຊິ່ງຈັດຂຶ້ນເມື່ອວັນຈັນທີ່ຜ່ານມາ ໂດຍເປັນຄຳຖາມກ່ຽວກັບການກຳນົດອານາເຂດສ່ວນໜຶ່ງຂອງເກາະມິນດາເນົາໃຫ້ເປັນເຂດປົກຄອງຕົນເອງບັງຊາໂມໂຣ ມີຄະແນນສຽງສະໜັບສະໜູນ 1,540,017 ສຽງ ແລະ ຄັດຄ້ານ 198,750 ສຽງ.

Muslim women look for their names at a voting precinct in Maguindanao, on the southern island of Mindanao on January 21, 2019, the plebiscite to ratify the passage of the Bangsamoro Organic Law (BOL). (Photo by Noel CELIS / AFP)

ເຖິງຢ່າງໃດກໍ່ຕາມ, ເມືອງອີຊາເບລາ ແຂວງບາຊີລັນຈະບໍ່ຖືເປັນສ່ວນໜຶ່ງຂອງເຂດປົກຄອງຕົນເອງແຫ່ງໃໝ່ນີ້ ເນື່ອງຈາກສຽງສ່ວນໃຫຍ່ຄັດຄ້ານ ແຕ່ແຂວງໂຄຕາບາໂຕ ເຊິ່ງຕະຫຼອດໄລຍະທີ່ຜ່ານມາ ບໍ່ໄດ້ຮ່ວມເປັນສ່ວນໜຶ່ງຂອງເຂດປົກຄອງຕົນເອງມິນດາເນົາ ຈະເຂົ້າເປັນສ່ວນໜຶ່ງຂອງເຂດປົກຄອງຕົນເອງບັງຊາໂມໂຣ ເພາະສຽງສ່ວນໃຫຍ່ສະໜັບສະໜູນ.

Moro Islamic Liberation Front (MILF) chairman Murad Ebrahim (Photo by Noel CELIS / AFP)

ໃນດ້ານຂອງທ່ານ ມູຣາດ ອິບຣາຮິມ ປະທານຝ່າຍການເມືອງຂອງແນວຮ່ວມປົດປ່ອຍອິດສະລາມໂມໂຣ (MILF) ສະແດງຄວາມຍິນດີຕໍ່ຜົນການລົງປະຊາມະຕິ ທີ່ເຖິງແມ່ນວ່າຍັງບໍ່ຖືເປັນຜົນຢ່າງເປັນທາງການໄດ້ 100% ຈາກການທີ່ສະຖານະການຄວາມບໍ່ສະຫງົບ ແລະ ຍັງບໍ່ພ້ອມຂອງບາງເຂດເລືອກຕັ້ງ ເຮັດໃຫ້ຕ້ອງເລື່ອນການລົງປະຊາມະຕິສຳລັບເມືອງເຫຼົ່ານັ້ນອອກໄປເປັນວັນທີ 6 ກຸມພາ ແຕ່ທ່ານ ມູຣາດ ອິບຣາຮິມ ເຊື່ອວ່າຈະບໍ່ມີຜົນປ່ຽນແປງຕໍ່ຄະແນນໂດຍລວມ ແລະ ກອງກຳລັງຂອງແນວຮ່ວມປົດປ່ອຍອິດສະລາມໂມໂຣວາງອາວຸດແລ້ວ 1 ໃນ 3 ຈາກທັງໝົດທີ່ມີຢູ່ປະມານ 30,000 ຄົນ.

ເຊິ່ງທ່ານ ໂຣດຼິໂກ ດູເຕເຕ ປະທານປະເທດຟິລິບປິນ ທີ່ກຳເນີດໃນເກາະມິນດາເນົາ ກໍ່ໃຫ້ການສະໜັບສະໜູນແນວຄິດການສະຖາປະນາເຂດປົກຄອງຕົນເອງບັງຊາໂມໂຣຢູ່ແລ້ວ ເພື່ອຊ່ວຍຢຸດຕິການສູ້ຮົບທີ່ແກ່ຍາວກວ່າ 4 ທົດສະວັດ, ມີຜູ້ເສຍຊີວິດຫຼາຍກວ່າ 120,000 ຄົນ, ໂດຍທ່ານ ໂຣດຼິໂກ ດູເຕເຕ ຊຸກດັນໃຫ້ສະພາສູງລົງມະຕິຮັບຮອງຮ່າງກົດໝາຍສະບັບນີ້ໄດ້ສຳເລັດເມື່ອປີທີ່ຜ່ານມາ ພາຍຫຼັງທີ່ລັດຖະບານຫຼາຍຊຸດກ່ອນໜ້ານີ້ໃຊ້ເວລາເຈລະຈາກັບແນວຮ່ວມປົດປ່ອຍອິດສະລາມໂມໂຣດົນເຖິງ 10 ປີ ຈົນລົງນາມກັນໄດ້ເມື່ອປີ 2014, ຂະນະທີ່ແນວຮ່ວມປົດປ່ອຍອິດສະລາມໂມໂຣໄດ້ຮັບການຍອມຮັບຈາກປະຊາຊົນຫຼາຍຂຶ້ນ ເມື່ອເປັນໜຶ່ງໃນກຳລັງສຳຄັນຮ່ວມກັບກອງທັບຟິລິບປິນ ຕໍ່ສູ້ຂັບໄລ່ກຳລັງຕິດອາວຸດຫົວຮຸນແຮງ IS ໃຫ້ອອກຈາກເມືອງມາຣາວີ, ເກາະມິນດາເນົາ ເມື່ອກາງປີ 2017.

ສຳລັບຂະບວນການຂັ້ນທຳອິດໃນການກະຈາຍອຳນາດໃຫ້ແກ່ເຂດປົກຄອງຕົນເອງບັງຊາໂມໂຣ ຕາມກົດໝາຍໃໝ່, ລວມເຖິງການທີ່ລັດຖະບານກາງ ໃນນະຄອນຫຼວງມະນິລາຈະຈັດຕັ້ງກອງທຶນພັດທະນາບັງຊາໂມໂຣ ຈຳນວນ 950 ລ້ານໂດລາສະຫະລັດ ພາຍໃນໄລຍະເວລາ 10 ປີ, ໂດຍພາຍໃນ 5 ປີນີ້ສະຖານະຂອງເຂດປົກຄອງຕົນເອງບັງຊາໂມໂຣຈະໄດ້ຮັບການຍອມຮັບ ແລະ ລັດຖະບານກາງຈະຍັງເປັນຜູ້ຄຸ້ມຄອງດ້ານຄວາໝັ້ນຄົງໃນພື້ນທີ່ ຈົນກວ່າຄະນະຜູ້ບໍລິຫານເຂດປົກຄອງຕົນເອງແຫ່ງໃໝ່ຈະມີລະບົບບໍລິຫານຄຸ້ມຄອງເອງຢ່າງມີປະສິດທິພາບ.

- Advertisement -