ເກົາຫຼີໃຕ້ ຍອມແບ່ງຈ່າຍຄ່າທະຫານອາເມຣິກາຢູ່ໃນປະເທດ ປີລະເກືອບ 1,000 ລ້ານໂດລາ

AFP PHOTO / JUNG Yeon-Je

ສຳນັກຂ່າວຕ່າງປະເທດລາຍງານ 6 ກຸມພາ 2019 ວ່າ: ໂຄສົກກະຊວງການຕ່າງປະເທດສະຫະລັດ ອາເມຣິກາ ຖະແຫຼງເມື່ອວັນຈັນ ທີ 4 ກຸມພາທີ່ຜ່ານມາ ວ່າສະຫະລັດ ອາເມຣິກາ ແລະ ເກົາຫຼີໃຕ້ ບັນລຸຂໍ້ຕົກລົງໃນຫຼັກການ ຂໍ້ຕົກລົງມາດຕະການພິເສດສະບັບໃໝ່ ໂດຍທັງສອງຝ່າຍໃຫ້ຄຳໝັ້ນສັນຍາຈະສະຫຼຸບບັນຫາທາງເຕັກນິກທີ່ຄົງຄ້າງໃຫ້ສຳເລັດໂດຍໄວທີ່ສຸດ.

ພາຍໃຕ້ຂໍ້ຕົກລົງມາດຕະການພິເສດ (Special Measures Agreement) ຫຼື SMA ສະບັບແກ້ໄຂໃໝ່ນີ້ ເກົາຫຼີໃຕ້ຈະຕ້ອງເພີ່ມສ່ວນແບ່ງຄ່າໃຊ້ຈ່າຍເປັນເກືອບ 1,000 ລ້ານໂດລາສະຫະລັດ.

ພາຍໃຕ້ຂໍ້ຕົກລົງ SMA ປີ 2014 ທີ່ໝົດອາຍຸເມື່ອປີທີ່ຜ່ານມາ ກຳນົດໃຫ້ຝ່າຍເກົາຫຼີໃຕ້ຈ່າຍເງິນປີລະປະມານ 960,000 ລ້ານວອນ (848 ລ້ານໂດລາສະຫະລັດ) ເພື່ອຮັກສາກອງກຳລັງທະຫານສະຫະລັດ ອາເມຣິກາ 28,500 ຄົນໄວ້ໃນເກົາຫຼີໃຕ້ ແຕ່ທັງສອງຝ່າຍຍັງບໍ່ສາມາດບັນລຸຂໍ້ຕົກລົງ SMA ສະບັບໃໝ່ໄດ້ ເຖິງແມ່ນວ່າຈະມີການເຈລະຈາ 10 ຮອບແລ້ວ ນັບຕັ້ງແຕ່ເດືອນມີນາ ປີທີ່ຜ່ານມາ.

ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວຫຼາຍທີ່ຫຼາຍເທື່ອວ່າ ເກົາຫຼີໃຕ້ ເຊິ່ງສະຫະລັດ ອາເມຣິກາ ປະຈຳການທະຫານໃນດິນແດນນັບຕັ້ງແຕ່ສົງຄາມເກົາຫຼີ ລະຫວ່າງປີ 1950-1953 ຄວນຊ່ວຍແບກຮັບຄ່າໃຊ້ຈ່າຍເພີ່ມ, ຂະນະທີ່ສຳນັກຂ່າວຢອນຮັບລາຍງານກ່ອນໜ້ານີ້ ໂດຍອ້າງແຫຼ່ງຂ່າວທາງການທູດໃນນະຄອນຫຼວງໂຊວ່າ ຝ່າຍສະຫະລັດ ອາເມຣິກາຈະຍອມຮັບຄຳຮ້ອງຂໍຂອງເກົາຫຼີໃຕ້ ທີ່ຈະຂໍຊ່ວຍໄດ້ບໍ່ເຖິງ 1,000 ລ້ານໂດລາສະຫະລັດ ໃນປີ 2019 ຈາກທີ່ສະຫະລັດ ອາເມຣິກາຂໍໃຫ້ຊ່ວຍປີລະກວ່າ 1,250 ລ້ານໂດລາສະຫະລັດ ແລະ ຂໍ້ຕົກລົງໃໝ່ຄວນມີອາຍຸຄັ້ງລະ 1 ປີ ບໍ່ແມ່ນ 5 ປີຄືຂໍ້ຕົກລົງສະບັບເກົ່າຜ່ານມາ.

ເຖິງຢ່າງໃດກໍ່ຕາມ 70% ຂອງເງິນຊ່ວຍເຫຼືອຄ່າໃຊ້ຈ່າຍຂອງເກົາຫຼີໃຕ້ ຈະນຳໄປໃຊ້ຈ່າຍເປັນເງິນເດືອນສຳລັບພະນັກງານເກົາຫຼີໃຕ້ປະມານ 8,700 ຄົນທີ່ປະຕິບັດໜ້າທີ່ຕ່າງໆໃຫ້ຖານທັບສະຫະລັດ ອາເມຣິກາ ໃນເກົາຫຼີໃຕ້.