ຈີນປາບປາມພວກໃຊ້ອິດທິພົນຄອງເມືອງ ພ້ອມຈັບກຸມເຈົ້າໜ້າທີ່ລັດທີ່ເປັນລູກແຫຼ້ງຕີນມື

ສຳນັກຂ່າວຕ່າງປະເທດລາຍງານເມື່ອວັນທີ 2 ກຸມພາ 2019 ທີ່ຜ່ານມາວ່າ: ລັດຖະບານຈີນໄດ້ອອກຄຳສັ່ງໄປຍັງ 10 ເຂດທົ່ວປະເທດ ໃຫ້ດຳເນີນການກວາດລ້າງແກ້ງອາຊະຍາກຳ ແລະ ກຸ່ມອິດທິພົນມືດ ຫຼັງຈາກເຈົ້າໜ້າທີ່ຈາກສູນກາງໄປລົງຕິດຕາມກວດກາ ໂດຍໃຊ້ເວລາກວ່າ 3 ເດືອນ ຈົນເຖິງເດືອນທັນວາ ປີທີ່ຜ່ານມາ.

ໃນເຂດທີ່ມີຜູ້ຕັ້ງຕົນເປັນຜູ້ມີອິດທິພົນຈຳນວນຫຼາຍ ລວມມີຫຼາຍມົນທົນອຸດສາຫະກຳໜັກທາງພາກເໜືອເຊັ່ນ: ສານຊີ ແລະ ຫຼຽວໜິງ ລວມທັງມົນທົນສູນກາງໂຮງງານຜະລິດເຊັ່ນ: ກວາງຕຸ້ງ ໃນພາກຕາເວັນອອກສຽງໃຕ້ ໃກ້ກັບເຂດບໍລິຫານພິເສດຮົງກອງ.

ໃນ 10 ເຂດເຈົ້າໜ້າທີ່ໄດ້ປາບປາມແກ້ງອາຊະຍາກຳມາເຟຍ 1,119 ແກ້ງ, ຢຶດງິນ ແລະ ຊັບສິນຕ່າງໆເຂົ້າເປັນຂອງລັດ ລວມມູນຄ່າ 4,940 ລ້ານຢວນ.

ປະຕິບັດການກວາດລ້າງດັ່ງກ່າວ, ຍັງເນັ້ນໃຫ້ຖອນເຖິງຮາກເຖິງເຫງົ້າ ເຈົ້າໜ້າທີ່ລັດຂັ້ນທ້ອງຖິ່ນ ທັງຝ່າຍປົກຄອງ ແລະ ຕຳຫຼວດ ທີ່ທາງການຈີນຮຽກວ່າ ຮົ່ມປົກປ້ອງ (Protective Umbrellas) ທີ່ເມີນເສີຍຕໍ່ການກະທຳຜິດຂອງກຸ່ມແກ້ງເຫຼົ່ານັ້ນ ຫຼື ມີສ່ວນຮ່ວມກັບອາຊະຍະກຳຕ້ອງຖືກປາບປາມ.

ສຳນັກຂ່າວຊິນຫົວຂອງທາງການຈີນລາຍງານວ່າ ການກວາດລ້າງໃນມົນທົນເຫີນານ ເຈົ້າໜ້າທີ່ກວາດລ້າງແກ້ງໃຫຍ່ມາເຟຍ ທີ່ເຮັດທຸລະກິດລົດແທັກຊີໂດຍສານ ແລະ ລົດບັນທຸກສິ່ງຜິດກົດໝາຍ, ມົນທົນຊານຕົງ ມີເຈົ້າພໍ່ມາເຟຍລະດັບບ້ານເປັນຈຳນວນຫຼາຍ, ສ່ວນມົນທົນຝູຈ້ຽນ ມີການຟອກເງິນລົງທຶນ ຈາກການຊື້ຂາຍອະສັງຫາລິມະຊັບທີ່ຜິດກົດໝາຍ.

ການກວາດລ້າງຜູ້ມີອິດທິພົນ ເປັນສ່ວນໜຶ່ງຂອງປະຕິບັດການກວາດລ້າງອາຊະຍາກຳເຊັ່ນ: ຢາເສບຕິດ, ໂສເພນີ ແລະ ການສໍ້ລາດບັງຫຼວງໃນທົ່ວປະເທດຂອງຈີນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube