ລັດເຊຍປະກາດຖອນຕົວຈາກ INF ຕອບໂຕ້ ສ.ອາເມຣິກາ ພ້ອມຜະລິດອາວຸດຫາກຝ່າຍກົງຂ້າມຜະລິດ

Russia's President Vladimir Putin (C) attends a meeting with Russia's Foreign Minister Sergei Lavrov (L) and Defence Minister Sergei Shoigu in Moscow on February 2, 2019. - (Photo by Alexey NIKOLSKY / Sputnik / AFP)

ສຳນັກຂ່າວຕ່າງປະເທດລາຍງານເມື່ອວັນທີ 2 ກຸມພາ 2019 ທີ່ຜ່ານມາວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ຖະແຫຼງວ່າ: ໃນເມື່ອສະຫະລັດ ອາເມຣິກາໄດ້ຖອນຕົວອອກຈາກການເປັນພາຄີຂອງສົນທິສັນຍາອາວຸດນິວເຄຼຍພິໄສກາງ (INF) ທີ່ໃຊ້ຮ່ວມກັນມາດົນກວ່າ 30 ປີຢ່າງເປັນທາກງານ, ລັດຖະບານລັດເຊຍຈຶ່ງຂໍໃຊ້ໂອກາດນີ້ປະກາດແບບດຽວກັນນັ້ນ ແລະ ກ່າວອີກວ່າ: ຕໍ່ຈາກນີ້ເປັນຕົ້ນໄປລັດຖະບານລັດເຊຍຈະພັດທະນາໂຄງການຂີປະນາວຸດພິໄສກາງລຸ້ນໃໝ່ ເພື່ອກຽມຮັບມືກັບໂຄງການແບບດຽວກັນຂອງສະຫະລັດ ອາເມຣິກາ.

ເຖິງຢ່າງໃດກໍ່ຕາມ, ທ່ານ ປູຕິນ ຢືນຢັນວ່າ ລັດເຊຍບໍ່ໄດ້ຕ້ອງການກັບເຂົ້າສູ່ສະໜາມການແຂ່ງຂັນດ້ານອາວຸດ ແລະ ຫວັງເປັນຢ່າງຍິ່ງວ່າປະເທດຄູ່ສັນຍາຈະມີເຫດຜົນພຽງພໍ ໃນການກັບມາເຈລະຈາບັນຫາສຳຄັນດັ່ງກ່າວ ເຊິ່ງສົ່ງຜົນກະທົບເຊື່ອມໂຍງເຖິງທຸກຝ່າຍໃນໂລກ, ຂະນະທີ່ທ່ານ ດີມິຕຣີ ເມດເວເດບ ນາຍົກລັດຖະມົນຕີລັດເຊຍ ກ່າວເສີມວ່າ: ການຖອນຕົວຂອງລັດຖະບານສະຫະລັດ ອາເມຣິກາອອກຈາກ INF ນັ້ນເປັນການກະທຳຕາມລຳພັງໃຈແຕ່ພຽງຝ່າຍດຽວ ແລະ ຢືນຢັນວ່າລັດເຊຍຈະບໍ່ມີທາງຕິດກັບດັກຂອງສະຫະລັດ ອາເມຣິກາ ແຕ່ຈະບໍ່ນິ້ງນອນໃຈຕໍ່ສະຖານະການດັ່ງກ່າວ ທີ່ຈະເຮັດໃຫ້ສະຖຽນລະພາບດ້ານຄວາມໝັ້ນຄົງຂອງໂລກຕ້ອງສັ່ນສະເທືອນ.

US Secretary of State Mike Pompeo speaks at a press briefing in the State Department in Washington, DC, on February 1, 2019. – Pompeo announced that the US will withdraw from the Intermediate-Range Nuclear Forces Treaty with Russia (Photo by Eric BARADAT / AFP)

ໃນດ້າຂອງຈີນ ເຊິ່ງບໍ່ໄດ້ຮ່ວມເປັນພາຄີຂອງ INF ຕັ້ງແຕ່ເລີ່ມຕົ້ນ ແຕ່ຖືກລັດຖະບານສະຫະລັດ ອາເມຣິກາກ່າວພາດພິງຫຼາຍຄັ້ງໃນໄລຍະຫຼັງມານີ້ ອອກຖະແຫຼງການຮຽກຮ້ອງໃຫ້ສະຫະລັດ ອາເມຣິກາ ແລະ ລັດເຊຍຮ່ວມກັນຫາທາງອອກຕໍ່ບັນຫາດັ່ງກ່າວຢ່າງສັນຕິ ເພື່ອສັນຕິສຸກຂອງທຸກຝ່າຍ, ເຊິ່ງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ປະກາດເມື່ອວັນສຸກທີ່ຜ່ານມາວ່າ: ລັດຖະບານສະຫະລັດ ອາເມຣິກາຂໍຖອນຕົວອອກຈາກ INF ຕາມຄຳກ່າວຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ເມື່ອຕົ້ນເດືອນຕຸລາ ປີທີ່ຜ່ານມາ ເຊິ່ງຈະມີຜົນຢ່າງເປັນທາງການພາຍໃນໄລຍະເວລາ 6 ເດືອນຕໍ່ຈາກນີ້ເປັນຕົ້ນໄປ ເນື່ອງຈາກລັດຖະບານລັດເຊຍເປັນຝ່າຍລະເມີດຂໍ້ຕົກລົງກ່ອນ.

ເຊິ່ງສົນທິສັນຍາ INF ເປັນສົນທິສັນຍາດ້ານຄວາມໝັ້ນຄົງທີ່ທັງສອງປະເທດລົງນາມຮ່ວມກັນ ໂດຍຜູ້ນຳສະຫະລັດ ອາເມຣິກາໃນຕອນນັ້ນຄືທ່ານ ໂຣໂນ ເຣແກນ ແລະ ຜູ້ນຳລັດເຊຍຄືທ່ານ ມິຄາອິວ ກໍບາຊັອບ ເມື່ອເດືອນທັນວາ 1987 ເຊິ່ງເປັນໄລຍະທ້າຍຂອງສົງຄາມເຢັນ ມີເນື້ອໃນສຳຄັນຄືການຫ້າມທັງສອງປະເທດພັດທະນາຂີປະນາວຸດທີ່ມີພິໄສ (ໄລຍະການຍິງ) ເກີນກວ່າລະບຸໄວ້ຕາມຂໍ້ຕົກລົງຄື ລະຫວ່າງ 500-5,500 ກິໂລແມັດ.