ປະກາດແລ້ວ ບໍ່ມີຊື່ເຈົ້າຍິງອຸບົນຣັດຕະນະ ໃນລາຍຊື່ຜູ້ຊິງຕຳແໜ່ງນາຍົກໄທ

(Photo by FRED DUFOUR / AFP)

ສຳນັກຂ່າວຕ່າງປະເທດລາຍງານ 11​ ກຸມພາ 2019 ວ່າ: ສຳນັກງານຄະນະກຳມະການການເລືອກຕັ້ງແຫ່ງຊາດໄທ ໄດ້ມີການເຜີຍແຜ່ເອກະສານປະກາດລາຍຊື່ຜູ້ສະໜັກຈາກພັກການເມືອງຕ່າງໆ ທີ່ສະເໜີຊື່ຕົວແທນພັກໃຫ້ສະພາພິຈາລະນາແຕ່ງຕັ້ງເປັນນາຍົກລັດຖະມົນຕີ ໂດຍມີທັງໝົດ 45 ພັກທີ່ມີການສະເໜີຊື່ ແຕ່ປາກົດວ່າບໍ່ມີຊື່ເຈົ້າຍິງອຸບົນຣັດຕະນະ ມະຫິດົນ ຕົວແທນຈາກພັກໄທຣັກສາຊາດ.

ເຊິ່ງພັກໄທຣັກສາຊາດໄດ້ສະເໜີຊື່ເຈົ້າຍິງອຸບົນຣັດຕະນະ ມະຫິດົນ ໃຫ້ເປັນຕົວແທນພັກຕໍ່ຄະນະກຳມະການເລືອກຕັ້ງ ເມື່ອວັນທີ 8 ກຸມພາ ທີ່ຜ່ານມາ, ແຕ່ໃນມື້ດຽວກັນສົມເດັດພະມະຫາວະຊິຣາລົງກອນ ເຈົ້າມະຫາຊີວິດໄທ ກໍ່ໄດ້ອອກປະກາດວ່າ: ເຖິງແມ່ນວ່າເຈົ້າຍິງອຸບົນຣັດຕະນະ ມະຫິດົນ ຈະລາອອກຈາກຖານັນດອນສັກແລ້ວຕໍ່ຕາມ ແຕ່ເຈົ້າຍິງອຸບົນຣັດຕະນະ ມະຫິດົນ ຍັງເປັນເຈົ້າຟ້າຊັ້ນທູນກະໝ່ອມ ເປັນພະທິດາອົງໃຫຍ່ຂອງພະບາດສົມເດັດພູມິພົນອະດຸນຍະເດດ ເຈົ້າມະຫາຊີວິດລາຊະການທີ 9 ແລະ ສົມເດັດພະລາຊິນີສິຣິກິດ ແລະ ຍັງເປັນພະເຊດຖະພະຄິນີ (ເອື້ອຍ) ອົງດຽວຂອງສົມເດັດພະມະຫາວະຊິຣາລົງກອນ ເຈົ້າມະຫາຊີວິດລາຊະການປັດຈຸບັນ. ດັ່ງນັ້ນ, ເຈົ້າຍິງອຸບົນຣັດຕະນະ ມະຫິດົນ ຍັງເປັນສ່ວນໜຶ່ງຂອງສະຖາບັນພະມະຫາກະສັດ ຕາມປະເພນີການປົກຄອງຂອງໄທ ໃນລະບອບປະຊາທິປະໄຕ ທີ່ມີກະສັດເປັນປະມຸກ ດັ່ງທີ່ລັດຖະທຳມະນູນແຫ່ງລາຊະອານາຈັກໄທບັນຍັດໄວ້ຄື: ຕ້ອງຢູ່ເໜືອການເມືອງ ແລະ ຕ້ອງບໍ່ຫຍຸ້ງກ່ຽວທາງການເມືອງ.