(ວິດີໂອ) ນາທີໜີຕາຍ ໄຟໄໝ້ອາພາດເມັ້ນ ໃນນະຄອນຫຼວງປາຣີສ ເສຍຊີວິດແລ້ວ 8 ຄົນ

ສຳນັກຂ່າວຕ່າງປະເທດລາຍງານ 5 ກຸມພາ 2019 ວ່າ: ເກີດເຫດໄຟໄໝ້ເທິງຂັ້ນສູງສຸດຂອງອາພາດເມັ້ນສູງ 8 ຊັ້ນ ຢູ່ຖະໜົນແອລອງເຊ ເຂດທີ່ຢູ່ອາໄສຂອງກຸ່ມຄົນຮັ່ງມີ ໃນເຂດ 16 ທິດຕາເວັນຕົກສຽງໃຕ້ຂອງນະຄອນຫຼວງປາຣີສ, ຕຶກດັ່ງກ່າວສ້າງຂຶ້ນໃນຊຸມປີ 1970.

ເຈົ້າໜ້າທີ່ດັບເພີງເປີດເຜີຍວ່າ: ໄຟໄດ້ເລີ່ມລຸກໄໝ້ເມື່ອເວລາປະມານ 01:00 ໂມງ ຂອງວັນອັງຄານ ຕາມເວລາທ້ອງຖິ່ນ ເຈົ້າໜ້າທີ່ດັບເພີງປະມານ 200 ຄົນ ສາມາດຄວບຄຸມເພີງຈົນສະຫງົບໄດ້ ໃຊ້ເວລາກວ່າ 5 ຊົ່ວໂມງ, ການກວດສອບບ່ອນເກີດເຫດເບື້ອງຕົ້ນພົບຜູ້ເສຍຊີວິດຖືກໄຟໄໝ້ 8 ຄົນ, ໄດ້ຮັບບາດເຈັບ 30 ຄົນ, ລວມເຖິງເຈົ້າໜ້າທີ່ດັບເພີງ 6 ຄົນ, ຄາດວ່າຕົວເລກຜູ້ເສຍຊີວິດອາດເພີ່ມຂຶ້ນອີກ ເນື່ອງຈາກຍັງມີອີກຫຼາຍຈຸດທີ່ຍັງບໍ່ສາມາດເຂົ້າເຖິງໄດ້.

ເຊິ່ງທ່ານ ຄຼິສຕັອບ ກາສເຕເນີ ລັດຖະມົນຕີກະຊວງປ້ອງພາຍໃນກ່າວວ່າ: ຕຳຫຼວດໄດ້ຈັບກຸມແມ່ຍິງຄົນໜຶ່ງ ອາຍຸ 40 ປີ ທີ່ພັກອາໄສຢູ່ໃນອາພາດເມັ້ນທີ່ເກີດເຫດ ໃນຖານະຜູ້ຕ້ອງສົງໄສວາງເພີງ ໂດຍແມ່ຍິງຄົນດັ່ງກ່າວມີບັນຫາທາງດ້ານສຸຂະພາບຈິດ ຕຳຫຼວດກຳລັງສືບສວນສອບສວນ ລວມທັງສອບຖາມຍາດພີ່ນ້ອງຜູ້ຕ້ອງສົງໄສ ແລະ ຜູ້ຢູ່ໃນເຫດການ.