ຜູ້ນຳເວເນຊູເອລາເຕືອນ ສ.ອາເມຣິກາ ມືຈະເປື້ອນໄປດ້ວຍເລືອດຫາກສົ່ງທະຫານເຂົ້າມາຮຸກຮານ

Venezuela's President Nicolas Maduro (Photo by Luis ROBAYO / AFP)

ສຳນັກຂ່າວຕ່າງປະເທດລາຍງານ 4 ກຸມພາ 2019 ວ່າ: ທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ໃຫ້ສຳພາດລາຍການສຳພາດແບບເຈາະເລິກ “Salvados” ທີ່ດຳເນີນລາຍການໂດຍທ່ານ ຮໍດີ ເອໂວເລ ໜຶ່ງໃນຜູ້ດຳເນີນລາຍການຊື່ດັງຂອງແອັດສະປາຍ ອອກອາກາດເມື່ອວັນອາທິດ ທີ່ຜ່ານມາ ເຊິ່ງຜູ້ນຳເວເນຊູເອລາກ່າວໃນຕອນໜຶ່ງວ່າ ທ່ານຕ້ອງການຝາກໄປເຖິງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ວ່າຜູ້ນຳສະຫະລັດ ອາເມຣິກາຈະໝົດວາລະຈາກທຳນຽບຂາວໃນສະພາບທີ່ມືທັງສອງຂ້າງເປື້ອນໄປດ້ວຍເລືອດ ຕາບໃດທີ່ຜູ້ນຳສະຫະລັດ ອາເມຣິກາ ແລະ ຄະນະຍັງສົມຄົບຄິດໃຊ້ທິດສະດີອັນເປິເປື້ອນ ເພື່ອໂຄ່ນລົ້ມອຳນາດ ພ້ອມທັງຕັ້ງຄຳຖາມກັບວ່າ ສະຫະລັດ ອາເມຣິກາຕ້ອງການໃຫ້ປະຫວັດສາດຊ້ຳຮອຍຈາກສົງຄາມຫວຽດນາມຫຼືບໍ່?.

Supporters of Venezuelan President Nicolas Maduro gather to mark the 20th anniversary of the rise of power of the late Hugo Chavez, the leftist firebrand who installed a socialist government, in Caracas on February 2, 2019. (Photo by Yuri CORTEZ / AFP)

ກ່ຽວກັບປະເດັນເສັ້ນຕາຍ ຂອງສະຫະພາບເອີຣົບ (EU) ເລື່ອງການກຳນົດໃຫ້ທ່ານ ນິໂຄລັສ ມາດູໂຣ ເລືອກຕັ້ງໃໝ່ພາຍໃນ 8 ວັນ, ທ່ານກ່າວວ່າບໍ່ສົນໃຈ ເພາະການເລືອກຕັ້ງປະທານປະເທດຄັ້ງຕໍ່ໄປຕາມລັດຖະທຳມະນູນຂອງເວເນຊູເອລາ ຈະເກີດຂຶ້ນໃນປີ 2024 ເພາະເວເນຊູເອລາບໍ່ແມ່ນອານານິຄົມຂອງເອີຣົບ ແຕ່ທ່ານພ້ອມຈັດການເລືອກຕັ້ງໃນລະດັບສະມາຊິກສະພາພາຍໃນປີນີ້ ຫາກເປັນຄວາມຕ້ອງການທີ່ແທ້ຈິງຂອງທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ປະທານສະພາແຫ່ງຊາດ ທີ່ປະກາດແຕ່ງຕັ້ງຕົນເອງຂຶ້ນມາເປັນຜູ້ນຳຄູ່ຂະໜາດກັບທ່ານ ນິໂຄລັສ ມາດູໂຣ ເມື່ອເດືອນທີ່ຜ່ານມາ ແລະ ໄດ້ຮັບການສະໜັບສະໜູນຢ່າງຊັດເຈນຈາກສະຫະລັດ ອາເມຣິກາ ພ້ອມພັນທະມິດບາງສ່ວນໃນເອີຣົບ ແລະ ອາເມຣິກາກາລາຕິນ.

ເຖິງຢ່າງໃດກໍ່ຕາມ ບໍ່ອາດປະຕິເສດໄດ້ວ່າ ທ່ານ ນິໂຄລັສ ມາດູໂຣທີ່ຂຶ້ນສູ່ອຳນາດເມື່ອປີ 2013 ດ້ວຍການຊະນະການເລືອກຕັ້ງ ທີ່ເກີດຂຶ້ນພາຍຫຼັງການເຖິງແກ່ກຳຂອງອະດີດປະທານປະເທດ ຮູໂກ ຊາເວສ ຕ້ອງປະເຊີນກັບແຮງຕໍ່ຕານຈາກປະຊາຊົນເວເນຊູເອລາເພີ່ມຂຶ້ນຢ່າງຕໍ່ເນື່ອງ ໂດຍເກືອບທຸກຝ່າຍໃນປະເທດຕີລາຄາວ່າ ການທີ່ເສດຖະກິດຂອງປະເທດລົ້ມລະຫຼາຍ ແລະ ກໍ່ໃຫ້ເກີດຄື້ນຜູ້ອົບພະຍົບຫຼາຍກວ່າ 3 ລ້ານຄົນເຂົ້າສູ່ປະເທດເພື່ອນບ້ານນັ້ນ ເປັນຜົນຈາກຄວາມຜິດພາດອັນໃຫຍ່ຫຼວງ ໃນການບໍລິຫານນະໂຍບາຍເສດຖະກິດຂອງທ່ານ ນິໂຄລັສ ມາດູໂຣ ທັງທີ່ປະເທດເວເນຊູເອລາ ເປັນປະເທດທີ່ມີປະລິມານນ້ຳມັນດິບສຳຮອງຫຼາຍທີ່ສຸດໃນໂລກ.