ການາດາເລື່ອນພິຈາລະນາສົ່ງຕົວຜູ້ບໍລິຫານຫົວເຫວີ່ຍ ໃຫ້ແກ່ ສ.ອາເມຣິກາ

ສຳນັກຂ່າວຕ່າງປະເທດລາຍງານເມື່ອວັນທີ 29 ມັງກອນ 2019 ທີ່ຜ່ານມາວ່າ: ທ່ານ ນາງ ເມິ້ງ ຫວ່ານໂຈ ປະທານຄະນະຜູ້ບໍລິຫານດ້ານການເງິນຂອງຫົວເຫວີ່ຍ ເຊິ່ງເປັນລູກສາວຂອງທ່ານ ເຫຼິນ ເຈິ້ງເຟິຍ ຜູ້ສ້າງຕັ້ງບໍລິສັດຫົວເຫວີ່ຍ ເດີນທາງໄປຍັງສານສູງລັດບຣີຕິສໂກໂລມເບຍ ຕັ້ງຢູ່ເມືອງແວນດູເວີ ທາງພາກຕເວັນອອກຂອງການາດາ ເພື່ອລາຍງານຕົວ ແລະ ຮັບຟັງຂໍ້ມູນຈາກສານວ່າ ກະຊວງຍຸຕິທຳສະຫະລັດ ອາເມຣິກາໄດ້ສົ່ງຄຳຮ້ອງຢ່າງເປັນທາງການມາຍັງລັດຖະບານການາດາແລ້ວ ເພື່ອໃຫ້ພິຈາລະນາເນລະເທດທ່ານ ນາງ ໃຫ້ແກ່ລັດຖະບານສະຫະລັດ ອາເມຣິກາ ໃນຖານະຜູ້ຮ້າຍຂ້າມແດນ, ພາຍຫຼັງກ່ອນໜ້ານັ້ນພຽງ 1 ວັນ ທາງການສະຫະລັດ ອາເມຣິກາໄດ້ຖະແຫຼງການຮ້ອງຟ້ອງຄະດີອາຍາດ້ານການລະເມີດກົດໝາຍການເງິນຂອງສະຫະລັດ ອາເມຣິກາຕໍ່ຫົວເຫວີ່ຍ ແລະ ບໍລິສັດໃນເຄືອ 2 ແຫ່ງ ໂດຍມີທ່ານ ນາງ ເມິ້ງ ຫວ່ານໂຈ ເປັນຜູ້ຖືກກ່າວຫາຄົນສຳຄັນ.

ເຖິງຢ່າງໃດກໍ່ຕາມ, ສານແຈ້ງໃຫ້ທ່ານ ນາງ ເມິ້ງ ຫວ່ານໂຈ ຮູ້ວ່າ ຈະເລື່ອນກຳນົດການພິຈາລະນາຄຳຮ້ອງຂອງສະຫະລັດ ອາເມຣິກາ ຈາກກຳນົດການເດີມຄືວັນທີ 6 ກຸມພາ ນີ້ ໄປເປັນວັນທີ 6 ມີນາ ໂດຍຜູ້ພິພາກສາໃຫ້ເຫດຜົນວ່າ ເພື່ອໃຫ້ທັງຝ່າຍໂຈດ ແລະ ຈຳເລີຍ ມີເວລາກຽມຕົວຫຼາຍຂຶ້ນ, ເຊິ່ງເຈົ້າໜ້າທີ່ຂອງລັດຖະບານການາດາໄດ້ຈັບກຸມ ທ່ານ ນາງ ເມິ່ງ ຫວ່ານໂຈ ລະຫວ່າງລໍຖ້າປ່ຽນລຳຍົນທີ່ສະໜາມບິນສາກົນແວນດູເວີ ເມື່ອວັນທີ 1 ທັນວາ ປີທີ່ຜ່ານມາ ຕາມໝາຍຈັບຂອງລັດຖະບານສະຫະລັດ ອາເມຣິກາ, ໂດຍຈາກ 23 ຂໍ້ຫາທີ່ລັດຖະບານສະຫະລັດ ອາເມຣິກາຮ້ອງຟ້ອງນັ້ນ ລວມມືທັງການສໍ້ໂກງ, ການຈາລະກຳຂໍ້ມູນບໍລິສັດຄູ່ແຂ່ງ ແລະ ຂັດຂວາງຂະບວນການຍຸຕິທຳ ແຕ່ສານໃຫ້ທ່ານ ນາງ ໄດ້ຮັບການປະກັນຕົວພາຍໃຕ້ເງື່ອນໄຂທີ່ເຂັ້ມງວດເມື່ອວັນທີ 11 ທັນວາ ປີຜ່ານມາ ໂດຍທ່ານ ນາງ ໄດ້ວາງຫຼັກຊັບຄ້ຳປະກັນ 10 ລ້ານໂດລາການາດາ ພ້ອມໃສ່ອຸປະກອນອິເລັກໂຕນິກຕິດຕາມຕົວຕະຫຼອດເວລາ.

ໃນເວລາດຽວກັນ, ຄະນະຜູ້ແທນເຈລະຈາການຄ້າຊຸດໃຫຍ່ຈາກຈີນ ໄດ້ເດີນທາງເຖິງນະຄອນຫຼວງວໍຊິງຕັນ ນຳໂດຍທ່ານ ຫຼິວ ເຮີ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ອີ້ ກັງ ປະທານທະນາຄານປະຊາຊົນຈີນ ເຊິ່ງທ່ານ ວິນເບີ ຣອສ ລັດຖະມົນຕີກະຊວງການຄ້າຂອງສະຫະລັດ ອາເມຣິກາ ຫວັງວ່າຈີນຈະໄຈ້ແຍກບັນຫາການຄ້າ ກັບ ຫົວເຫວີ່ຍອອກຈາກກັນ ທ່າມກາງຄວາມບໍ່ພໍໃຈຢ່າງຍິ່ງຂອງທາງການຈີນ ທີ່ກ່າວວ່າສະຫະລັດ ອາເມຣິກາມີເຈດຕະນາກວາດລ້າງຫົວເຫວີ່ຍ.

– ລັດຖະບານ ສ.ອາເມຣິກາ ຟ້ອງຫົວເຫວີ່ຍ 23 ຂໍ້ຫາ ແລະ ພ້ອມຂໍຕົວຜູ້ບໍລິຫານຫົວເຫວີ່ຍຈາກການາດາ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube