ເຫດລະເບີດທີ່ໂບສຄາທໍລິກ ໃນຟິລິບປິນມີຜູ້ເສຍຊີວິດແລ້ວ 20 ຄົນ, ກອງທັບພ້ອມຕອບໂຕ້ຄືນຢ່າງເຖິງທີ່ສຸດ

ສຳນັກຂ່າວຕ່າງປະເທດລາຍງານ 28 ມັງກອນ 2019 ວ່າ: ພາຍຫຼັງເກີດເຫດລະເບີດ 2 ຄັ້ງຕິດຕໍ່ກັນ ທີ່ໂບສຄາທໍລິກ ໃຈກາງເມືອງໂຈໂລ ແຂວງຊູລູ ເຊິ່ງເປັນສ່ວນໜຶ່ງຂອງເຂດປົກຄອງຕົນເອງມິນດາເນົາ ທາງພາກໃຕ້ຂອງຟິລິບປິນ ເມື່ອວັນອາທິດ ທີ່ຜ່ານມາ, ໂດຍແຮງລະເບີດສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 20 ຄົນ ໃນຈຳນວນນີ້ເປັນທະຫານ 5 ຄົນ ແລະ ໄດ້ຮັບບາດເຈັບອີກຫຼາຍກວ່າ 80 ຄົນ, ເຊິ່ງໃນເບື້ອງຕົ້ນຕຳຫຼວດໄດ້ໃຫ້ຂໍ້ມູນຈຳນວນຜູ້ເສຍຊີວິດ 27 ຄົນ ແຕ່ໄດ້ປັບຫຼຸດລົງໃນເວລາຕໍ່ມາ ໂດຍໃຫ້ເຫດຜົນກ່ຽວກັບຄວາມສັບສົນດ້ານການປະສານງານ.

(Photo by NICKEE BUTLANGAN / AFP)

(Photo by NICKEE BUTLANGAN / AFP)

ຕໍ່ມາກຸ່ມ IS ໄດ້ເຜີຍແຜ່ຖະແຫຼງການຜ່ານສຳນັກຂ່າວອາມັກ ເຊິ່ງເປັນກະບອກສຽງຂອງພວກກ່ຽວ ອ້າງວ່າເປັນຜູ້ຢູ່ເບື້ອງຫຼັງການກໍ່ການຮ້າຍຄັ້ງນີ້, ແຕ່ຍັງບໍ່ມີຫຼັກຖານຮອງຮັບທີ່ຊັດເຈນ, ຂະນະທີ່ຫຼາຍຝ່າຍເຊື່ອວ່າອາດເປັນການກະທຳຂອງກຸ່ມອາບູ ໄຊຢາບ ຫຼາຍກວ່າ, ເນື່ອງຈາກແຂວງຊູລູ ເປັນເຂດອິດທິພົນຂອງກອງໂຈມກຸ່ມນີ້.

ໃນດ້ານຂອງທຳນຽບປະທານປະເທດຟິລິບປິນ ໄດ້ເຜີຍແຜ່ຖະແຫຼງການຂອງທ່ານ ໂຣດຼິໂກ ດູເຕເຕ ທີ່ປະນາມກຸ່ມຜູ້ກໍ່ການຮ້າຍວ່າ “ຖືເປັນສັດຕູຂອງລັດ ເຊິ່ງເຈດຕະນາທ້າທາຍອຳນາດລັດໃນການປົກປ້ອງ ແລະ ຄຸ້ມຄອງປະຊາຊົນ ແນ່ນອນວ່າຕໍ່ຈາກນີ້ກອງທັບຟິລິບປິນຈະຕອບສະໜອງຕໍ່ຄຳທ້າທາຍດັ່ງກ່າວ ດ້ວຍການເພີ່ມຄວາມຮຸນແຮງຂອງປະຕິບັດການກວາດລ້າງກຸ່ມກໍ່ການຮ້າຍ ທີ່ບໍ່ຮູ້ຈັກໄຈ້ແຍກຜິດຖືກຊົ່ວດີ”

ເຊິ່ງເຫດການດັ່ງກ່າວເກີດຂຶ້ນພຽງ 1 ອາທິດພາຍຫຼັງຜົນການລົງປະຊາມະຕິປະຊາຊົນເກາະມິນດາເນົາ ເມື່ອວັນທີ 21 ມັງກອນ 2019 ທີ່ຜ່ານມາ ປາກົດວ່າສຽງສ່ວນໃຫຍ່ຮັບຮອງຮ່າງກົດໝາຍ “ອົງປະກອບບັງຊາໂມໂຣ” (Bangsamoro Organic Law) ກຽມແບ່ງອານາເຂດສ່ວນໜຶ່ງຂອງເກາະມິນດາເນົາ ໃຫ້ເປັນເຂດປົກຄອງຕົນເອງບັງຊາໂມໂຣ ເຊິ່ງເປັນຜົນມາຈາກການເຈລະຈາລະຫວ່າງລັດຖະບານກາງ ກັບແນວຮ່ວມປົດປ່ອຍອົດສະລາມໂມໂຣ ທີ່ໃຊ້ເວລາກວ່າ 10 ປີ ຈົນມີການລົງນາມຮ່ວມກັນເມື່ອປີ 2014 ໂດຍໃນໄລຍະທຳອິດລັດຖະບານກາງຈະເປັນຜູ້ຄຸ້ມຄອງດ້ານຄວາມໝັ້ນຄົງ ແລະ ມີກອງທຶນພິເສດຊ່ວຍເຫຼືອ ຈົນກວ່າເຂດປົກຄອງຕົນເອງແຫ່ງໃໝ່ຈະມີສະຖຽນລະພາບໃນໄລຍະເວລາ 5 ປີ, ເຖິງແມ່ນວ່າສຽງສ່ວນໃຫຍ່ໃນແຂວງຊູລູປະຕິເສດຮ່າງກົດໝາຍດັ່ງກ່າວ ແຕ່ຈະຕ້ອງເຂົ້າເປັນສ່ວນໜຶ່ງຂອງເຂດປົກຄອງຕົນເອງແຫ່ງນີ້ ຕາມສຽງສ່ວນໃຫຍ່ໂດຍລວມ.

– ປະຊາມະຕິມິນດາເນົາ ຟິລິບປິນ ມີສຽງສ່ວນໃຫຍ່ຮັບຮອງຕັ້ງເປັນເຂດປົກຄອງຕົນເອງບັງຊາໂມໂຣ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube