ກຳປູເຈຍບໍ່ພໍໃຈທີ່ EU ກຳລັງພິຈາລະນາຖອດຖອນສິດທິພິເສດທາງການຄ້າ

Cambodia's Prime Minister Hun Sen / AFP PHOTO / TANG CHHIN Sothy

ສຳນັກຂ່າວຕ່າງປະເທດລາຍງານ 13​ ກຸມພາ 2019 ວ່າ: ສົມເດັດຮຸນ ເຊນ ນາຍົກລັດຖະມົນຕີກຳປູເຈຍ ກ່າວເມື່ອວັນອັງຄານ ທີ່ຜ່ານມາ ພາຍຫຼັງສະຫະພາບເອີຣົບ (EU) ເລີ່ມຂະບວນການພິຈາລະນາການຮ່ວມມືທາງການຄ້າກັບກຳປູເຈຍ ທີ່ອາດນຳໄປສູ່ການຖອດຖອນສິດທິພິເສດທາງການຄ້າຂອງກຳປູເຈຍໃນການເຂົ້າເຖິງລະບົບຕະຫຼາດດຽວຂອງສະຫະພາບເອີຣົບ ທີ່ຍົກເວັ້ນສິນຄ້າປະເທດອາວຸດ (Everything but Arms: EBA) ເຊິ່ງອາດສົ່ງຜົນຕໍ່ອຸດສາຫະກຳຕ່ຳແຜ່ນ ແລະ ເກີບຂອງກຳປູເຈຍ ທີ່ສົ່ງອອກໄປຍັງເອີຣົບຫຼາຍກວ່າປີລະ 4,000 ລ້ານໂດລາສະຫະລັດ ວ່າອະທິປະໄຕຂອງກຳປູເຈຍກຳລັງຖືກແຊກແຊງຈາກພາຍນອກ ແລະ ເລື່ອງນີ້ບໍ່ສາມາດໃຊ້ເປັນເງື່ອນໄຂຕໍ່ການແລກປ່ຽນໃດໄດ້.

Cambodian workers buy shoes in front of a factory in Phnom Penh on February 12, 2019. (Photo by TANG CHHIN Sothy / AFP)

ໃນດ້ານຂອງກະຊວງການຕ່າງປະເທດກຳປູເຈຍ ກໍ່ໄດ້ອອກຖະແຫຼງການໃນເວລາຕໍ່ມາວ່າ ມະຕິຂອງ EU ນັ້ນບໍ່ຍຸຕິທຳເປັນຢ່າງຍິ່ງ ແລະ ເປັນການດຳເນີນການແຕ່ພຽງຝ່າຍດຽວ ໂດຍລາຍງານຂອງຄະນະກຳມາທິການເອີຣົບ (EC) ເຊິ່ງເປັນຝ່າຍບໍລິຫານຂອງ EU ລະບຸການເລີ່ມຂະບວນການດັ່ງກ່າວຕັ້ງແຕ່ວັນທີ 12​ ກຸມພາ 2019 ແລະ ມີກຳນົດໄລຍະເວລາ 18 ເດືອນ ຫຼື ຈົນເຖິງເດືອນສິງຫາ 2020 ເຊິ່ງຫາກມາດຕະການຂວໍ້າບາດເກີດຂຶ້ນຈິງ ກຳແພງພາສີຂອງ EU ຕໍ່ສິນຄ້າປະເພດເຄື່ອງນຸ່ງຫົ່ມຈາກກຳປູເຈຍຈະເພີ່ມຂຶ້ນສູງສຸດ 12% ແຕ່ສຳລັບເກີບຈະຢູ່ປະມານ 8-17%, ດ້ານສະຫະພາບແຮງງານຂອງກຳປູເຈຍປະເມີນວ່າ ການຖອດຖອນສິດທິພິເສດດ້ານການຄ້າອາດສົ່ງຜົນໃຫ້ປະເທດສູນເສຍລາຍໄດ້ເຖິງປີລະ 700 ລ້ານໂດລາສະຫະລັດ.

ເຊິ່ງການເຄື່ອນໄຫວດັ່ງກ່າວຂອງ EU ມາຈາກກໍລະນີທີ່ກຳປູເຈຍຈັດການເລືອກຕັ້ງທົ່ວໄປເມື່ອເດືອນກໍລະກົດ ປີທີ່ຜ່ານມາ ເຊິ່ງພັກປະຊາຊົນກຳປູເຈຍ ພາຍໃຕ້ການນຳຂອງສົມເດັດຮຸນ ເຊນ ສາມາດຍາດໄດ້ໄຊຊະນະຄອງສຽງທັງໝົດໃນສະພາແຕ່ພຽງພັກດຽວ ຈຳນວນ 125 ສຽງ ອັນໄດ້ເຮັດໃຫ້ຫຼາຍຝ່າຍອອກມາວິພາກວິຈານລວມເຖິງ EU, ແຕ່ສົມເດັດຮຸນ ເຊນ ເຄີຍກ່າວເມື່ອເດືອນທີ່ຜ່ານມາ ວ່າການເມືອງຂອງກຳປູເຈຍອາດບໍ່ມີຝ່າຍຄ້ານອີກຕໍ່ໄປ ຫາກການຖອດຖອນສິດທິພິເສດທາງການຄ້າຂອງ EU ເກີດຂຶ້ນຈິງ.