ນັກການເມືອງໄວໜຸ່ມ ອາຍຸ 37 ຊະນະການເລືອກຕັ້ງກ້າວຂຶ້ນເປັນປະທານປະເທດແອນຊານວາດໍ

ສຳນັກຂ່າວຕ່າງປະເທດລາຍງານ 4 ກຸມພາ 2019 ວ່າ: ຜົນຢ່າງບໍ່ເປັນທາງການຂອງການເລືອກຕັ້ງປະທານປະເທດແອນຊານວາດໍ ເຊິ່ງຈັດຂຶ້ນເມື່ອວັນອາທິດ ທີ່ຜ່ານມາ ປາກົດວ່າທ່ານ ນາຢິບ ບູເຄເລ ອະດີດເຈົ້າຄອງນະຄອນຫຼວງຊານວາດໍ ລະຫວ່າງປີ 2015-2018 ຕົວແທນຈາກພັກພັນທະມິດການເມືອງສາຍກາງ-ຂວາ ໄດ້ຮັບຄະແນນສຽງຫຼາຍທີ່ສຸດ 53.5% ຫຼື ປະມານ 1.3 ລ້ານຄະແນນ ຫ່າງອັນດັບ 2 ທ່ານ ຄາລອສ ກັນເລຈາ ຕົວແທນພັກອາຣີນາ ເຊິ່ງເປັນຝ່າຍຂວາ ໄດ້ຄະແນນສຽງ 31.6% ຫຼື ປະມານ 7.76 ແສນຄະແນນ.

(Photo by Luis ACOSTA / AFP)

ຂະນະທີ່ທ່ານ ຮູໂກ ມາຕິເນສ ທາຍາດທາງການເມືອງຂອງທ່ານ ຊານເຊສ ເຊເຣນ ປະທານປະເທດແອນຊານວາດໍ ໃນນາມພັກ FMLN ເຊິ່ງເປັນພັກຝ່າຍຊ້າຍ ໄດ້ຄະແນນສຽງສະໜັບສະໜູນພຽງ 14% ຫຼື ປະມານ 3.45 ແສນຄະແນນ ມາເປັນອັນດັບ 3, ການທີ່ທ່ານ ນາຢິບ ບູເຄເລ ໄດ້ຄະແນນສຽງສະໜັບສະໜູນເກີນ 50% ຕັ້ງແຕ່ການເລືອກຕັ້ງຮອບທຳອິດ ໝາຍຄວາມວ່າບໍ່ຈຳເປັນຕ້ອງມີການເລືອກຕັ້ງຮອບຕັດສິນ ຫຼື ຊອບຊິງດຳອີກຕໍ່ໄປ ແລະ ທ່ານ ນາຢິບ ບູເຄເລຈະສ້າງປະຫວັດສາດຍຸກໃໝ່ເປັນປະທານປະເທດທີ່ມີອາຍຸນ້ອຍທີ່ສຸດຂອງແອນຊານວາດໍ ດ້ວຍອາຍຸພຽງ 37 ປີ ແລະ ມີກຳນົດສາບານຕົນຮັບຕຳແໜ່ງຢ່າງເປັນທາງການໃນວັນທີ 1 ມິຖຸນາ 2019 ນີ້.

ນອກຈາກນີ້, ທ່ານ ນາຢິບ ບູເຄເລາ ຍັງຈະຖືເປັນຜູ້ນຳຄົນທຳອິດຂອງແອນຊານວາດໍ ທີ່ບໍ່ໄດ້ມາຈາກ 2 ພັກການເມືອງໃຫຍ່ ທີ່ສະຫຼັບກັນເປັນລັດຖະບານຕະຫຼອດໄລຍະ 3 ທົດສະວັດທີ່ຜ່ານມາ ຄືພັກອາຣີນາ ແລະ ພັກ FMLN.

ເຖິງແມ່ນວ່າທ່ານ ນາຢິບ ບູເຄເລ ຈະຍັງເປັນໄວໜຸ່ມໄຟແຮງ ອາດສ້າງຄວາມຕື່ນເຕັ້ນໃຫ້ກັບປະຊາຊົນ ແຕ່ຫົນທາງ 5 ປີໃນຕໍ່ໜ້າ ກໍ່ເຕັມໄປດ້ວຍບັນຫາຊຳເຮື້ອຂອງແອນຊານວາດໍ ໂດຍນອກເໜືອຈາກການແກ້ໄຂບັນຫາການສໍ້ລາດບັງຫຼວງແລ້ວ ຍັງລວມເຖິງການເປັນປະເທດທີ່ມີອັດຕາການເກີດອາຊະຍາກຳສູງທີ່ສຸດໃນໂລກ ຄື 51 ຄັ້ງຕໍ່ປະຊາກອນ 100,000 ຄົນ ແລະ ການແກ້ໄຂບັນຫາສາຍພົວພັນກັບສະຫະລັດ ອາເມຣິກາ ພາຍໃນການນຳຂອງທ່ານ ໂດໂນ ທຣຳ ທີ່ກ່າວຫາວ່າແອນຊານວາດໍ ເປັນໜຶ່ງໃນປະເທດທີ່ຕັດຂາດສາຍພົວພັນທາງການທູດກັບໄຕ້ຫວັນ ແລ້ວຫັນໄປສະຖາປະນາສາຍພົວພັນກັບຈີນ ເມື່ອປີທີ່ຜ່ານມາ ອັນໄດ້ສ້າງຄວາມບໍ່ພໍໃຈໃຫ້ສະຫະລັດ ອາເມຣິກາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube