ການາດາປົດທູດປະຈຳປະເທດຈີນ ທ່າມກາງຄວາມເຄັ່ງຕຶງເລື່ອງຜູ້ບໍລິຫານຫົວເຫວີ່ຍ

ສຳນັກຂ່າວຕ່າງປະເທດລາຍງານເມື່ອວັນທີ 26 ມັງກອນ 2019 ທີ່ຜ່ານມາວ່າ: ທຳນຽບລັດຖະບານການາດາ ອອກຖະແຫຼງການ ມີເນື້ອໃນພຽງວ່າທ່ານ ຈັສຕິນ ທຣູໂດ ນາຍົກລັດຖະມົນຕີການາດາ ໄດ້ຂໍໃຫ້ທ່ານ ຈອນ ແມັກຄໍລຳ ລາອອກຈາກຕຳແໜ່ງເອກອັກຄະລັດຖະທູດການາດາ ປະຈຳນະຄອນຫຼວງປັກກິ່ງ ແລະ ທ່ານ ຈອນ ແມັກຄໍລຳກໍ່ໄດ້ຍື່ນໜັງສືລາອອກຕໍ່ທ່ານ ຈັສຕິນ ທຣູໂດ ເປັນທີ່ຮຽບຮ້ອຍແລ້ວ, ໃນລະຫວ່າງນີ້ທ່ານ ຈິມ ນິກເຄິນ ຈະປະຕິບັດໜ້າທີ່ອຸປະທູດເພື່ອຮັກສາການໃນຕຳແໜ່ງເອກອັກຄະລັດຖະທູດໄປກ່ອນ, ໂດຍບໍ່ໄດ້ໃຫ້ລາຍລະອຽດອື່ນໃດອີກ.

ເຖິງຢ່າງໃດກໍ່ຕາມ, ການເຄື່ອນໄຫວດັງກ່າວເກີດຂຶ້ນທ່າມກາງທີ່ທ່ານນາຍົກການາດາຢືນຢັນກັບສື່ຕະຫຼອດອາທິດທີ່ຜ່ານມາວ່າ ບໍ່ມີແຜນປົດທ່ານ ຈອນ ແມັກຄໍລຳ ເຊິ່ງເປັນໜຶ່ງໃນນັກການທູດອາວຸໂສຂອງການາດາອອກຈາກຕຳແໜ່ງ, ແຕ່ການສັ່ງປົດກໍ່ໄດ້ເກີດຂຶ້ນພຽງບໍ່ພໍເທົ່າໃດວັນ ພາຍຫຼັງທີ່ທ່ານ ຈອນ ແມັກຄໍລຳ ໃຫ້ສຳພາດກັບສື່ຫຼາຍແຫ່ງທັງຂອງການາດາ ແລະ ຈີນ ກ່ຽວກັບຄະດີຂອງທ່ານ ນາງ ເມິ້ງ ຫວ່ານໂຈ ຜູ້ບໍລິຫານລະດັບສູງ ແລະ ເປັນລູກສາວຂອງຜູ້ສ້າງຕັ້ງບໍລິສັດ ຫົວເຫວີ່ຍ ເຊິ່ງຖືກຈັບກຸມຕົວຢູ່ເມືອງແວນຄູເວີ ຕັ້ງແຕ່ວັນທີ 1 ທັນວາ 2018 ຕາມໝາຍຈັບຂອງສະຫະລັດ ອາເມຣິກາ ໃນຄະດີລະເມີດການຂວໍ້າບາດອີຣານ ແລະ ມີກຳນົດຂຶ້ນສານໃນວັນທີ 6 ກຸມພາ ນີ້ ເພື່ອຕໍ່ສູ້ກັບຄຳຮ້ອງຂອງລັດຖະບານສະຫະລັດ ອາເມຣິກາວ່າ: ທ່ານ ນາງ ມີໂອກາດລອດ ເພາະທ່າທີຂອງລັດຖະບານສະຫະລັດ ອາເມຣິກາມີຄວາມສ່ຽງຈະເຮັດໃຫ້ສານຕີລາຄາວ່າ ການເນລະເທດຜູ້ບໍລິຫານຫົວເຫວີ່ຍເປັນຄະດີການເມືອງ.

Huawei Technologies Chief Financial Officer Meng Wanzhou (Photo by – / CTV / AFP) / – Canada OUT

ນອກຈາກນີ້, ທ່ານ ຈອນ ແມັກຄໍລຳ ອາຍຸ 68 ປີ ຍັງວິເຄາະທາງອອກເລື່ອງຂອງຫົວເຫວີ່ຍໄວ້ 3 ທາງຄື: ການາດາເນລະເທດໄປຍັງສະຫະລັດ ອາເມຣິກາ ຕາມຄຳຮ້ອງ ແຕ່ທຸກຝ່າຍຕ້ອງຍອມຮັບກັບສິ່ງທີ່ຈະເກີດຂຶ້ນຕາມມາ ເຊິ່ງອາດບໍ່ແມ່ນສິ່ງທີ່ດີ ແລະ ໃນກໍລະນີນີ້ ທ່ານ ນາງ ເມິ້ງ ຍັງມີໂອກາດອີກ 1 ປີ ໃນການອຸທອນ ເຊິ່ງອາດສົ່ງຜົນໃຫ້ເກີດທາງອອກທີ່ສອງຄື ການທີ່ສະຫະລັດ ອາເມຣິກາ ແລະ ຈີນບັນລຸຂໍ້ຕົກລົງຮ່ວມກັນເອງ ເພື່ອຢຸດຕິຄະດີນີ້ ຫຼື ຢ່າງສຸດທ້າຍຄືລັດຖະບານສະຫະລັດ ອາເມຣິກາ ເຈດຕະນາສົ່ງເອກະສານທີ່ບໍ່ມີນ້ຳໜັກພຽງພໍ ເພື່ອໃຫ້ສານພິຈາລະນາຍົກຄຳຮ້ອງຟ້ອງ, ກ່ອນກ່າວເພີ່ມເຕີມວ່າ ແຕ່ທາງທີ່ດີທີ່ສຸດຄືການທີ່ສະຫະລັດ ອາເມຣິກາບໍ່ສົ່ງຄຳຮ້ອງໃດມາເລີຍ.

ໃນດ້ານຂອງທ່ານ ກີ ແຊັງ-ຊາກ ອະດີດເອກອັກຄະລັດຖະທູດການາດາ ປະຈຳນະຄອນຫຼວງປັກກິ່ງ ກ່າວວ່າໃນທາງການທູດຖືວ່າທັດສະນະຂອງທ່ານ ຈອນ ແມັກຄໍລຳ ເປັນຄວາມຈິງ, ແຕ່ທ່ານບໍ່ຄວນເວົ້າອອກມາ ເນື່ອງຈາກທຸກຝ່າຍຮູ້ດີຢູ່ແລ້ວ ວ່າສະຖານະການຍັງເຄັ່ງຕຶງ ຈາກການທີ່ຈີນຈັບກຸມຕົວພົນລະເມືອງການາດາໄວ້ 2 ຄົນ ແລະ ສັ່ງປະຫານຊີວິດແລ້ວ 1 ຄົນໃນຄະດີຢາເສບຕິດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube