ຜູ້ນຳເວເນຊູເອລາ ບໍ່ສົນຕໍ່ຄຳຂູ່ຂອງ EU ທີ່ບອກໃຫ້ເລືອກຕັ້ງໃໝ່

ສຳນັກຂ່າວຕ່າງປະເທດລາຍງານເມື່ອວັນທີ 27 ມັງກອນ 2019 ທີ່ຜ່ານມາວ່າ: ທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ແລະ ທ່ານພົນ ເອກ ວະລາມິເມຍ ປາດຼິໂນ ໂລເປສ ລັດຖະມົນຕີກະຊວງປ້ອງກັນປະເທດ ໄດ້ຢ້ຽມຢາມເມືອງບາເລນເຊຍ ລັດກາຣາໂບໂບ ພາກເໜືອຂອງປະເທດ ເມື່ອວັນອາທິດ ທີ່ຜ່ານມາ ເພື່ອຮ່ວມກິດຈະກຳ ແລະ ສັງເກດການການເຝິກຊ້ອມຮົບຂອງທະຫານທຸກເຫຼົ່າທັບ ໂດຍຜູ້ນຳເວເນຊູເອລາໃຊ້ໂອກາດນີ້ ປາໄສກ່ຽວກັບບັນຫາການເມືອງພາຍໃນປະເທດ ທີ່ເຂົ້າໃກ້ຈຸດແຕກຫັກຫຼາຍທີ່ສຸດ ນັບຕັ້ງແຕ່ຂຶ້ນສູ່ອຳນາດເມື່ອປີ 2013 ວ່າ: ເວເນຊູເອລາບໍ່ໄດ້ເປັນສ່ວນໜຶຶ່ງຂອງທະວີບເອີຣົບ ທ່າທີຂອງສະຫະພາບເອີຣົບ (EU) ຕໍ່ສະຖານະການພາຍໃນເວເນຊູເອລາຖືວ່າ ເປັນຄວາມຜິດພາດຂັ້ນຮ້າຍແຮງ ແລະ ແນ່ນອນວ່າບໍ່ມີທາງທີ່ຈະປະຕິບັດຕາມ.

ຂະນະດຽວກັນ, ທ່ານ ນິໂຄລັສ ມາດູໂຣ ກ່າວປຸກລະດົມໃຫ້ບັນດາທະຫານຮ່ວມກັນຕໍ່ຕ້ານການຕໍ່ລັດຖະປະຫານ ແລະ ກຸ່ມກະບົດ ພ້ອມທັງກ່າວວ່າ ພ້ອມເຈລະຈາແບບເປີດເຜີຍກັບສະຫະລັດ ອາເມຣິກາ ແລະ ທ່ານ ຮວນ ກວຍໂດ ທີ່ແຕ່ງຕັ້ງຕົນເອງຂຶ້ນມາເປັນຮັກສາການປະທານປະເທດ ໂດຍບໍ່ຜ່ານການເລືອກຕັ້ງ ພາຍໃຕ້ການສະໜັບສະໜູນຂອງ ສະຫະລັດ ອາເມຣິກາ ແລະ ສະຫະພາບເອີຣົບ, ແຕ່ຍັງບໍ່ໄດ້ຮັບການຕອບສະໜອງຢ່າງເປັນຮູບປະທຳຈາກທັງສອງຝ່າຍ.

ເຊິ່ງສະຫະພາບເອີຣົບ ໄດ້ອອກຖະແຫຼງການເມື່ອວັນເສົາ ທີ່ຜ່ານມາ ຂີດເສັ້ນຕາຍໃຫ້ທ່ານ ນິໂຄລັສ ມາດູໂຣ ຈັດການເລືອກຕັ້ງໃໝ່ພາຍໃນ 8 ວັນ ຖ້າບໍ່ດັ່ງນັ້ນສະມາຊິກທັງ 28 ປະເທດຈະຮັບຮອງເອົາທ່ານ ຮວນ ກວຍໂດ ໃນຖານະຮັກສາການປະທານປະເທດ ຜູ້ມີອຳນາດບໍລິຫານຢ່າງຊອບທຳໃນເວເນຊູເອລາແຕ່ພຽງຜູ້ດຽວ.

ໃນອີກດ້ານໜຶ່ງ, ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດ ປະຈຳທຳນຽບຂາວ ລົງຂໍ້ຄວາມຜ່ານ Twitter ວ່າ ຫາກເກີດເຫດຮ້າຍໃດກໍ່ຕາມຂຶ້ນກັບທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດ ທີ່ສະຫະລັດ ອາເມຮິກາໃຫ້ການສະໜັບສະໜູນໃນຖານະຜູ້ຮັກສາການ ແລະ ນັກການທູດອາເມຣິກາບາງສ່ວນທີ່ຍັງຄົງປະຕິບັດໜ້າທີ່ຢູ່ໃນເວເນຊູເອລາ ຫຼື ແມ່ນແຕ່ຫາກອາຄານສະພາແຫ່ງຊາດເວເນຊູເອລາຫາກຕົກເປັນເປົ້າໝາຍຂອງການກໍ່ຄວາມຮຸນແຮງ ທ່ານ ນິໂຄລັສ ມາດູໂຣ ຕ້ອງຮັບຜິດຊອບ.

Venezuela’s National Assembly head and self-proclaimed “acting president” Juan Guaido (Photo by Luis ROBAYO / AFP)

ເຖິງຢ່າງໃດກໍ່ຕາມ, ທະຫານສ່ວນໃຫຍ່ຍັງໃຫ້ການສະໜັບສະໜູນທ່ານ ນິໂຄລັດ ມາດູໂຣ ເຖິງແມ່ນວ່າທ່ານ ພົນເອກ ໂຮເຊ ລູອິສ ຊິນວາ ຜູ້ຊ່ວຍທູດຝ່າຍທະຫານປະຈຳສະຖານເອກອັກຄະລັດຖະທູດເວເນຊູເອລາ ໃນນະຄອນຫຼວງວໍຊິງຕັນ ເປັນທະຫານເວເນຊູເອລາຄົນທຳອິດ ທີ່ປະກາດຢູ່ເບື້ອງທ່ານ ຮວນ ກວຍໂດ ແຕ່ທະຫານສ່ວນໃຫຍ່ປະຕິເສດເອກະສານທີ່ເປັນຂໍ້ສະເໜີຈາກທ່ານ ຮວນ ກວຍໂດ ທີ່ຈະອະໄພຍະໂທດໃຫ້ແກ່ເຈົ້າໜ້າທີ່ ແລະ ຄອບຄົວ ຫາກປ່ຽນທ່າທີຈາກການສະໜັບສະໜູນລັດຖະບານຝ່າຍຊ້າຍຂອງທ່ານ ນິໂຄລັສ ມາດູໂຣ ມາສະໜັບສະໜູນຕົນ.

ຈີນ-ລັດເຊຍ ບໍ່ຍອມຮັບຂໍ້ຮຽກຮ້ອງຂອງ ສ.ອາເມຣິກາ ຕໍ່ບັນຫາການເມືອງເວເນຊູເອລາ ໃນສະພາຄວາມໝັ້ນຄົງ UN

ການເມືອງເວເນຊູເອລາເຂົ້າສູ່ພາວະວຸ້ນວາຍ ພາຍນອກແຊກແຊງ ແບ່ງຂົ້ວອຳນາດຊ້າຍ-ຂວາຢ່າງຊັດເຈນ