ຂ້າຖິ້ມຫາກບໍ່ມາມອບຕົວ ສົງຄາມຢາເສບຕິດຢູ່ບັງກະລາເທດດຳເນີນໄປຢ່າງດຸເດືອດ

(Photo by MUNIR UZ ZAMAN / AFP)

ສຳນັກຂ່າວຕ່າງປະເທດລາຍງານເມື່ອວັນທີ 12 ກຸມພາ 2019 ທີ່ຜ່ານມາວ່າ: ຈາກກໍລະນີທີ່ລັດຖະບານບັງກະລາເທດເປີດສາກສົງຄາມກວາດລ້າງຢາເສບຕິດໃນເດືອນ ພຶດສະພາ 2018 ທີ່ຜ່ານມາ, ເນື່ອງຈາກມີຢາເສບຕິດແຜ່ລະບາດຢ່າງໜັກໜ່ວງໃນປະເທດທີ່ມີປະຊາກອນ 165 ລ້ານຄົນ, ເຊິ່ງສ່ວນໃຫຍ່ເປັນປະເພດຢາບ້າທີ່ມີລາຄາຖືກ ປະຕິບັດການກວາດລ້າງຈົນເຖິງຂະນະນີ້, ມີຜູ້ຕ້ອງສົງໄສຄ້າຢາເສບຕິດຖືກເຈົ້າໜ້າທີ່ຂ້າແລ້ວເກືອບ 300 ຄົນ ແລະ ມີຜູ້ຖືກຈັບດຳເນີນຄະດີແລ້ວປະມານ 25,000 ຄົນ.

(Photo by MUNIR UZ ZAMAN / AFP)

ລັດຖະບານບັງກະລາເທດປະກາດຂີດເສັ້ນຕາຍໃຫ້ໂອກາດບັນດາຜູ້ຄ້າຢາເສບຕິດ ເຂົ້າມອບຕົວຕໍ່ເຈົ້າໜ້າທີ່ພາຍໃນກາງເດືອນກຸມພານີ້. ຕຳຫຼວດເປີດເຜີຍວ່າ ຈະມີຜູ້ຄ້າຢາເສບຕິດ ແລະ ກຸ່ມຜູ້ຕັ້ງຕົນເປັນຜູ້ມີອິດທິພົນລະດັບເຈົ້າພໍ່-ເຈົ້າແມ່ ເຂົ້າມອບຕົວໃນວັນທີ 16 ກຸມພາ 2019 ຫຼາຍກວ່າ 100 ຄົນ ທີ່ເມືອງເທດນາບ ເຊິ່ງເປັນສູນກາງສຳຄັນຂອງຂະບວນການຄ້າຢາເສບຕິດ ແລະ ເມືອງນີ້ຢູ່ໃນເຂດຄັອກບາຊາ ທີ່ມີຜູ້ລີ້ໄພຊາວໂຣຮິງຢາຈາກມຽນມາປະມານ 1 ລ້ານຄົນອາໄສຢູ່ຕາມສູນພັກເຊົາຫຼາຍແຫ່ງ.

ທ່ານ ມາຊູ ຮອສເຊນ ຜູ້ບັນຊາການຕຳຫຼວດຄັອກ ບາຊາກ່າວວ່າ ການມອບຕົງຄັ້ງນີ້ຖືເປັນປະຫວັດສາດ ແລະ ເປັນຄວາມສຳເລັດອັນຍິ່ງໃຫຍ່ ສຳລັບປະຕິບັດການກວາດລ້າງຢາເສບຕິດຂອງລັດຖະບານ ເຊິ່ງອາດປຽບທຽບໄດ້ກັບການມອບຕົວຂອງແກ້ງຄ້າຢາເສບຕິດລາຍໃຫຍ່ “ເມເດວລິນ” ໃນປະເທດໂກໂລມບີ ເມື່ອປີ 2002, ທ່ານ ຮອສເຊນ ຍັງກ່າວອີກວ່າ ຢາບ້າໄດ້ໄຫຼເຂົ້າສູ່ເຂດຄັອກ ບາຊາ ແລະ ຜູ້ລີ້ໄພຊາວໂຣຮິງຢາຈຳນວນຫຼາຍຖືກຈ້າງໃຫ້ຂົນສົ່ງຢາ.