ກອງປະຊຸມສຸດຍອດ ຄັ້ງທີ 2 ລະຫວ່າງຜູ້ນຳ ສ.ອາເມຣິກາ-ເກົາຫຼີເໜືອ ຈະເກີດຂຶ້ນ 27-28 ກຸມພານີ້ ທີ່ຫວຽດນາມ

North Korea's leader Kim Jong Un (R) walks with US President Donald Trump (L) / AFP PHOTO / SAUL LOEB

ສຳນັກຂ່າວຕ່າງປະເທດລາຍງານເມື່ອວັນທີ 5 ກຸມພາ 2019 ທີ່ຜ່ານມາວ່າ: ໃນຄຳກ່າວຕອນໜຶ່ງຂອງການຖະແຫຼງນະໂຍບາຍປະຈຳປີ ໂດຍທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຕໍ່ກອງປະຊຸມສະພາ ເມື່ອວັນອັງຄານທີ່ຜ່ານມາ ວ່າການປະຊຸມຮ່ວມກັນຢ່າງເປັນທາງການ ຄັ້ງທີ 2 ລະຫວ່າງທ່ານ ກັບ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ຈະເກີດຂຶ້ນໃນລະຫວ່າງວັນທີ 27-28 ກຸມພາ ນີ້ ໂດຍປະເທດເຈົ້າພາບຄືຫວຽດນາມ, ແຕ່ຍັງບໍ່ໄດ້ບອກວ່າຢູ່ເມືອງໃດ ພ້ອມທັງກ່າວວ່າ ຫາກຜູ້ນຳສະຫະລັດ ອາເມຣິກາໃນຕອນນີ້ບໍ່ແມ່ນທ່ານ ສະຫະລັດ ອາເມຣິກາອາດເຮັດສົງຄາມກັບເກົາຫຼີເໜືອໄປແລ້ວກໍ່ເປັນໄດ້.

ເຊິ່ງການພົບປະຫາລືຄັ້ງປະຫວັດສາດ ລະຫວ່າງຜູ້ນຳສະຫະລັດ ອາເມຣິກາກັບຜູ້ນຳເກົາຫຼີເໜືອ ທີ່ເກີດຂຶ້ນເມື່ອເດືອນມິຖຸນາ ປີທີ່ຜ່ານມາ ຢູ່ປະເທດສິງກະໂປ ໂດຍທ່ານ ໂດໂນ ທຣຳ ກ່າວເຖິງການປະຊຸມຄັ້ງທຳອິດວ່າ: ເປັນການປູທາງສູ່ຂະບວນການປົດອາວຸດນິວເຄຼຍຂອງເກົາຫຼີເໜືອ ແຕ່ຫຼາຍຝ່າຍຍັງຕີລາຄາວ່າ ນັບຕັ້ງແຕ່ນັ້ນເປັນຕົ້ນມາຂະບວນການດັ່ງກ່າວເກືອບບໍ່ມີຄວາມຄືບໜ້າໃນທາງປະຕິບັດ ໂດຍສະເພາະການທີ່ປະຊາຄົມໜ່ວຍຂ່າວກອງຂອງສະຫະລັດ ອາເມຣິກາ ທີ່ລວມທັງໜ່ວຍງານໃຫຍ່ເຊັ່ນ: CIA ແລະ FBI ພາຍໃຕ້ການບໍລິຫານຂອງທ່ານ ແດນ ໂຄດສ໌ ຜູ້ອຳນວຍການສຳນັກຂ່າວກອງແຫ່ງຊາດສະຫະລັດ ອາເມຣິກາ (DNI) ກ່າວເມື່ອອາທິດທີ່ຜ່ານມາ ວ່າຂໍ້ມູນດ້ານການຂ່າວໃນຕອນນີ້ບົ່ງບອກວ່າ ຍັງບໍ່ມີທິດທາງທີ່ລັດຖະບານເກົາຫຼີເໜືອ ຈະປົດອາວຸດນິວເຄຼຍເປັນການຖາອວນ ຍິ່ງໄປກວ່ານັ້ນອີກຝ່າຍຍັງສະແຫວງຫາໂອກາດໃນການສ້າງອາວຸດອານຸພາບທຳລາຍລ້າງສູງ (WMD).

ຂະນະທີ່, ຄະນະປະຕິບັດງານພິເສດດ້ານເກົາຫຼີເໜືອຂອງສະຫະປະຊາຊາດ ອອກລາຍງານວ່າ: ໂຄງການພັດທະນາຂີປະນາວຸດຂອງເກົາຫຼີເໜືອຍັງຄົງສົມບູນ ໂດຍໃຊ້ສິ່ງປຸກສ້າງທີ່ບໍ່ເປັນທີ່ໜ້າສັງເກດເຊັ່ນ: ສະໜາມບິນ ເພື່ອອຳພາງຈາກຄວາມສ່ຽງຂອງການຖືກໂຈມຕີຈາກສະຫະລັດ ອາເມຣິກາ ແລະ ຍັງລະບຸອີກວ່າ ມາດຕະການຂວໍ້າບາດຕໍ່ເກົາຫຼີເໜືອນັ້ນ ບໍ່ມີປະສິດທິພາບ ເພາະບໍ່ວ່າຈະຢ່າງໃດກໍ່ຕາມ ລັດຖະບານເກົາຫຼີເໜືອຍັງສາມາດລັກລອບຊື້-ຂາຍນ້ຳມັນ, ອາວຸດ ແລະ ຖ່ານຫິນກັບປະເທດຄູ່ຄ້າໄດ້ຢູ່.

US envoy for North Korea Stephen Biegun (C) (Photo by Ed JONES / AFP)

ເຊິ່ງການປະກາດສະຖານທີ່ ແລະ ກຳນົດການເບື້ອງຕົ້ນຂອງການປະຊຸມຄັ້ງທີ 2 ລະຫວ່າງຜູ້ນຳສະຫະລັດ ອາເມຣິກາ ກັບ ຜູ້ນຳເກົາຫຼີເໜືອ ເກີດຂຶ້ນໃນເວລາດຽວກັນກັບທີ່ທ່ານ ສະຕີເຟນ ບີກັນ ທູດພິເສດດ້ານວຽກງານເກົາຫຼີເໜືອຂອງສະຫະລັດ ອາເມຣິກາ ເດີນທາງຢ້ຽມຢາມນະຄອນຫຼວງປຽງຢາງ ເພື່ອປຶກສາຫາລືກັບເຈົ້າໜ້າທີ່ລະດັບສູງຂອງເກົາຫຼີເໜືອ.