ທາງການບຣາຊິນ ຈັບຜູ້ກວດກາເຕັກນິກເຂື່ອນທີ່ແຕກ ພ້ອມຢຶດ ແລະ ອາຍັດຊັບ 3 ກວ່າຕື້ໂດລາ

ສຳນັກຂ່າວຕ່າງປະເທດລາຍງານເມື່ອວັນທີ 29 ມັງກອນ 2018 ທີ່ຜ່ານມາວ່າ: ສຳນັກງານປ້ອງກັນໄພພົນລະເຮືອນໃນລັດມີນັສເຊໄຣ ທາງພາກຕາເວັນອອກສຽງໃຕ້ຂອງບຣາຊິນ ລາຍງານຈຳນວນຜູ້ເສຍຊີວິດຈາກໄພພິບັດເຂື່ອນແຕກ ເຊິ່ງເປັນເຂື່ອນກັກເກັບສິ່ງເສດເຫຼືອຈາກຂະບວນການສະກັດແຮ່ເຫຼັກ ທີ່ບໍ່ເຫຼັກເຟເຊົາ ເຊິ່ງເປັນບໍ່ເຫຼັກຂະໜາດໃຫຍ່ ເມື່ອວັນສຸກ ທີ່ຜ່ານມາ ສົ່ງຜົນໃຫ້ມວນນ້ຳ ແລະ ຕົມປະລິມານມະຫາສານທີ່ປົນເປື້ອນຫາງແຮ່ໄຫຼເຂົ້າໃສ່ຊົມຊຸມທີ່ຕັ້ງຢູ່ບໍລິເວນໃກ້ຄຽງ ວ່າຈຳນວນຜູ້ເສຍຊີວິດຢ່າງເປັນທາງການເພີ່ມຂຶ້ນເປັນຢ່າງໜ້ອຍ 84 ຄົນແລ້ວ, ສ່ວນຈຳນວນຜູ້ສູນຫາຍຕາມລາຍຊື່ມີ 276 ຄົນ ແຕ່ເຈົ້າໜ້າທີ່ຍອມຮັບວ່າຄວາມຫວັງທີ່ຈະພົບຢູ່ລອດຊີວິດຈາກຈຳນວນຜູ້ສູນຫາຍນັ້ນເກືອບບໍ່ມີແລ້ວ.

(Photo by Mauro PIMENTEL / AFP)

ຂະນະດຽວກັນ, ເຈົ້າໜ້າກໍ່ໄດ້ຈັບກຸມຜູ້ກ່ຽວຂ້ອງ 5 ຄົນ ໃນຈຳນວນນີ້ 3 ຄົນເປັນພະນັກງານຂອງບໍລິສັດວາເລ ບໍລິສັດບໍ່ແຮ່ເຫຼັກລາຍໃຫຍ່ທີ່ສຸດຂອງໂລກ, ສ່ວນອີກ 2 ຄົນເປັນພະນັກງານຂອງບໍລິສັດ TUEV SUED ທີ່ມີສຳນັກງານໃຫຍ່ຢູ່ເມືອງມິວນິກ ປະເທດເຢຍລະມັນ ແລະ ເຮັດໜ້າທີ່ກວດສອບຄວາມປອດໄພຂອງເຂື່ອນທີ່ເກີດເຫດ ແຕ່ລາຍງານຍັງບໍ່ໄດ້ລະບຸຊັດເຈນວ່າພະນັກງານຂອງ TUEV SUED ທີ່ຖືກຈັບນັ້ນເປັນເຈົ້າໜ້າທີ່ຂອງສຳນັກງານໃຫຍ່ໃນເຢຍລະມັນ ຫຼື ຈາກສາຂາໃນບຣາຊິນ ແລະ ພະນັກງານຂອງວາເລທີ່ຖືກຈັບນັ້ນເປັນເຈົ້າໜ້າທີ່ລະດັບໃດ.

ໃນດ້ານຂອງບໍລິສັດວາເລ ປະກາດຢຸດຕິການຂຸດຄົ້ນຢູ່ບໍ່ແຮ່ 10 ແຫ່ງ ແລະ ທຳລາຍສິ່ງປຸກສ້າງທັງໝົດທີ່ອາດມີຄວາມສ່ຽງກໍ່ໃຫ້ເກີດເຫດການແບບດຽວກັນທີ່ບໍ່ເຫຼັກເຟເຊົາ, ນອກຈາກນີ້ ບໍລິສັດຈະຮັບຜິດຊອບຕໍ່ຄວາມເສຍຫາຍດ້ານສິ່ງແວດລ້ອມທີ່ເກີດຂຶ້ນໃນໄລຍະຕໍ່ໜ້າ ທີ່ລວມເຖິງຊາກປາຈຳນວນມະຫາສານຕະຫຼອດເສັ້ນທາງ 18 ກິໂລແມັດຂອງແມ່ນ້ຳປາເຣົາເປບາ ເຊິ່ງຢູ່ກ້ອງເຂື່ອນ ໂດຍທຸກຝ່າຍເຊື່ອວ່າການຕາຍຂອງປາເຫຼົ່ານີ້ເປັນຜົນມາຈາກສານພິດທີ່ມາກັບມວນນ້ຳ ແລະ ຕົມຈາກເຂື່ອນ.

ເຊິ່ງສຳນັກງານໄອຍະການແຫ່ງລັດມີນັສເຊໄຣ ກໍ່ໄດ້ສັ່ງໃຫ້ອາຍັດເງິນ ແລະ ຊັບສິນຂອງບໍລິສັດວາເລແລ້ວ 3,000 ກວ່າລ້ານໂດລາສະຫະລັດ ເພື່ອເປັນຄ່າຊົດເຊີຍຄວາມເສຍຫາຍທັງໝົດໃນເບື້ອງຕົ້ນ ແລະ ລັດຖະບານບຣາຊິນກໍ່ໄດ້ສັ່ງໃຫ້ປັບໃໝ ແລະ ຢຶດຊັບສິນຂອງບໍລິສັດວາເລອີກຢ່າງໜ້ອຍ 92.5 ລ້ານໂດລາສະຫະລັດ ເນື່ອງຈາກໄພພິບັດຄັ້ງນີ້ ເກີດຂຶ້ນຍັງບໍ່ເຖິງ 4 ປີເຕັມ ພາຍຫຼັງເຫດເຂື່ອນໃນບໍ່ແຮ່ຂະໜາດໃຫຍ່ອີກແຫ່ງໜຶ່ງຂອງບໍລິສັດວາເລ ທີ່ຕັ້ງຢູ່ໃນລັດມີນັສເຊໄຣເຊັ່ນກັນ ແຕກເມື່ອເດືອນພະຈິກ 2015 ສົ່ງຜົນໃຫ້ມີຜູ້ເສຍຊີວິດ 19 ຄົນ.

(Photo by Mauro Pimentel / AFP)

(Photo by DOUGLAS MAGNO / AFP)

(Photo by Mauro PIMENTEL / AFP)


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube