ຈີນກ່າວວ່າ ສ.ອາເມຣິກາ ໃຊ້ອຳນາດເກີນຂອບເຂດປະຕິບັດຕໍ່ຫົວເຫວີ່ຍ ແລະ ເປັນຄະດີການເມືອງ

ສຳນັກຂ່າວຕ່າງປະເທດລາຍງານ 29 ມັງກອນ 2019 ວ່າ: ທ່ານ ເກິ່ງ ສວງ ໂຄສົກກະຊວງການຕ່າງປະເທດຂອງຈີນ ກ່າວຖະແຫຼງພາຍຫຼັງທີ່ກະຊວງຍຸຕິທຳຂອງສະຫະລັດ ອາເມຣິກາຮ້ອງຟ້ອງຄະດີອາຍາຕໍ່ບໍລິສັດຫົວເຫວີ່ຍ ເຕັກໂນໂລຊີ ແລະ ບໍລິສັດໃນເຄືອອີກ 2​ ແຫ່ງຄື: Huawei Device USA ກັບ Skycom ໃນຄະດີອາຊະຍາກຳທາງການເງິນທັງໝົດ 23 ຂໍ້ຫາ ລວມມີທັງການສໍ້ໂກງ, ຂັດຂວາງຂະບວນການຍຸຕິທຳ ແລະ ການຈາລະກຳຂໍ້ມູນຂອງບໍລິສັດຄູ່ແຂ່ງ ຕະຫຼອດຮອດການລັກລອບເຮັດທຸລະກິດກັບອີຣານວ່າ “ເປັນຄະດີການເມືອງ” ແລະ ຮຽກຮ້ອງໃຫ້ລັດຖະບານສະຫະລັດ ອາເມຣິກາຢຸດຕິການໃຊ້ອຳາດລັດຈົນເກີນຂອບເຂດ ແລະ ບໍ່ມີເຫດຜົນໃນການກວາດລ້າງຫົວເຫວີ່ຍ ແລະ ບໍລິສັດເຕັກໂນໂລຊີອີກຫຼາຍແຫ່ງຂອງຈີນ.

ໃນດ້ານຂອງກະຊວງຍຸຕິທຳສະຫະລັດ ອາເມຣິກາ ກໍ່ອອກຖະແຫຼງການຕອບໂຕ້ທັນທີວ່າ: ຄະດີດັ່ງກ່າວເປັນຂໍ້ຂັດແຍ່ງລະຫວ່າງລັດຖະບານສະຫະລັດ ອາເມຣິກາກັບຫົວເຫວີ່ຍເທົ່ານັ້ນ ບໍ່ແມ່ນລະຫວ່າງລັດຖະບານສະຫະລັດ ອາເມຣິກາ ກັບ ລັດຖະບານຈີນ, ເຖິງຢ່າງໃດກໍ່ຕາມ ສະຫະລັດ ອາເມຣິກາ ຫວັງເປັນຢ່າງຍິ່ງວ່າ ທາງການຈີນຈະເນັ້ນໜັກໃຫ້ຜູ້ປະກອບທຸລະກິດຈາກປະເທດຂອງຕົນທີ່ຈະເຂົ້າມາລົງທຶນໃນສະຫະລັດ ອາເມຣິກາ ຕ້ອງປະຕິບັດຕາມກົດໝາຍຂອງສະຫະລັດ ອາເມຣິກາ, ໃນເວລາດຽວກັນສຳນັກງານໃຫຍ່ຂອງຫົວເຫວີ່ຍທີ່ເມືອງເຊິນເຈິ້ນ ໃນມົນທົນກວາງຕຸ້ງ ທາງພາກໃຕ້ຂອງຈີນ ກໍ່ໄດ້ອອກຖະແຫຼງການປະຕິເສດຂໍ້ກ່າວຫາທັງໝົດ.

ເຖິງຢ່າງໃດກໍ່ຕາມ, ການເຄື່ອນໄຫວຂອງກະຊວງຍຸຕິທຳສະຫະລັດ ອາເມຣິກາ ແມ່ນຮ່ວມກັບສຳນັກງານສອບສວນກາງ (FBI) ເຊິ່ງຍື່ນຄຳຮ້ອງທັນພາຍໃນກຳນົດເວລາຄື 30 ວັນ ເພື່ອຂໍໃຫ້ລັດຖະບານການາດາ ພິຈາລະນາສົ່ງຕົວຜູ້ຕ້ອງຫາຄົນສຳຄັນທີ່ມີພຽງຄົນດຽວຄື: ທ່ານ ນາງ ເມິ້ງ ຫວ່ານໂຈ ຜູ້ບໍລິຫານລະດັບສູງຂອງຫົວເຫວີ່ຍ ແລະ ເປັນລູກສາວຂອງທ່ານ ເຫຼິນ ເຈິ້ງເຟີຍ ຜູ້ສ້າງຕັ້ງບໍລິສັດຫົວເຫວີ່ຍ, ແລະ ຍັງເກີດຂຶ້ນໃນເວລາດຽວກັນກັບທີ່ຄະນະຜູ້ແທນເຈລະຈາການຄ້າຊຸດໃຫຍ່ຈາກລັດຖະບນຈີນເດີນທາງເຖິງນະຄອນຫຼວງວໍຊິງຕັນ ທີ່ນຳໂດຍທ່ານ ຫຼິວ ເຮີ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ອີ້ ກັງ ປະທານທະນາຄານປະຊາຊົນຈີນ ເຊິ່ງທ່ານ ວິນເບີ ຣອສ ລັດຖະມົນຕີກະຊວງການຄ້າຂອງສະຫະລັດ ອາເມຣິກາ ຫວັງວ່າຈີນຈະໄຈ້ແຍກບັນຫາດັ່ງກ່າວອອກຈາກກັນ.

ລັດຖະບານ ສ.ອາເມຣິກາ ຟ້ອງຫົວເຫວີ່ຍ 23 ຂໍ້ຫາ ແລະ ພ້ອມຂໍຕົວຜູ້ບໍລິຫານຫົວເຫວີ່ຍຈາການາດາ

- Advertisement -