ສ.ອາເມຣິກາ ປະກາດຖອນຕົວຈາກຂໍ້ຕົກລົງນິວເຄຼຍກັບລັດເຊຍຢ່າງທາງການ

ສຳນັກຂ່າວຕ່າງປະເທດລາຍງານເມື່ອວັນທີ 1 ກຸມພາ 2019 ທີ່ຜ່ານມາວ່າ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ຖະແຫຼງເລື່ອງການຖອນຕົວອອກຈາກການເປັນພາຄີຂອງສົນທິສັນຍາອາວຸດນິວເຄຼຍພິໄສກາງ (INF) ຮ່ວມກັບລັດເຊຍຢ່າງເປັນທາງການ ໂດຍທ່ານ ໄມ ພອມແພວ ກ່າວວ່າລັດຖະບານສະຫະລັດ ອາເມຣິກາໄດ້ແຈ້ງໄປຍັງລັດເຊຍຫຼາຍກວ່າ 30 ຄັ້ງ ໃຫ້ຝ່າຍລັດເຊຍປ່ຽນແປງພຶດຕິກຳ ເພື່ອຫຼຸດຜ່ອນຄວາມສ່ຽງດ້ານຄວາມໝັ້ນຄົງແກ່ທັງສະຫະລັດ ອາເມຣິກາ ແລະ ພັນທະມິດໃນເອີຣົບ ດ້ວຍເຫດນີ້, ສະຫະລັດ ອາເມຣິກາຈຶ່ງຈຳເປັນຕ້ອງຮັກສາຄຳເວົ້າຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາທີ່ໄດ້ປະກາດເມື່ອເດືອນຕຸລາ ປີທີ່ຜ່ານມາ ນັ້ນຄືການຖອນຕົວອອກຈາກ INF ເຊິ່ງຈະມີຜົນຢ່າງເປັນທາງການພາຍໃນໄລຍະເວລາ 6 ເດືອນຕໍ່ຈາກນີ້.

ເຊິ່ງທ່ານ ໄມ ພອມແພວ ກ່າວເມື່ອເດືອນທັນວາ ປີທີ່ຜ່ານມາວ່າ ສະຫະລັດ ອາເມຣິກາ ພ້ອມປ່ຽນໃຈທີ່ຈະບໍ່ຖອນຕົວອອກຈາກ INF ຫາກລັດເຊຍຢຸດຕິໂຄງການພັດທະນາຂີປນະາວຸດນຳວິຖີຈາກພື້ນສູ່ພື້ນ ພາຍໃຕ້ລະຫັດ SSC-8 ຫຼື 9M729 ເຊິ່ງເປັນໂຄງການພັດທະນາອາວຸດລຸ້ນໃໝ່ຂອງລັດເຊຍ ທີ່ມີລັດສະໜີການຍິງເກີນກວ່າທີ່ລະບຸໄວ້ໃນ INF ເຊິ່ງເປັນສົນທິສັນຍາທີ່ທັງສອງປະເທດໄດ້ຮ່ວມກັນລົງນາມເມື່ອເດືອນທັນວາ 1987 ຫຼື ໃນໄລຍະທ້າຍຂອງສົງຄາມເຢັນ ມີເນື້ອໃນສຳຄັນຄືການຫ້າມທັງສອງປະເທດພັດທະນາຂີປະນາວຸດທີ່ມີໄລຍະການຍິງເກີນກວ່າລະບຸໄວ້ຕາມຂໍ້ຕົກລົງ ຄືລະຫວ່າງ 500-5,500 ກິໂລແມັດ.

ຂະນະທີ່ ອົງການສົນທິສັນຍາອາກລັງຕິກເໜືອ (NATO) ກໍ່ໄດ້ອອກຖະແຫຼງການມີເນື້ອໃນລັກສະນະສະໜັບສະໜູນສະຫະລັດ ອາເມຣິກາ ແລະ ຮຽກຮ້ອງໃຫ້ລັດເຊຍໃຊ້ຊ່ວງໄລຍະເວລາ 6 ເດືອນນີ້ຍົກເລີກໂຄງການພັດທະນາຂີປະນາວຸດ ທີ່ລະເມີດຂໍ້ຕົກລົງ INF ຖ້າບໍ່ດັ່ງນັ້ນລັດເຊຍຕ້ອງຮັບຜິດຊອບ ໃນຖານະເປັນຜູ້ທຳລາຍສົນທິສັນຍາສະບັບດັ່ງກ່າວ.

ໃນດ້ານຂອງທ່ານ ເດິມິຕຣີ ເປສຄັອບ ໂຄສົກທຳນຽບເຄຼມລິນ (ທຳນຽບປະທານປະເທດລັດເຊຍ) ກ່າວວ່າທ່າທີຂອງສະຫະລັດ ອາເມຣິກາ ບໍ່ແມ່ນສິ່ງທີ່ເໜືອຄວາມຄາດໝາຍ ແຕ່ລັດເຊຍຜິດຫວັງເປັນຢ່າງຍິ່ງ ທີ່ສະຫະລັດ ອາເມຣິກາບໍ່ໃຫ້ການຮ່ວມມືຢ່າງພຽງພໍໃນການເຈລະຈາ ເພື່ອຫຼີກລ້ຽງຜົນລັບດັ່ງກ່າວ ແລະ ເຕືອນວ່າການຖອນຕົວຂອງສະຫະລັດ ອາເມຣິກາ ຈະຍິ່ງເປັນຈຸດເລີ່ມຕົ້ນຂອງການແຂ່ງຂັນກັນສະສົມອາວຸດລະຫວ່າງປະເທດ.