ເຂື່ອນເຊປຽນ-ເຊນ້ຳນ້ອຍ ຈ່າຍຄ່າຊົດເຊີຍໃຫ້ຜູ້ເສຍຊີວິດຈຳນວນ 71 ຄົນ ໃນ 51 ຄອບຄົວ

ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອັດຕະປືລາຍງານວ່າ: ສືບເນື່ອງມາຈາກເຫດການເຂື່ອນເຊປຽນ-ເຊນ້ຳນ້ອຍແຕກເມື່ອວັນທີ 23 ກໍລະກົດ 2018 ທີ່ຜ່ານມາ, ຫຼ້າສຸດໃນຕອນເຊົ້າຂອງວັນທີ 26 ມັງກອນ 2019 ທີ່ຜ່ານມາ, ບໍລິສັດເຈົ້າຂອງໂຄງການໄດ້ຈ່າຍຄ່າຊົດເຊີຍໃຫ້ແກ່ຄອບຄົວຜູ້ເສຍຊີວິດແລ້ວ ຕາມຈຳນວນຜູ້ເສຍຊີວິດ ແລະ ສູນຫາຍທີ່ລັດຖະບານຮັບຮອງເອົາຄື 71 ຄົນ ໃນ 51 ຄອບຄົວ ລວມເປັນເງິນທັງໝົດ 710,000 ໂດລາສະຫະລັດ ແລະ ໃນຕໍ່ໜ້າຫາກພົບເຫັນຜູ້ເສຍຊີວິດຕື່ມ ບໍລິສັດເຈົ້າຂອງໂຄງການຕ້ອງຮັບຜິດຊອບຊົດເຊີຍຕື່ມອີກ ໂດຍອີງຕາມແຈ້ງການຂອງຫ້ອງການສຳນັກງານນາຍົກລັດຖະມົນຕີ ເລກທີ 138/ຫສນຍ ລົງວັນທີ 23 ມັງກອນ 2019 ແມ່ນເຫັນດີໃຫ້ຊົດເຊີຍແກ່ຜູ້ເສຍຊີວິດ 10,000 ໂດລາ ຕໍ່ຫົວຄົນ.

ເຊິ່ງໃນຈຳນວນ 71 ຄົນທີ່ເສຍຊີວິດ ຈາກ 51 ຄອບຄົວປະກອບມີດັ່ງນີ້:

– ບ້ານໃໝ່ ມີຜູ້ເສຍຊີວິດ 11 ຄົນ ໃນຈຳນວນ 10 ຄອບຄົວ,

– ບ້ານທ່າຫິນ ມີຜູ້ເສຍຊີວິດ 8 ຄົນ ໃນຈຳນວນ 6 ຄອບຄົວ,

– ບ້ານສະໝອງ ມີຜູ້ເສຍຊີວິດ 1 ຄົນ ໃນຈຳນວນ 1 ຄອບຄົວ,

– ບ້ານຫິນລາດ ມີຜູ້ເສຍຊີວິດ 31 ຄົນ ໃນຈຳນວນ 20 ຄອບຄົວ,

– ບ້ານທ່າແສງຈັນ ມີຜູ້ເສຍຊີວິດ 18 ຄົນ ໃນຈຳນວນ 12 ຄອບຄົວ,

– ບ້ານແທ ມີຜູ້ເສຍຊີວິດ 2 ຄົນ ໃນຈຳນວນ 2 ຄອບຄົວ.

ນອກຈາກນີ້, ເພື່ອຄວາມປອດໄພຂອງຈຳນວນເງິນທີ່ໄດ້ມອບໃຫ້ແກ່ຄອບຄົວຜູ້ເສຍຊີວິດ ແມ່ນໄດ້ມີທະນາຄານເຄື່ອນທີ່ມາຮັບຝາກເຖິງສະຖານທີ່ມອບຮັບອີກດ້ວຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube