ເກົາຫຼີໃຕ້ ທຸ້ມງົບມະຫາສານ 12,000 ລ້ານໂດລາສະຫະລັດ ພັດທະນາຊາຍແດນຮ່ວມເກົາຫຼີເໜືອ

/ AFP PHOTO / Korea Summit Press Pool

ສຳນັກຂ່າວຕ່າງປະເທດລາຍງານ 7 ກຸມພາ 2019 ວ່າ: ທາງການເກົາຫຼີໃຕ້ເປີດເຜີຍແຜການງົບປະມານຈຳນວນ 13.2 ລ້ານລ້ານວອນ (ປະມານ 12,000 ລ້ານໂດລາສະຫະລັດ) ສຳລັບການປັບປຸງ ແລະ ພັດທະນາເຂດຊາຍແດນທີ່ຕິດກັບເກົາຫຼີເໜືອ ຕະຫຼອດໄລຍະທົດສະວັດໜ້າ.

North Korea’s leader Kim Jong Un (L) and South Korea’s President Moon Jae-in / AFP PHOTO / Korea Summit Press Pool

ລາຍງານລະບຸວ່າ: ງົບປະມານດັ່ງກ່າວ ຈະມາຈາກລັດຖະບານກາງ 5.4 ລ້ານລ້ານວອນ, ລັດຖະບານທ້ອງຖິ່ນ 2.2 ລ້ານລ້ານວອນ ແລະ ພາກເອກະຊົນ 5.6 ລ້ານລ້ານວອນ ຈະຖືກໃຊ້ຈ່າຍກັບໂຄງການພັດທະນາຕ່າງໆ ໃນພື້ນທີ່ຊາຍແດນລະຫວ່າງສອງເກົາຫຼີພາຍໃນປີ 2030.

ເກົາຫຼີໃຕ້ຈະດຳເນີນໂຄງການຕ່າງໆ ຈຳນວນ 225 ໂຄງການ ທີ່ເປັນການສ້າງພື້ນຖານໃຫ້ແກ່ການແລກປ່ຽນ ແລະ ການຮ່ວມມືລະຫວ່າງສອງເກົາຫຼີ ເພື່ອຄວາມສົມດຸນໃນການພັດທະນາຂອງແຫຼມເກົາຫຼີ, ກະຕຸ້ນການທ່ອງທ່ຽວ ແລະ ຂະຫຍາຍພື້ນຖານໂຄງລ່າງທາງສັງຄົມ.

ກະຊວງພາຍໃນ ແລະ ປ້ອງກັນຄວາມສະຫງົບເກົາຫຼີໃຕ້ລະບຸວ່າ: ການຂະຫຍາຍການລົງທຶນຕະຫຼອດໄລຍະທົດສະວັດໜ້າ ໄດ້ສະທ້ອນເຖິງສະຖານະການໃນບ້ານ ແລະ ນອກບ້ານທີ່ປ່ຽນແປງໄປ ລວມທັງເປັນການພັດທະນາສາຍພົວພັນລະຫວ່າງສອງເກົາຫຼີອີກດ້ວຍ.