ອະດີດແກນນຳຂະບວນຕໍ່ຕ້ານລັດຖະບານ ຍື່ນໃຫ້ຖອດຖອນເຈົ້າຍິງອຸບົນຣັດ ຈາກການເລືອກຕັ້ງນາຍົກໄທ

(Photo by Chin CHOMDEE / THAI NEWS PIX / AFP)

ສຳນັກຂ່າວຕ່າງປະເທດລາຍງານ 8 ກຸມພາ 2019 ວ່າ: ຈາກກໍລະນີທີ່ພັກໄທຣັກສາຊາດ ທີ່ນຳໂດຍທ່ານ ປຣີຊາພົນ ພົງພານິສ ໄດ້ສະເໜີຊື່ເຈົ້າຍິງອຸບົນຣັດຕະນະ ມະຫິດົນ ເປັນຕົວແທນພັກໃນການຊິງຕຳແໜ່ງນາຍົກລັດຖະມົນຕີຂອງໄທ ໃນການເລືອກຕັ້ງທົ່ວໄປ ທີ່ຈະຈັດຂຶ້ນໃນວັນທີ 24 ມີນາ ນີ້, ທ່ານ ໄພບູນ ນິຕິຕະວັນ ຫົວພັກພັກປະຊາຊົນປະຕິຮູບ ເຊິ່ງເປັນອະດີດແກນນຳຂອງຄະນະກຳມະການປະຊາຊົນເພື່ອການປ່ຽນແປງປະຕິວັດປະເທດໄທໃຫ້ເປັນປະຊາທິປະໄຕທີ່ສົມບູນແບບໂດຍມີພະມະຫາກະສັດເປັນປະມຸກ (ກປປສ) ທີ່ນຳພາຂະບວນປະທ້ວງຕໍ່ຕ້ານລັດຖະບານໄທ ສະໄໝການເປັນນາຍົກຂອງທ່ານ ນາງ ຍິ່ງລັກ ຊິນນະວັດ ໃນໄລຍະປີ 2013-2014 ຈົນນຳໄປສູ່ການກໍ່ລັດຖະປະຫານ ແລະ ຈັດຕັ້ງລັດຖະບານທະຫານພາຍໃຕ້ການນຳຂອງທ່ານ ພົນເອກ ປຣະຍຸດ ຈັນໂອຊາ ໄດ້ເຂົ້າຍື່ນໜັງສືຕໍ່ປະທານຄະນະກຳມະການການເລືອກຕັ້ງແຫ່ງຊາດໄທ ເລື່ອງຂໍໃຫ້ຄະນະກຳມະການການເລືອກຕັ້ງພິຈາລະນາການກະທຳຂອງພັກໄທຣັກກສາຊາດ ວ່າເຂົ້າຂ່າຍຜິດຕໍ່ລະບຽບການເລືອກຕັ້ງ ດ້ວຍວິທີການຫາສຽງ ແລະ ລັກສະນະຕ້ອງຫ້າມໃນການຫາສຽງເລືອກຕັ້ງ.

ເຊິ່ງລາຍລະອຽດໃນໜັງສືດັ່ງກ່າວລະບຸວ່າ ພັກໄທຣັກສາຊາດ ໂດຍກຳມະການບໍລິຫານພັກມີມະຕິສະເໜີຊື່ ເຈົ້າຍິງອຸບົນຣັດນະຕະ ມະຫິດົນ ໃນບັນຊີນາຍົກລັດຖະມົນຕີຂອງພັກ ແລະ ມີການຖະແຫຼງຂ່າວປະຊາສຳພັນຕໍ່ສື່ນັ້ນ ເຖິງແມ່ນວ່າເຈົ້າຍິງອຸບົນຣັດຕະນະ ມະຫິດົນ ຈະລາອອກຈາກຖານັນດອນສັກແລ້ວ ຕັ້ງແຕ່ປີ 1972 ແຕ່ເຈົ້າຍິງອຸບົນຣັດຕະນະ ມະຫິດົນ ຍັງເປັນເຈົ້າຟ້າຊັ້ນທູນກະໝ່ອມ, ເປັນພະທິດາອົງໃຫຍ່ຂອງພະບາດສົມເດັດພູມິພົນອະດຸນຍະເດດ ເຈົ້າມະຫາຊີວິດລາຊະການທີ 9 ແລະ ສົມເດັດພະລາຊິນີສິຣິກິດ ແລະ ຍັງເປັນພະເຊດຖະພະຄິນີ (ເອື້ອຍ) ອົງດຽວຂອງສົມເດັດມະຫາວະຊິຣາລົງກອນ ເຈົ້າມະຫາຊີວິດລາຊະການປັດຈຸບັນ.

ດັ່ງນັ້ນ, ເຈົ້າຍິງອຸບົນຣັດຕະນະ ມະຫິດົນ ຈຶ່ງເປັນສ່ວນໜຶ່ງຂອງສະຖາບັນພະມະຫາກະສັດ ຕາມປະເພນີການປົກຄອງປະເທດໄທ ໃນລະບອບປະຊາທິປະໄຕ ທີ່ມີກະສັດເປັນປະມຸກ ດັ່ງທີ່ລັດຖະທຳມະນູນແຫ່ງລາຊະອານາຈັກໄທບັນຍັດໄວ້.

ດັ່ງນັ້ນ, ການທີ່ພັກໄທຣັກສາຊາດໄດ້ຍື່ນສະເໜີຊື່ເຈົ້າຍິງອຸບົນຣັດຕະນະ ມະຫິດົນ ໃນບັນຊີນາຍຍົກລັດຖະມົນຕີພັກໄທຣັກສາຊາດ ຕໍ່ຄະນະກຳມະການການເລືອກຕັ້ງ ຍ່ອມຕ້ອງມີການນຳຊື່ຂອງທ່ານໄປໃຊ້ປະໂຫຍດໃນການຫາສຽງເລືອກຕັ້ງຂອງພັກໄທຣັກສາຊາດ ອັນເປັນການເຂົ້າຂ່າຍລັກສະນະຕ້ອງຫ້າມໃນການຫາສຽງເລືອກຕັ້ງ ຕາມລະບຽບກົດໝາຍ.

(Photo by Krit Phromsakla Na SAKOLNAKORN / THAI NEWS PIX / AFP)

ໃນດ້ານຂອງພັກໄທຣັກສາຊາດ ກໍ່ໄດ້ອອກຖະແຫຼງການຕອບໂຕ້ວ່າ: ຈາກກໍລະນີທີ່ກຳມະການບໍລິຫານພັກໄທຣັກສາຊາດ ມີມະຕິສະເໜີຊື່ເຈົ້າຍິງອຸບົນລັດຕະນະ ມະຫິດົນ ໃນບັນຊີລາຍຊື່ນາຍົກລັດຖະມົນຕີຂອງພັກ ຂໍຊື່ແຈງວ່າ: ພັກໄທຣັກສາຊາດໄດ້ກວດສອບຄຸນສົມບັດຜູ້ຖືກສະເໜີຊື່ຕາມບົດບັນຍັດໃນລັດຖະທຳມະນູນ ແລະ ກົດໝາຍທີ່ກ່ຽວຂ້ອງພົບວ່າ ເຈົ້າຍິງອຸບົນຣັດຕະນະ ມະຫິດົນ ເປັນຜູ້ມີຄຸນສົມບັດຄົບຖ້ວນ ດັ່ງນີ້:

1. ເຈົ້າຍິງອຸບົນຣັດຕະນະ ມະຫິດົນ ໄດ້ລາອອກຈາກການດຳລົງຖານັນດອນສັກແຫ່ງລາຊະວົງໃນຖານະສົມເດັດເຈົ້າຟ້າ ເມື່ອວັນທີ 25 ກໍລະກົດ 1972 ເຮັດໃຫ້ສະຖານະທາງກົດໝາຍຂອງທ່ານເປັນສາມັນຊົນຕັ້ງແຕ່ນັ້ນເປັນຕົ້ນມາ.

2. ຄຸນສົມບັດຂອງຜູ້ທີ່ຈະຢູ່ໃນບັນຊີລາຍຊື່ວ່າທີ່ນາຍົກລັດຖະມົນຕີຕາມລັດຖະທຳມະນູນສະບັບປີ 2017 ກຳນົດໃຫ້ຕ້ອງມີໜັງສືຍິນຍອມຂອງບຸກຄົນທີ່ໄດ້ຮັບການສະເໜີຊື່ ໂດຍມີລາຍລະອຽດຕາມທີ່ຄະນະກຳມະການການເລືອກຕັ້ງກຳນົດ ເຊິ່ງເຈົ້າຍິງອຸບົນຣັດຕະນະ ມະຫິດົນ ໄດ້ມີໜັງສືຕອບຮັບມາຍັງພັກໄທຣັກສາຊາດຕາມເອກະສານແນບ ທີ່ໄດ້ຍື່ນຕໍ່ຄະນະກຳມະການການເລືກຕັ້ງແລ້ວ.

3. ກໍລະນີຜູ້ຢູ່ໃນບັນຊີລາຍຊື່ວ່າທີ່ນາຍົກລັດຖະມົນຕີເປັນຜູ້ບໍ່ເຄີຍໄດ້ໃຊ້ສິດເລືອກຕັ້ງ ຝ່າຍກົດໝາຍຂອງພັກໄດ້ກວດສອບ ແລະ ຢືນຢັນວ່າເຈົ້າຍິງອຸບົນຣັດຕະນະ ມະຫິດົນ ບໍ່ໄດ້ຂາດຄຸນສົມບັດຈາກກໍລະນີດັ່ງກ່າວ ຕາມການໃຫ້ສຳພາດຂອງທ່ານ ຈະຣຸງວິດ ພຸມມາ ເລຂາກຳມະການການເລືອກຕັ້ງ ເມື່ອວັນທີ 7 ກຸມພາ 2019 ລະບຸວ່າການບໍ່ໄດ້ໃຊ້ສິດເລືອກຕັ້ງເປັນຂໍ້ຫ້າມຂອງລັດຖະທຳມະນູນໃນອະດີດ ແຕ່ລັດຖະທຳມະນູນປັດຈຸບັນໄດ້ຍົກເລີກ ຫ້າມພຽງແຕ່ຕ້ອງບໍ່ເຄີຍຖືກຖອດຖອນສິດເລືອກຕັ້ງເທົ່ານັ້ນ.