ຈີນ-ລັດເຊຍ ບໍ່ຍອມຮັບຂໍ້ຮຽກຮ້ອງຂອງ ສ.ອາເມຣິກາ ຕໍ່ບັນຫາການເມືອງເວເນຊູເອລາ ໃນສະພາຄວາມໝັ້ນຄົງ UN

ສຳນັກຂ່າວຕ່າງປະເທດລາຍງານເມື່ອວັນທີ 26 ມັງກອນ 2019 ທີ່ຜ່ານມາວ່າ: ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໄດ້ຈັດກອງປະຊຸມວາລະສຸກເສີນກ່ຽວກັບບັນຫາການເມືອງພາຍໃນຂອງເວເນຊູເອລາ ເມື່ອວັນເສົາ ທີ່ຜ່ານມາ ໂດຍທ່ານ ໄພ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ໄດ້ກ່າວຮຽກຮ້ອງໃຫ້ປະຊາຄົມໂລກທັງໝົດ ລວມທັງສະມາຊິກ UNSC ຮ່ວມກັນຢຸດຕິຄວາມຫາຍະນະໃນເວເນຊູເອລາ ດ້ວຍການສະໜັບສະໜູນທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດເວເນຊູເອລາ ໃນຖານະຮັກສາການປະທານປະເທດ ພ້ອມທັງປະນາມທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ວ່າເປັນລັດຖະບານມາເຟຍທີ່ບໍ່ມີຄວາມຊອບທຳ ແລະ ບໍລິຫານປະເທດຈົນເສດຖະກິດລົ້ມລະລາຍ.

Mike Pompeo, Secretary of State of the United States of America. / PHOTO: UN

ຂະນະດຽວກັນ, ທ່ານ ໄມ ພອມແພວ ຍັງຮຽກຮ້ອງໃຫ້ບັນດາປະເທດຕ່າງໆຢຸດຕິໃຫ້ການຊ່ວຍເຫຼືອທາງດ້ານການເງິນແກ່ລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ, ເຖິງຢ່າງໃດກໍ່ຕາມ ທ່ານ ວາສຊິລີ ເນເບນເຊຍ ເອກອັກຄະລັດຖະທູດລັດເຊຍ ປະຈຳສະຫະປະຊາຊາດ ກ່າວວ່າສະຫະລັດ ອາເມຣິກາສະແດງຕົວຕົນຢ່າງເປີດເຜີຍວ່າ ສະໜັບສະໜູນການກໍ່ລັດຖະປະຫານ ໃນເວເນຊູເອລາ, ໃນດ້ານຂອງທ່ານ ໝ່າ ຈາວຊູ ເອກອັກຄະລັດຖະທູດຈີນປະຈຳສະຫະປະຊາຊາດ ກ່າວວ່າລັດຖະບານຈີນບໍ່ເຫັນດີນຳເປັນຢ່າງຍິ່ງ ຕໍ່ຂໍ້ກ່າວຫາທັງໝົດຂອງສະຫະລັດ ອາເມຣິກາທີ່ມີຕໍ່ເວເນຊູເອລາ ແລະ ຢ້ຳຈຸດຢືນຂອງຈີນໃນການບໍ່ແຊກແຊງວຽກງານພາຍໃນຂອງປະເທດອື່ນ.

Vassily Alekseevich Nebenzia,Permanent Representative of the Russian Federation to the United Nations. / PHOTO: UN

Ma Zhaoxu, Permanent Representative of China to the United Nations. / PHOTO: UN

ເຖິງແມ່ນວ່າສະຫະລັດ ອາເມຣິກາຈະສາມາດຊຸກດັນໃຫ້ UNSC ຈັດກອງປະຊຸມຄັ້ງຕໍ່ໄປກ່ຽວກັບສະຖານະການການເມືອງໃນເວເນຊູເອລາໄດ້ ດ້ວຍສຽງສະໜັບສະໜູນສ່ວນໃຫຍ່ 9 ສຽງໃນ 15 ສຽງເຊິ່ງເກີນເຄິ່ງ ແຕ່ກໍ່ບໍ່ສາມາດອອກຖະແຫຼງການສະແດງເຖິງການສະໜັບສະໜູນທ່ານ ຮວນ ກວຍໂດ ແລະ ຮັບຮອງສະພາແຫ່ງຊາດຂອງເວເນຊູເອລາໃນຖານະ ສະຖາບັນການເມືອງຕາມລະບອບປະຊາທິປະໄຕພຽງແຫ່ງດຽວຂອງປະເທດໄດ້ ເນື່ອງຈາກມີສຽງຄັດຄ້ານ 4 ສຽງໄດ້ແກ່: ອາຟຣິກາໃຕ້, ກິເນ ເອກວາຕໍຣິອານ ແລະ 2 ປະເທດສະມາຊິກຖາວອນຂອງ UNSC ຄືລັດເຊຍ ແລະ ຈີນ ທີ່ໃຊ້ອຳນາດຢຸດຢັ້ງໄວ້.

ນອກຈາກນີ້, ທ່ານ ນາງ ເຟເດຣິກາ ໂມເກຣິນີ ຫົວໜ້າຝ່າຍນະໂຍບາຍການຕ່າງປະເທດຂອງສະຫະພາບເອີຣົບ (EU) ກ່າວເມື່ອວັນເສົາວ່າ ຫາກເນເນຊູເອລາ ບໍ່ຈັດການເລືອກຄັ້ງໃໝ່ພາຍໃນ 8 ວັນ EU ຈະຍອມຮັບເອົາທ່ານ ຮວນ ກວຍໂດ ໃນຖານະຮັກສາການປະທານປະເທດ, ໂດຍແອັດສະປາຍ, ເຢຍລະມັນ ແລະ ຝຣັ່ງສະແດງທ່າທີສະໜັບສະໜູນຢ່າງເປີດເຜີຍ, ທ່ານ ທ່ານ ຮໍເກ ອາຣີເອຊາ ລັດຖະມົນຕີກະຊວງການຕ່າງປະເທດເວເນຊູເອລາ ກ່າວຕໍ່ UNSC ແລະ ຕັ້ງຄຳຖາມກັບ EU ວ່າ ມີອຳນາດອະທິປະໄຕເໜືອເວເນຊູເອລາຕັ້ງແຕ່ເມື່ອໃດ ແລະ ຂໍໃຫ້ປະເທດໃດກໍ່ຕາມທີ່ສະໜັບສະໜູນທ່ານ ຮວນ ກວຍໂດ ອະທິບາຍລັດຖະທຳມະນູນຂອງເວເນຊູເອລາວ່າ ມີມາດຕາໃດທີ່ລະບຸວ່າ ໃຜກໍ່ໄດ້ສາມາດຕັ້ງຕົນເອງຂຶ້ນມາເປັນປະທານປະເທດ ບໍ່ໂດຍຜ່ານການເລືອກຕັ້ງ.

Wide view of voting during the Security Council meeting on the situation in Venezuela. / PHOTO: UN

ດ້ານສະຖານະການໃນເວເນຊູເອລາ ມີທິດທາງເຄັ່ງຕຶງ ແລະ ສ່ຽງເກີດການນອງເລືອດຫຼາຍຂຶ້ນ ເມື່ອທັງທ່ານ ນິໂຄລັສ ມາດູໂຣ ແລະ ທ່ານ ຮວນ ກວຍໂດ ຕ່າງປະກາດຈັດຕັ້ງການໂຮມຊຸມນຸມປະທ້ວງປະຈັນໜ້າກັນໃນອາທິດນີ້, ຂະນະທີ່ການປະທະລະຫວ່າງເຈົ້າໜ້າທີ່ກັບປະຊາຊົນຝ່າຍສະໜັບສະໜູນທ່ານ ຮວນ ກວຍໂດ ຕັ້ງແຕ່ກາງອາທິດທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດແລ້ວເກືອບ 30 ຄົນ.

ຂ່າວກ່ຽວຂ້ອງ:

– ການເມືອງເວເນຊູເອລາເຂົ້າສູ່ພາວະວຸ້ນວ້າຍ ພາຍນອກແຊກແຊງ ແບ່ງຂົ້ວອຳນາດຊ້າຍ-ຂວາຢ່າງຊັດເຈນ

– ສ.ອາເມຣິກາ-ເວເນຊູເອລາ ສາຍພົວພັນການທູດແຕກຫັກ ຈາກການແຊກແຊງການເມືອງພາຍໃນ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube