ຂໍ້ຄວາມຫຼຸດ “ສ.ອາເມຣິກາ ຈະສົ່ງທະຫານ 5,000​ ຄົນ” ປະກົບຊາຍແດນເວເນຊູເອລາ

ສຳນັກຂ່າວຕ່າງປະເທດລາຍງານເມື່ອວັນທີ 29 ມັງກອນ 2019 ທີ່ຜ່ານມາວ່າ: ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດສະຫະລັດ ອາເມຣິກາ ປະຈຳທຳນຽບຂາວ ຖະແຫຼງເມື່ອວັນຈັນ ທີ່ຜ່ານມາ ຮຽກຮ້ອງໃຫ້ກອງທັບ ແລະ ໜ່ວຍງານດ້ານຄວາມໝັ້ນຄົງທຸກແຫ່ງຂອງເວເນຊູເອລາ ໃຫ້ການຍອມຮັບການຖ່າຍໂອນອຳນາດຢ່າງສັນຕິ ແລະ ເປັນໄປຕາມລະບອບປະຊາທິປະໄຕ ໂດຍຍົກຕົວຢ່າງກໍລະນີທ່ານ ພົນເອກ ໂຮເຊ ລູອິສ ຊິນວາ ຜູ້ຊ່ວຍທູດຝ່າຍທະຫານປະຈຳສະຖານເອກອັກຄະລັດຖະທູດເວເນຊູເອລາ ໃນນະຄອນຫຼວງວໍຊິງຕັນ ເຊິ່ງເປັນທະຫານເວເນຊູເອລາຄົນທຳອິດ ທີ່ຍອມຮັບເອົາທ່ານ ຮວນ ກວຍໂດ ເປັນຮັກສາການປະທານປະເທດ.

ຕໍ່ຂໍ້ຊັກຖາມໃນບັນຫາທີ່ວ່າ ສະຫະລັດ ອາເມຣິກາກຳລັງພິຈາລະນາມາດຕະການທາງທະຫານຕໍ່ເວເນຊູເອລາຫຼືບໍ່ ທ່ານ ຈອນ ໂບຕັ້ນກ່າວພຽງວ່າທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກຳລັງປະເມີນທຸກຊ່ອງທາງທີ່ເປັນໄປໄດ້ ແລະ ສະຫະລັດອາເມຣິກາຈະເດີນໜ້າຮຽກຮ້ອງໃຫ້ປະຊາຄົມໂລກຮ່ວມກັນຮັບຮອງເອົາທ່ານ ຮວນ ກວຍໂດ ໃນຖານະຜູ້ນຳຮັກສາການຂອງເວເນຊູເອລາ ທີ່ມີອຳນາດບໍລິຫານຢ່າງຊອບທຳແຕ່ພຽງຜູ້ດຽວໃນຕອນນີ້.

ເຖິງຢ່າງໃດກໍ່ຕາມ, ໃນຂະນະຖະແຫຼງຂ່າວມີສື່ມວນຊົນຈຳນວນໜຶ່ງ ສາມາດບັນທຶກພາບປຶ້ມບັນທຶກຂອງທ່ານ ຈອນ ໂບຕັ້ນ ໄວ້ໄດ້ ໂດຍມີປະໂຫຍດໜຶ່ງຂຽນໄວ້ວ່າ “ທະຫານ 5,000 ຄົນ ໄປຍັງໂກໂລມບີ” ແຕ່ໃນການຖະແຫຼງຂ່າວທ່ານ ຈອນ ໂບຕັ້ນ ຜັດບໍ່ໄດ້ກ່າວເຖິງຂໍ້ມູນດັ່ງກ່າວແຕ່ຢ່າງໃດ ກ່າວພຽງວ່າລັດຖະບານສະຫະລັດ ອາເມຣິກາບໍ່ໄດ້ຕັດຕົວເລືອກໃນອອກ ລວມທັງການໃຊ້ກຳລັງທະຫານ.

ຕໍ່ມາທ່ານ ຄາຣອສ ໂອເມດ ລັດຖະມົນຕີກະຊວງການຕ່າງໂກໂລມບີ ປະເທດທີ່ມີຊາຍແດນຕິດກັບເວເນຊູເອລາ ຍາວເຖິງ 2,200 ກິໂລແມັດ ແລະ ເປັນໜຶ່ງໃນປະເທດທີ່ຮ່ວມກັບສະຫະລັດ ອາເມຣິກາ ໃນການຮັບຮອງເອົາທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດຂອງເວເນຊູເອລາ ຂຶ້ນເປັນຜູ້ນຳຮັກສາການໂດຍການແຕ່ງຕັ້ງຕົນເອງ ໂດຍກ່າວຖະແຫຼງວ່າ: ບໍ່ຮູ້ວ່າຂໍ້ຄວາມໃນປຶ້ມບັນທຶກຂອງທ່ານ ຈອນ ໂບຕັ້ນ ມີຄວາມສຳຄັນ ແລະ ເຫດຜົນອັນໃດຢູ່ເບື້ອງຫຼັງ ແລະ ໂກໂລມບີຢືນຢັນຈະນຳເນີນການໃນທາງການເມືອງ ແລະ ການທູດກັບເວເນຊູເອລາເທົ່ານັ້ນ.

ນອກຈາກນີ້, ທ່ານ ສະຕີບ ມະນູຊິນ ລັດຖະມົນຕີກະຊວງການເງິນສະຫະລັດ ອາເມຣິກາ ຍັງໄດ້ປະກາດມາດຕະການຂວໍ້າບາດຄັ້ງໃໝ່ຕໍ່ບໍລິສັດເປໂຕຣເລໂອສ ເດິເວເນຊູເອລາ ຫຼື PDVSA ເຊິ່ງລັດວິສາຫະກິດພະລັງງານຂອງເວເນຊູເອລາ ໂດຍຫ້າມພົນລະເມືອງສະຫະລັດ ອາເມຣິກາເຮັດທຸລະກິດຮ່ວມກັບ PDVSA ແລະ ອາຍັດຊັບສິນຂອງ PDVSA ທີ່ມີຢູ່ໃນສະຫະລັດ ອາເມຣິກາ ແຕ່ຍັງບໍ່ມີການຫ້າມບໍລິສັດຂອງສະຫະລັດ ອາເມຣິກາຊື້ນ້ຳມັນຈາກ PDVSA ແລະ ກ່າວວ່າມາດຕະການຂວໍ້າບາດທັງໝົດຈະຖືກຍົກເລີກ ທັນທີທີ່ PDVSA ຍອມຮັບເອົາທ່ານ ຮວນ ກວຍໂດ ເປັນຜູ້ນຳ, ເຖິງແມ່ນວ່າສາຍພົວພັນທາງການເມືອງ ແລະ ການທູດລະຫວ່າງສະຫະລັດ ອາເມຣິກາ ກັບ ເວເນຊູເອລາຈະຕົກຕ່ຳ ແຕ່ PDVSA ສົ່ງອອກນ້ຳມັນດິບໄປຍັງ ສະຫະລັດ ອາເມຣິກາຫຼາຍເຖິງ 41%.

ຂະນະດຽວກັນ, ທ່ານ ອະລັນ ດັນແຄນ ລັດຖະມົນຕີກະຊວງການຕ່າງປະເທດອັງກິດ ກ່າວວ່າລັດຖະບານໄດ້ຮັບຈົດໝາຍຈາກທ່ານ ຮວນ ກວຍໂດ ຮຽກຮ້ອງໃຫ້ທະນາຄານແຫ່ງອັງກິດ ຫ້າມລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ ເຂົ້າເຖິງຄຳແທ່ງທັງໝົດທີ່ຝາກໄວ້ກັບທະນາຄານດັ່ງກ່າວ ເຊິ່ງທ່ານ ອະລັນ ດັນແຄນ ກ່າວວ່າເປັນຄວາມຈິງທີ່ທະນາຄານແຫ່ງອັງກິດຮັບຝາກຄຳຂອງລັດຖະບານເວເນຊູເອລາຈຳນວນຫຼາຍ ແຕ່ສິດທິຂຶ້ນຢູ່ກັບການຕັດສິນໃຈຂອງຜູ້ວ່າການທະນາຄານແຫ່ງອັງກິດຄືທ່ານ ມາກ ຄານີ ບໍ່ແມ່ນລັດຖະບານ, ເຖິງຢ່າງໃດກໍ່ຕາມ ກ່ອນໜ້ານີ້ມີລາຍງານວ່າທະນາຄານແຫ່ງອັງກິດອະນຸຍາດໃຫ້ທ່ານ ນິໂຄລັດ ມາດູໂຣ ຖອນຄຳມູນຄ່າປະມານ 1,200 ລ້ານໂດລາສະຫະລັດ.

– ຜູ້ນຳເວເນຊູເອລາ ບໍ່ສົນຕໍ່ຄຳຂູ່ຂອງ EU ທີ່ບອກໃຫ້ເລືອກຕັ້ງໃໝ່

– ຈີນ-ລັດເຊຍ ບໍ່ຍອມຮັບຂໍ້ຮຽກຮ້ອງຂອງ ສ.ອາເມຣິກາ ຕໍ່ບັນຫາການເມືອງເວເນຊູເອລາ ໃນສະພາຄວາມໝັ້ນຄົງ UN


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube