ສ.ອາເມຣິກາ ພໍໃຈຕໍ່ຜົນການເຈລະຈາສົງຄາມການຄ້າຮອບໃໝ່ກັບຈີນ

US President Donald Trump meets with China's Vice Premier Liu He (L) at the White House on January 31, 2019 in Washington, DC. (Photo by Brendan Smialowski / AFP)

ສຳນັກຂ່າວຕ່າງປະເທດລາຍງານເມື່ອວັນທີ 31 ມັງກອນ 2019 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ປຶກສາຫາລືກັບທ່ານ ຫຼິວ ເຮີ ຮອງນາຍົກລັດຖະມົນຕີຈີນ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ທີ່ທຳນຽບຂາວ ໂດຍທ່ານ ຫຼິວ ເຮີ ໄດ້ມອບຈົດໝາຍຈາກຜູ້ນຳຈີນໃຫ້ແກ່ທ່ານ ໂດໂນ ທຣຳ ເຊິ່ງທຳນຽບາຂາວເປີດເຜີຍເນື້ອໃນຕອນໜຶ່ງທີ່ມີໃຈຄວາມວ່າ ສາຍພົວພັນລະຫວ່າງທັງສອງປະເທດຢູ່ໃນໄລຍະສຳຄັນ ແລະ ລັດຖະບານຈີນຫວັງເປັນຢ່າງຍິ່ງວ່າການຮ່ວມມືລະຫວ່າງກັນຈະຕັ້ງຢູ່ບົນພື້ນຖານຂອງການໃຫ້ກຽດເຊິ່ງກັນ ແລະ ກັນ.

US President Donald Trump speaks to China’s Vice Premier Liu He before a meeting between US and Chinese officials in the Oval Office of the White House January 31, 2019 in Washington, DC. (Photo by Brendan Smialowski / AFP)

ທ່ານ ໂດໂນ ທຣຳ ກ່າວອີກວ່າ ທ່ານຫວັງວ່າຈະໄດ້ມີໂອກາດໃນການພົບປະຫາລືກັບຜູ້ນຳຈີນກ່ອນຄົບກຳນົດຂໍ້ຕົກລົງສະຫງົບເສິກການຄ້າ 90 ວັນ ພາຍໃນວັນທີ 1 ມີນາ 2019 ນີ້, ເຖິງແມ່ນວ່າທ່ານ ຫຼິວ ເຮີ ຍັງບໍ່ໄດ້ສະແດງທ່າທີຕໍ່ຄຳກ່າວຂອງຜູ້ນຳສະຫະລັດ ອາເມຣິກາ ແຕ່ທ່ານ ໂຣເບິດ ໄລທິເຊີ ຜູ້ແທນເຈລະຈາການຄ້າຂອງລັດຖະບານສະຫະລັດ ອາເມຣິກາ ພ້ອມທ່ານ ສະຕີບ ມະນູຊິນ ລັດຖະມົນຕີກະຊວງການເງິນສະຫະລັດ ອາເມຣິກາ ຈະເດີນທາງຢ້ຽມຢາມນະຄອນຫຼວງປັກກິ່ງພາຍໃນຕົ້ນເດືອນນີ້, ຂະນະທີ່ຕໍ່ຈາກນັ້ນທ່ານ ໂດໂນ ທຣຳ ກ່າວວ່າລັດຖະບານຈີນຈະກັບມາຮັບຊື້ຖົ່ວເຫຼືອງໃນປະລິມານ 5 ລ້ານໂຕນຕໍ່ວັນ ເຊິ່ງເປັນເລື່ອງທີ່ດີ ແລະ ໜ້າຊົມເຊີຍ.

ເຖິງຢ່າງໃດກໍ່ຕາມ, ທຳນຽບຂາວອອກຖະແຫຼງການຊີ້ແຈ້ງໃນເວລາຕໍ່ມາວ່າ ຈິງຢູ່ທີ່ຈີນຈະເລີ່ມກັບມານຳເຂົ້າຖົ່ວເຫຼືອງຈາກສະຫະລັດ ອາເມຣິກາແລ້ວ ແຕ່ຍັງບໍ່ແມ່ນການຊື້ທຸກວັນ ແລະ ຍັງບໍ່ມີການກຳນົດກອບໄລຍະເວລາທີ່ຊັດເຈນວ່າຈະເລີ່ມເມື່ອໃດ, ເຊິ່ງຈີນກໍ່ໄດ້ສັ່ງຊື້ຖົ່ວເຫຼືອງຈາກສະຫະລັດ ອາເມຣິກາແລ້ວ 1.13 ລ້ານໂຕນ ພາຍໃນເວລາບໍ່ດົນ ຫຼັງຈາກການພົບປະຫາລືລະຫວ່າງຜູ້ນຳຂອງທັງສອງປະເທດ ໃນລະຫວ່າງການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ນະຄອນຫຼວງບົວໂນສໄອເຣສ ເມື່ອວັນທີ 1 ທັນວາ ປີທີ່ຜ່ານມາ, ເຊິ່ງເປັນມື້ເລີ່ມຕົ້ນຂອງສັນຍາສະຫງົບເສິກການຄ້າ.

ໃນດ້ານຂອງທ່ານ ໂຣເບິດ ໄລທິເຊີ ກ່າວວ່າການເຈລະຈາຜ່ອນຄາຍຄວາມຂັດແຍ່ງທາງການຄ້າລະຫວ່າງສະຫະລັດ ອາເມຣິກາກັບຈີນ ຍັງຕ້ອງໃຊ້ເວລາອີກດົນ ເພາະຍັງມີອີກຫຼາຍຂັ້ນຕອນ ແຕ່ທ່ານຢືນຢັນວ່າການພົບປະຫາລືຄັ້ງຫຼ້າສຸດນີ້ ມີຄວາມຄືບໜ້າຫຼາຍ, ເຖິງຢ່າງໃດກໍ່ຕາມ ທ່ານ ຫຼິວ ເຮີ ແລະ ຄະນະບໍ່ໄດ້ໃຫ້ສຳພາດກັບສື່ຂອງສະຫະລັດ ອາເມຣິກາໂດຍກົງແຕ່ຢ່າງໃດ.

– ຈີນ-ສ.ອາເມຣິກາ ປຶກສາບັນຫາສົງຄາມການຄ້າອີກຄັ້ງ ກ່ອນຄົບ 90 ວັນສະຫງົບເສິກ

– ສ.ອາເມຣິກາ ແລະ ຈີນ ຢຸດຕິສົງຄາມການຄ້າລະຫວ່າງກັນເປັນເວລາ 90 ວັນ