ສານເວເນຊູເອລາ ຫ້າມຜູ້ນຳຝ່າຍຄ້ານ ທີ່ຕັ້ງຕົນເປັນຜູ້ນຳ ອອກນອກປະເທດທຸກກໍລະນີ

ສຳນັກຂ່າວຕ່າງປະເທດລາຍງານເມື່ອວັນທີ 29 ມັງກອນ 2019 ທີ່ຜ່ານມາວ່າ: ຄະນະຕຸລາການສານປະຊາຊົນສູງສຸດຂອງເວເນຊູເອລາ ມີຄຳພິພາສາເມື່ອວັນອັງຄານ ທີ່ຜ່ານມາ ໃຫ້ອາຍັດບັນຊີເງິນຝາກທັງໝົດຂອງທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດ ທີ່ປະກາດຕົນເມື່ອອາທິດທີ່ຜ່ານມາ ຂຶ້ນເປັນຜູ້ນຳຮັກສາການ ຄູ່ຂະໜານກັບທ່ານ ນິໂຄລັສ ມາດູໂຣ ປະທານປະເທດຄົນປັດຈຸບັນຂອງເວເນຊູເອລາ ແລະ ຫ້າມເດີນທາງອອກນອກປະເທດໃຫ້ທຸກກໍລະນີ ຈົນກວ່າຂະບວນການສືບສວນສອບສວນພຶດຕິກຳທີ່ເປັນໄພຕໍ່ຄວາມໝັ້ນຄົງ ແລະ ຄວາມສະຫງົບສຸກຂອງບ້ານເມືອງຈະສຳເລັດ, ຂະນະດຽວກັນທ່ານ ຮວນ ກວຍໂດ ອາຍຸ 35 ປີ ກ່າວວ່າມະຕິຂອງສານ ທີ່ອົງຄະນະທັງໝົດເປັນຝ່າຍສະໜັບສະໜູນທ່ານ ນິໂຄລັສ ມາດູໂຣ ບໍ່ແມ່ນສິ່ງທີ່ຕ້ອງແປກໃຈໃດໆກັບຄຳພິພາສາດັ່ງກ່າວ.

ເຖິງຢ່າງໃດກໍ່ຕາມ, ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການໃນເວລາດຽວກັນວ່າ ທ່ານ ຮວນ ກວຍໂດ ຖືເປັນຜູ້ມີອຳນາດອັນຊອບທຳ ໃນການຄຸ້ມຄອງບັນຊີເງິນຝາກ ແລະ ຊັບສິນທັງໝົດຂອງລັດຖະບານເວເນຊູເອລາ ທີ່ມີຢູ່ກັບສະຖາບັນການເງິນໃນສະຫະລັດ ອາເມຣິກາ, ຂະນະດຽວກັນລັດຖະບານສະຫະລັດ ອາເມຣິກາ ປະກາດເຕືອນໄພພົນລະເມືອງໃຫ້ຫຼີກລ້ຽງການເດີນທາງໄປຍັງເວເນຊູເອລາໃນໄລຍະນີ້ ເນື່ອງຈາກສະຖານະການຄວາມວຸ້ນວາຍທາງການເມືອງ ທີ່ມີລາຍງານວ່າຝ່າຍສະໜັບສະໜູນ ແລະ ຝ່າຍຕໍ່ຕ້ານລັດຖະບານກຽມຈັດການໂຮມຊຸມນຸມປະທ້ວງໃນອາທິດນີ້ ແລະ ຄົນອາເມຣິກາອາດຕົກເປັນເປົ້າໝາຍຂອງການຖືກຄວບຄຸມຕົວຕາມລຳພັງໃຈ ໂດຍການລັກພາຕົວເພື່ອຮຽກຄ່າໄຖ່.

US Vice President Mike Pence (R) and Venezuela’s Charge d’Affaires Carlos Alfredo Vecchio (C) step out of the West Wing following a meeting at the White House in Washington, DC, on January 29, 2019. (Photo by MANDEL NGAN / AFP)

ໃນດ້ານຂອງທ່ານ ຄາລອສ ເວກຊິໂອ ບຸກຄົນທີ່ທ່ານ ຮວນ ກວຍໂດ ແຕ່ງຕັ້ງໃຫ້ດຳລົງຕຳແໜ່ງອຸປະທູດເວເນຊູເອລາ ປະຈຳນະຄອນຫຼວງວໍຊິງຕັນ ເຂົ້າພົບທ່ານ ໄມ ເພນ ຮອງປະທານປະເທດສະຫະລັດ ອາເມຣິກາ, ໃນເວລາດຽວກັນ ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງປະຈຳທຳນຽບຂາວ ກ່າວຢ້ຳວ່າລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ ຈະຕ້ອງປະເຊີນກັບຜົນກະທົບອັນຮ້າຍແຮງ ຫາກທ່ານ ຮວນ ກວຍໂດ ແລະ ຄອບຄົວຕົກຢູ່ໃນອັນຕະລາຍ.

ອີກຢ່າງໜຶ່ງ, ມີຜູ້ສັງເກດເຫັນວ່າ ໃນລະຫວ່າງທີ່ທ່ານ ຈອນ ໂບຕັ້ນ ແລະ ທ່ານ ສະຕີບ ມະນູຊິນ ລັດຖະມົນຕີກະຊວງການເງິນ ຖະແຫຼງເລື່ອງການຂະຫຍາຍຂອບເຂດຂອງມາດຕະການຂວໍ້າບາດຕໍ່ບໍລິສັດ PDVSA ເຊິ່ງເປັນລັດວິສາຫະກິດພະລັງງານຂອງເວເນຊູເອລານັ້ນ ທ່ານ ຈອນ ໂບຕັ້ນ ຖືປຶ້ມບັນທຶກທີ່ມີຂໍ້ຄວາມວ່າ: “ທະຫານ 5,000 ຄົນໃນໂກໂລມບີ” ເຊິ່ງບໍ່ເປັນທີ່ຊັດເຈນວ່າ ເປັນຄວາມຕັ້ງໃຈຂອງທ່ານ ຈອນ ໂບຕັ້ນຫຼືບໍ່ ໃນການໃຫ້ນັກຂ່າວໄດ້ເຫັນຂໍ້ຄວາມດັ່ງກ່າວ ແຕ່ຫຼາຍຝ່າຍເຊື່ອວ່າສະຫະລັດ ອາເມຣິກາອາດຍັງບໍ່ເຖິງຂັ້ນໃຊ້ມາດຕະການທາງທະຫານຕໍ່ລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ ໃນອະນາຄົດອັນໃກ້ນີ້.

– ຂໍ້ຄວາມຫຼຸດ “ສ.ອາເມຣິກາ ຈະສົ່ງທະຫານ 5,000 ຄົນ” ປະກົບຊາຍແດນເວເນຊູເອລາ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube