ເຫດກໍ່ການຮ້າຍລະເບີດລົດທະຫານອິນເດຍ ເສຍຊີວິດແລ້ວ 40 ຄົນ, ອິນເດຍກ່າວປາກິດສະຖານຕ້ອງຮັບຜິດຊອບ

ສຳນັກຂ່າວຕ່າງປະເທດລາຍງານ 15 ກຸມພາ 2019 ວ່າ: ເກີດເຫດຄົນຮ້າຍຂັບລົດແລ່ນເຂົ້າໃສ່ຂະບວນລົດເມທະຫານອີເດຍ ຂະນະທີ່ກຳລັງແລ່ນຢູ່ຕາມເສັ້ນທາງໃນເມືອງອະວັນຕິປຸຣະ ໃກ້ກັບເມືອງສຣີນະຄອນ ເຊິ່ງເປັນເມືອງເອກຂອງລັດຊຳມູ ແລະ ກັສມີ ຢູ່ທາງພາກເໜືອຂອງອິນເດຍ ແລະ ມີຊາຍແດນຕິດກັບປາກິດສະຖານ ເມື່ອຕອນບ່າຍຂອງວັນພະຫັດ ທີ່ຜ່ານມາ ຕາມເວລາທ້ອງຖິ່ນ, ພາຍຫຼັງທີ່ລົດຄົນຮ້າຍແລ່ນເຂົ້າໃສ່ຂະບວນລົດເມກໍ່ໄດ້ຈູດຊະນວນລະເບີດຂ້າຕົວຕາຍ ແຮງລະເບີດເຮັດໃຫ້ທະຫານຢູ່ໃນລົດເມຍເສຍຊີວິດຫຼາຍກວ່າ 40 ຄົນ ແລະ ຍັງມີທະຫານໄດ້ຮັບບາດເຈັບອີກຫຼາຍສິບຄົນ.

ພາຍຫຼັງເກີດເຫດກຸ່ມຫົວຮຸນແຮງ “ຈາອິສ-ອີ-ໂມຮຳໝັດ” ເຊິ່ງມີຖານທີ່ໝັ້ນໃນປາກິດສະຖານ ຮັບວ່າເປັນຜູ້ກໍ່ເຫດ, ຂະນະທີ່ທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ປະນາມເຫດການທີ່ເກີດຂຶ້ນ ແລະ ກ່າວວ່າປາກິດສະຖານຕ້ອງສະແດງຄວາມຮັບຜິດຊອບຕໍ່ການປ່ອຍໃຫ້ກຸ່ມຕິດອາວຸດ ທີ່ຫຼົບຊ້ອນຢູ່ໃນປະເທດຂອງຕົນເອງຮຸກຮານອະທິປະໄຕຂອງປະເທດອື່ນ, ໃນດ້ານຂອງກະຊວງການຕ່າງປະເທດປາກິດສະຖານອອກຖະແຫຼງການພຽງວ່າ ເຫດການຄວາມຮຸນແຮງທີ່ເກີດຂຶ້ນຢູ່ບໍລິເວນຊາຍແດນທີ່ຕິດກັບອິນເດຍນັ້ນ ເປັນສິ່ງທີ່ໜ້າເປັນຫ່ວງຢ່າງຍິງ, ແຕ່ລະບຸອີກວ່າ ລັດຖະບານອິນເດຍບໍ່ສົມຄວນກ່າວຫາປາກິດສະຖານໂດຍປາສະຈາກຫຼັກຖານ.

ເຊິ່ງໜ່ວຍງານດ້ານຄວາມໝັ້ນຄົງຂອງອິນເດຍຍັງບໍ່ສະແດງທ່າທີ່ຢ່າງເປັນທາງການຕໍ່ການກໍ່ການຮ້າຍຄັ້ງນີ້, ເຊິ່ງຖືວ່າຮຸນແຮງທີ່ສຸດໃນຮອບຫຼາຍທົດສະວັດ, ແຕ່ສື່ທ້ອງຖິ່ນຫຼາຍແຫ່ງລາຍງານວ່າລະເບີດທີ່ຄົນຮ້າຍໃຊ້ໃນການກໍ່ເຫດຂ້າຕົວຕາຍມີນ້ຳໜັກເຖິງ 350​ ກິໂລກຣາມ ແລະ ເຈົ້າໜ້າທີ່ຝ່າຍຄວາມໝັ້ນຄົງຂອງອິນເດຍທັງທະຫານ ແລະ ຕຳຫຼວດໄດ້ກະຈາຍກຳລັງປິດລ້ອມ 15 ບ້ານໃກ້ຈຸດເກີດເຫດ ແລະ ຂໍກວດຄົ້ນເຮືອນທຸກຫຼັງ ຕາມຂໍ້ມູນຂ່າວກອງວ່າມີລະເບີດເຄີຍອາໄສຢູ່ໃນບໍລິເວນນັ້ນ.

ທີ່ຜ່ານມາ ອິນເດຍ ແລະ ປາກິດສະຖານຕ່າງກໍ່ປະກາດຕົນເປັນມະຫາອຳນາດດ້ານນິວເຄຼຍ ໃນພູມມິພາກອາຊີໃຕ້, ສູ້ຮົບຍາດແຍ່ງດິນແດນໃນພູມມິພາກແຄຊເມຍ ທີ່ຢູ່ທາງທິດເໜືອຂອງສາຍພູຫິມະໄລມາເປັນເວລາຫຼາຍທົດສະວັດ ໂດຍເຮັດສົງຄາມຄັ້ງໃຫຍ່ກັນມາແລ້ວ 2 ຄັ້ງ ພຽງບໍ່ພໍເທົ່າໃດພາຍຫຼັງໄດ້ຮັບເອກະລາດຈາກອັງກິດ ເມື່ອປີ 1947.

- Advertisement -