ສ.ອາເມຣິກາເປັນໜີ້ກວ່າ 22 ລ້ານລ້ານໂດລາສະຫະລັດ ສູງກວ່າ GDP ຂອງປະເທດ

ສຳນັກຂ່າວຕ່າງປະເທດລາຍງານເມື່ອວັນທີ 14 ກຸມພາ 2019 ທີ່ຜ່ານມາວ່າ: ກະຊວງການເງິນຂອງສະຫະລັດ ອາເມຣິກາອອກຖະແຫຼງການວ່າ ປະລິມານໜີ້ສາທາລະນະຂອງປະເທດນັບຕັ້ງແຕ່ປີ 1993 ເຖິງວັນທີ 13 ກຸມພາ 2019 ເພີ່ມສູງຂຶ້ນເຖິງລະດັບ 22.01 ລ້ານລ້ານໂດລາສະຫະລັດ ເປັນຄັ້ງທຳອິດ, ເຊິ່ງຫຼາຍກວ່າລວມຍອດຜະລິດຕະພັນພາຍໃນ (GDP) ຕະຫຼອດປີ, ໂດຍປະລິມານໜີ້ສາທາລະນະຂອງປະເທດໃນມື້ທີ່ທ່ານ ໂດໂນ ທຣຳ ເຂົ້າຮັບຕຳແໜ່ງເປັນປະທານປະເທດເມື່ອວັນທີ 20 ມັງກອນ 2017 ຢູ່ທີ່ 19.95 ລ້ານລ້ານໂດລາສະຫະລັດ.

ຂະນະທີ່ນັກວິເຄາະກ່າວວ່າ ນັ້ນຄືຄວາມສ່ຽງອັນໃຫຍ່ຫຼວງຕໍ່ເສດຖະກິດຂອງສະຫະລັດ ອາເມຣິກາ ທີ່ມີຂະໜາດເສດຖະກິດໃຫຍ່ທີ່ສຸດໃນໂລກ ແລະ ຄຸນນະພາບຊີວິດຂອງປະຊາຊົນອາເມຣິກາທຸກຄົນ ເນື່ອງຈາກຫາກຄິດໄລ່ໂດຍສະເລ່ຍແລ້ວ ພົບວ່າໜີ້ສາທາລະນະຂອງສະຫະລັດ ອາເມຣິກາ ເພີ່ມຂຶ້ນມື້ລະ 1,000 ລ້ານໂດລາສະຫະລັດ.

US Trade Representative Robert Lighthizer (C) listens as Chinese Vice Premier Liu He (R) talks while they line up for a group photo with US Treasury Secretary Steven Mnuchin at the Diaoyutai State Guesthouse in Beijing on February 15, 2019. (Photo by Mark Schiefelbein / POOL / AFP)

ລາຍງານດັ່ງກ່າວ, ໄດ້ຮັບການເຜີຍແຜ່ອອກມາໃນຊ່ວງທີ່ຄະນະຜູ້ແທນເຈລະຈາການຄ້າຂອງສະຫະລັດ ອາເມຣິກາ ທີ່ນຳໂດຍທ່ານ ໂຣເບິດ ໄລທິເຊີ ແລະ ທ່ານ ສະຕີບ ມະນູຊິນ ລັດຖະມົນຕີກະຊວງການເງິນ ຢ້ຽມຢາມນະຄອນຫຼວງປັກກິ່ງ ເພື່ອພົບປະຫາລືກັບທ່ານ ຫຼິວ ເຮີ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ເຊິ່ງເປັນການຕໍ່ຍອດຈາກການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ນະຄອນຫຼວງບົວໂນສໄອເຣສ ປະເທດອາຊັງຕິນ ທີ່ຜູ້ນຳຈີນ ແລະ ສະຫະລັດ ອາເມຣິກາໄດ້ເຫັນດີຮ່ວມກັນໃນຫຼັກການໃຫ້ຢຸດຕິສົງຄາມການຄ້າລະຫວ່າງກັນເປັນເວລາ 90 ວັນ, ນັບຕັ້ງແຕ່ວັນທີ 1 ທັນວາ ປີທີ່ຜ່ານມາ ໂດຍຈະໃຊ້ຊ່ວງໄລຍະເວລາດັ່ງກ່າວໃນການເຈລະຈາກັນຢ່າງມີປະສິດທິພາບ, ເຖິງຢ່າໃດກໍ່ຕາມອາດມີການປ່ຽນແປງຫາກການປຶກສາຫາລືບໍ່ປະສົບຄວາມສຳເລັດເມື່ອຄົບກຳນົດ 90 ວັນ.

- Advertisement -