ຈີນ-ສ.ອາເມຣິກາ ປຶກສາບັນຫາສົງຄາມການຄ້າອີກຄັ້ງ ກ່ອນຄົບ 90 ວັນສະຫງົບເສິກ

(Photo by Jim WATSON / AFP)

ສຳນັກຂ່າວຕ່າງປະເທດລາຍງານເມື່ອວັນທີ 30 ມັງກອນ 2019 ທີ່ຜ່ານມາວ່າ: ທ່ານ ໂຣເບິດ ໄລທິເຊິ ຜູ້ແທນເຈລະຈາການຄ້າຂອງສະຫະລັດ ອາເມຣິກາ ໃຫ້ການຕ້ອນຮັບຄະນະຜູ້ແທນຈາກລັດຖະບານຈີນລວມ 30 ທ່ານ ນຳໂດຍທ່ານ ຫຼິວ ເຮີ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ແລະ ອີ້ ກັງ ປະທານທະນາຄານປະຊາຊົນຈີນ ພົບປະຫາລືກັນທີ່ອາຄານໄອເຊນຮາວ ໃນນະຄອນຫຼວງວໍຊິງຕັນ ເມື່ອວັນພຸດ ທີ່ຜ່ານມາ.

(Photo by Jim WATSON / AFP)

ເຖິງຢ່າງໃດກໍ່ຕາມ, ມີລາຍງານວ່າບັນຍາກາດໃນຫ້ອງດຳເນີນໄປຢ່າງເຄັ່ງຂຶມ ຕັ້ງແຕ່ຕອນຖ່າຍຮູບລວມກ່ອນເລີ່ມການປະຊຸມ ເຊິ່ງຄະນະຜູ້ແທນຈາກຈີນລວມທັງລ່າມນັ່ງລຽງແຖວກັນຢ່າງສະຫງົບ ໂດຍບໍ່ມີໃຜເວົ້າຫຍັງເລີຍ ຈົນທ່ານ ໂຣເບິດ ໄລທິເຊິເປັນຝ່າຍເລີ່ມຕົ້ນກ່ອນ ດ້ວຍການກ່າວວ່າການຈັດໂຕະ ແລະ ບ່ອນນັ່ງລຽງຕຳແໜ່ງຂອງເຈົ້າໜ້າທີ່ແຕ່ລະຄົນຂອງທັງສອງຝ່າຍໃນຄັ້ງນີ້ ໃກ້ຄຽງກັບການພົບປະຫາລືລະຫວ່າງທ່ານ ສີ ຈິ້ນຜິງ ກັບທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລະຫວ່າງການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ນະຄອນຫຼວງບົວໂນສໄອເຣສ ເມື່ອວັນທີ 1 ທັນວາ ປີທີ່ຜ່ານມາ, ເຊິ່ງບໍ່ມີລາຍງານວ່າຝ່ານຈີນຕອບຮັບກັບຄຳເວົ້າດັ່ງກ່າວຂອງຝ່າຍສະຫະລັດ ອາເມຣິກາຫຼືບໍ່.

(Photo by Jim WATSON / AFP)

ຂະນະທີ່ທ່ານ, ສະຕີບ ມະນູຊິນ ລັດຖະມົນຕີກະຊວງການເງິນ ແລະ ທ່ານ ວິນເບີ ຣອສ ລັດຖະມົນຕີກະຊວງການຄ້າສະຫະລັດ ອາເມຣິກາ ກ່າວຈຸດປະສົງສຳຄັນທີ່ລັດຖະບານສະຫະລັດ ອາເມຣິກາເຊີນຄະນະຜູ້ແທນຈີນໃຫ້ມາຢ້ຽມຢາມນະຄອນຫຼວງວໍຊິງຕັ້ນໃນຄັ້ງນີ້ ຄືການປຶກສາຫາລືເພື່ອຜ່ອນຄາຍຄວາມຂັດແຍ່ງທາງການຄ້າທີ່ຍັງຄົງຄ້າງຮ່ວມກັນ ແລະ ເຫຼືອເວລາອີກພຽງ 1 ເດືອນ ກ່ອນຄົບຂໍ້ຕົກລົງສະຫງົບເສິກການຄ້າ 90 ວັນທີ່ຜູ້ນຳຂອງທັງສອງປະເທດໄດ້ຕົກລົງກັນໄວ້ໃນລະຫວ່າງການປະຊຸມ G20.

ເຖິງຢ່າງໃດກໍ່ຕາມ, ການປຶກສາຫາລືຄັ້ງນີ້ ເກີດຂຶ້ນພຽງ 48 ຊົ່ວໂມງ ພາຍຫຼັງທີ່ກະຊວງຍຸຕິທຳສະຫະລັດ ອາເມຣິກາ ປະກາດດຳເນີນຄະດີອາຍາ ກ່ຽວກັບອາຊະຍາກຳທາງການເງິນຫຼາຍເຖິງ 23 ຂໍ້ຫາ ຕໍ່ບໍລິສັດຫົວເຫວີ່ຍ ພ້ອມບໍລິສັດໃນເຄືອອີກ 2 ແຫ່ງ ແລະ ທ່ານ ນາງ ເມິ້ງ ຫວ່ານໂຈ ຜູ້ບໍລິຫານລະດັບສູງ ພ້ອມທັງເປັນລູກສາວຂອງທ່ານ ເຫຼິນ ເຈິ້ງເຟິຍ ຜູ້ສ້າງຕັ້ງບໍລິສັດຫົວເຫວີ່ຍອີກດ້ວຍ.

– ການາດາເລື່ອນພິຈາລະນາສົ່ງຕົວຜູ້ບໍລິຫານຫົວເຫວີ່ຍ ໃຫ້ແກ່ ສ.ອາເມຣິກາ

– ສ.ອາເມຣິກາ ແລະ ຈີນ ຢຸດຕິສົງຄາມການຄ້າລະຫວ່າງກັນເປັນເວລາ 90 ວັນ