ເຂື່ອນແຕກທີ່ບຣາຊິນ ເສຍຊີວິດແລ້ວ 34 ຄົນ, ທາງການຢຶດເງິນເຈົ້າຂອງເຂື່ອນກວ່າ 1.3 ຕື້ໂດລາ

ສຳນັກຂ່າວຕ່າງປະເທດລາຍງານເມື່ອວັນທີ 26 ມັງກອນ 2019 ທີ່ຜ່ານມາວ່າ: ຄວາມຄືບໜ້າພາຍຫຼັງເກີດເຫດເຂື່ອນ ທີ່ໃຊ້ກັກເກັບສິ່ງເສດເຫຼືອຈາກຂະບວນການສະກັດແຮ່ແຕກ ພາຍໃນບໍ່ແຮ່ເຫຼັກທີ່ເມືອງບຣູມາດິນໂຮ ໃນລັດມີນັສເຊໄຣ ທາງພາກຕາເວັນອອກຂອງບຣາຊິນ ສົ່ງຜົນໃຫ້ມວນນ້ຳ ແລະ ຕົມປະລິມານມະຫາສານທີ່ປົນເປື້ອນຫາງແຮ່ໄຫຼເຂົ້າສູ່ຊົມຊຸມທີ່ຕັ້ງຢູ່ບໍລິເວນໃກ້ຄຽງ ເຊິ່ງລວມເຖິງອາຄານພັກເຊົາ ແລະ ໂຮງອາຫານຂອງພະນັກງານບໍ່ແຮ່ ເຊິ່ງແຮງງານຫຼາຍຮ້ອຍຄົນກຳລັງພັກກິນອາຫານທ່ຽງ ເມື່ອວັນທີ 25 ມັງກອນ ທີ່ຜ່ານມາ.

ສຳນັກງານບໍ່ແຮ່ແຫ່ງຊາດຂອງບຣາຊິນ ໄດ້ສັ່ງໃຫ້ບໍລິສັດວາເລ ເຊິ່ງເປັນບໍລິສັດດ້ານບໍ່ແຮ່ລາຍໃຫຍ່ທີ່ສຸດຂອງປະເທດຢຸດຕິກິດຈະກຳທັງໝົດຢູ່ບໍ່ແຮ່ເຟເຊົາ ເຊິ່ງເປັນສະຖານທີ່ເກີດເຫດ, ໃນດ້ານຂອງສຳນັກງານໄອຍະການແຫ່ງລັດມີນັສເຊໄຣ ສັ່ງຢຶດເງິນຢ່າງໜ້ອຍ 5,000 ລ້ານເຣໄອ (1.33 ຕື້ໂດລາ) ຈາກບັນຊີຂອງບໍລິສັດວາເລ ເພື່ອເປັນຄ່າຊົດເຊີຍຄວາມເສຍຫາຍທັງໝົດໃນເບື້ອງຕົ້ນ.

(Photo by Mauro Pimentel / AFP)

ຂະນະທີ່ທ່ານ ຟາບິໂອ ສະວາສແມນ ປະທານຜູ້ບໍລິຫານຂອງບໍລິສັດວາເລ ກ່າວວ່າພະນັກງານຍັງສູນຫາຍປະມານ 1 ໃນ 3 ຈາກທັງໝົດ 300 ຄົນ ແລະ ຍອມຮັບວ່າຍັງບໍ່ຮູ້ສາເຫດການແຕກຂອງເຂື່ອນໃນຄັ້ງນີ້ ທີ່ຊ້ຳຮ້ອຍເຫດການເຂື່ອນແຕກພາຍໃນບໍ່ແຮ່ຂອງບໍລິສັດວາເລ ເມື່ອເດືອນພະຈິກ 2015 ເຮັດໃຫ້ມີຜູ້ເສຍຊີວິດ 19 ຄົນ, ເຖິງຢ່າງໃດກໍ່ຕາມ ທ່ານ ຟາບີໂອ ສະວາສແມນໃຫ້ຂໍ້ມູນວ່າ ເຂື່ອນດັ່ງກ່າວມີຄວາມສູງ 86 ແມັດ ແລະ ສ້າງເມື່ອປີ 1977 ແຕ່ຜ່ານການກວດສອບຄຸນນະພາບເມື່ອບໍ່ດົນມານີ້.

ໃນດ້ານຂອງໜ່ວຍກູ້ໄພຍັງຄົງກະຈາຍກຳລັງຄົ້ນຫາຜູ້ສູນຫາຍຕາມລາຍຊື່ປະມານ 300 ຄົນ, ເຖິງແມ່ນວ່າຄວາມຫວັງໜ້ອຍລົງທຸກຂະນະ ເນື່ອງຈາເວລາຜ່ານມາດົນກວ່າ 24 ຊົ່ວໂມງແລ້ວ, ໃນເວລາດຽວກັນກອງທັບບຣາຊິນ ໄດ້ສົ່ງທະຫານ 1,000 ຄົນ ພ້ອມອຸປະກອນຂະໜາດໃຫຍ່ ແລະ ໝາດົມກິ່ນອີກຫຼາຍສິບໂຕເຂົ້າຮ່ວມຄົ້ນຫາ ໂດຍມີການຢືນຢັນຈຳນວນຜູ້ເສຍຊີວິດແລ້ວຢ່າງໜ້ອຍ 34 ຄົນ, ແຕ່ລາຍງານຂອງສື່ທ້ອງຖິ່ນຫຼາຍແຫ່ງທີ່ຍັງບໍ່ຖືວ່າເປັນທາງການລະບຸຈຳນວນຜູ້ເສຍຊີວິດເພີ່ມເປັນຫຼາຍກວ່າ 40 ຄົນແລ້ວ.

(Photo by Douglas Magno / AFP)

(Photo by Mauro PIMENTEL / AFP)

(Photo by Mauro Pimentel / AFP)

(Photo by Mauro Pimentel / AFP)

(Photo by Douglas Magno / AFP)

(Photo by Mauro Pimentel / AFP)

– ເກີດເຫດເຂື່ອນແຕກ ທີ່ບຣາຊິນ, ຄາດມີຜູ້ເສຍຊີວິດ ແລະ ບາດເຈັບຈຳນວນຫຼາຍ (ວິດີໂອ)


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube