ມາດາມທາວ ແມ່ຍິງຫວຽດນາມຜູ້ປະສົບຄວາມສຳເລັດທີ່ສຸດ ຈາກສາຍານາງຟ້າບິກິນີ້

ທ່ານ ນາງ ຫງວຽນ ທິ ເຟືອງ ທາວ (Nguyen Thi Phoun Thao) ມະຫາເສດຖີຍິງລະດັບພັນລ້ານໂດລາສະຫະລັດ ຄົນທຳອິດຂອງຫວຽດນາມ ຜູ້ສ້າງຕັ້ງຫວຽດເຈັດແອ (Vietjet Air) ສາຍການບິນເອກະຊົນແຫ່ງທຳອິດຂອງຫວຽດນາມ.

ເສັ້ນທາງຄວາມຮັ່ງມີຂອງທ່ານນາງ ຫງວຽນ ທິ ເຟືອງ ທາວ ຫຼື “ມາດາມທາວ” ຜູ້ສ້າງເງິນພັນລ້ານໂດລາສະຫະລັດດ້ວຍຕົວເອງ ທີ່ຖືວ່າເປັນແມ່ຍິງຫວຽດນາມຄົນທຳອິດທີ່ “ຄິດຕ່າງ” ແລະ “ຄິດໃຫຍ່” ບວກກັບຄວາມກ້າໃນການນຳສະເໜີສິ່ງທຳອິດໃຫ້ກັບຕະຫຼາດ ຫຼື ຜູ້ບໍລິໂພກໃນປະເທດ ໂດຍສະເພາະຢ່າງຍິ່ງການເປີດຕົວ “ຫວຽດເຈັດແອ” ໃນຖານະສາຍການບິນເອກະຊົນແຫ່ງທຳອິດຂອງຫວຽດນາມເມື່ອເດືອນທັນວາ 2011 ທີ່ທ່ານ ນາງ ໄດ້ສ້າງຄວາມຮືຮາເປັນກະແສໃຫ້ຄົນທົ່ວໂລກຮູ້ຈັກສາຍການບິນນ້ອຍໆແຫ່ງນີ້ ຈາກຍຸດທະສາດການຕະຫຼາດໃຫ້ສາວໂອແຕັດໃສ່ຊຸດບິກິນີ້.

ຫວຽດເຈັດແອ ໃນເວລາພຽງ 4 ປີໃນການກ້າວຈາກສູນ ຂຶ້ນມາເປັນສາຍການບິນອັນດັບ 1 ທີ່ມີສ່ວນແບ່ງການຕະຫຼາດແຊງໜ້າຫວຽດນາມແອລາຍ ສາຍການບິນແຫ່ງຊາດຫວຽດນາມ ທີ່ເປັນລັດວິສາຫະກິດ ແລະ ນຳຫວຽດເຈັດແອເຂົ້າສູ່ຕະຫຼາດຫຼັກຊັບໂຮ່ຈິມິນ ສຳເລັດເມື່ອເດືອນກຸມພາ 2017.

ຈາກປະຫວັດຂອງທ່ານ ນາງ ທາວ ເຊິ່ງປັດຈຸບັນອາຍຸ 49 ປີ ຈົບການສຶກສາປະລິນຍາຕີ ແລະ ເອກຈາກລັດເຊຍ, ເລີ່ມຫາເງິນລ້ານໂດລາໄດ້ຕັ້ງແຕ່ອາຍຸ 21 ປີ ຈາກການຂາຍເຄື່ອງແຟັກເອກະສານ ແລະ ຢາງພາລາ, ທ່ານ ນາງ ເລີ່ມທຸລະກິດຕັ້ງແຕ່ເປັນນັກສຶກສາປີທີ 2 ໂດຍການຊື້ສິນຄ້າ, ເຄື່ອງນຸ່ງ, ເຄື່ອງໃຊ້ຫ້ອງການ ແລະ ສິນຄ້າອຸປະໂພກບໍລິໂພກຈາກຍີ່ປຸ່ນ, ຮົງກົງ ແລະ ເກົາຫຼີໃຕ້ໄປຂາຍໃນລັດເຊຍ ແລະ ເອີຣົບຕາເວັນອອກ.

ຈາກນັ້ນທ່ານ ນາງ ໄດ້ເດີນທາງກັບປະເທດ ແລະ ໄດ້ກາຍເປັນໜຶ່ງໃນຜູ້ສ້າງຕັ້ງທະນາຄານເອກະຊົນແຫ່ງທຳອິດຂອງຫວຽດນາມ ທີ່ມີອາຍຸນ້ອຍທີ່ສຸດ ໃນຂະນະທີ່ອາຍຸພຽງ 20 ປາຍປີ ກ່ອນທີ່ຈະຂະຫຍາຍຕົວມາສູ່ທຸລະກິດອະສັງຫາລິມະຊັບ, ສາຍການບິນ ແລະ ອື່ນໆໃນເວລາຕໍ່ມາ.

ຈາກລາຍງານຜົນການດຳເນີນທຸລະກິດ 9 ເດືອນທຳອິດຂອງປີ 2018 ຂອງຫວຽດເຈັດແອ ທີ່ນຳສະເໜີໂດຍຕໍ່ຕະຫຼາດຫຼັກຊັບໂຮ່ຈິມິນ, ຫວຽດເຈັດແອມີສ່ວນແບ່ງຕະຫຼາດ 45% ນຳໜ້າຫວຽດນາມແອລາຍ ທີ່ມີສ່ວນແບ່ງ 38% ແລະ Jetstar Pacific ທີ່ມີສ່ວນແບ່ງ 15%. ຫວຽດເຈັດແອລາຍງານຜົນການດຳເນີນງານແຕ່ເດືອນມັງກອນ ເຖິງ ເດືອນກັນຍາ 2018 ມີລາຍຮັບເພີ່ມຂຶ້ນ 50.03% ຈາກໄລຍະດຽວກັນຂອງປີທີ່ຜ່ານມາ ເປັນມູນຄ່າເຖິງ 25.41 ລ້ານລ້ານດົງ (ປະມານ 109.77 ລ້ານໂດລາສະຫະລັດ : ອັດຕາແລກປ່ຽນ 16 ກຸມພາ 2019), ມີກຳໄລກ່ອນຫຼັກພາສີເພີ່ມຂຶ້ນ 15.5% ມູນຄ່າ 2.28 ລ້ານລ້ານດົງ (ປະມານ 98.49 ລ້ານໂດລາສະຫະລັດ).

ອັດຕາການຂະຫຍາຍຕົວຂອງປະລິມານຜູ້ໂດຍສານສາຍການບິນໃນຫວຽດນາມຮອບ 6 ປີທີ່ຜ່ານມາ (2012-2017) ມີຄ່າສະເລ່ຍ 28.9% ເຊິ່ງສ່ວນໃຫຍ່ແມ່ນຜູ້ໂດຍສານຈາກປະເທດໃນແຖບອາຊີ-ປາຊີຟິກເຊັ່ນ: ຈີນ 11.5%, ໄທ 11.1%, ເກົາຫຼີໃຕ້ 10.4% ແລະ ອິນເດຍ 10.1%. ປັດໄຈໜຶ່ງທີ່ຊ່ວຍຊຸກດັນການຂະຫຍາຍຕົວຄືການທ່ອງທ່ຽວຈາກຕ່າງປະເທດທີ່ເພີ່ມສູງເຖິງ 8.7% ຕໍ່ປີໃນໄລຍະເວລາດຽວກັນ ແຊງໜ້າປະເທດໄທ ທີ່ຢູ່ອັນດັບ 2 (8.6%).

ເຖິງຢ່າງໃດກໍ່ຕາມ, ນອກຈາກອັດຕາການຂະຫຍາຍຕົວທາງເສດຖະກິດ ແລະ ການທ່ອງທ່ຽວທີ່ສູງແລ້ວ, ອຸດສາຫະກຳການບິນທາງທຸລະກິດຂອງຫວຽດນາມຫາກໍ່ຢູ່ໃນຊ່ວງເລີ່ມຕົ້ນ ໂດຍເປັນໜຶ່ງໃນປະເທດມີອັດຕາສ່ວນຂອງຈຳນວນຍົນຕໍ່ຈຳນວນປະຊາຊົນຕ່ຳທີ່ສຸດຂອງໂລກ ປະມານ 1.7 ລຳຕໍ່ປະຊາກອນ 1 ລ້ານຄົນ, ທຽບກັບສິງກະໂປ 38.8 ລຳຕໍ່ 1 ລ້ານຄົນ ແລະ ໄທ 4.7 ລຳຕໍ່ 1 ລ້ານຄົນ.

ນອກຈາກນີ້, ລັກສະນະພູມສັນຖານຂອງຫວຽດນາມ ເຮັດໃຫ້ການເດີນທາງໂດຍຍົນໄດ້ປຽບການເດີນທາງປະເທດອື່ນໆ ເຊິ່ງການຂີ່ຍົນຈາກຮ່າໂນ້ຍ ໄປໂຮ່ຈິມິນ ໃຊ້ເວລາປະມານ 2 ຊົ່ວໂມງ, ການເດີນທາງດ້ວຍລົດ ແລະ ລົດໄຟປັດຈຸບັນໃຊ້ເວລາເຖິງ 34-35 ຊົ່ວໂມງ ເຮັດໃຫ້ປະຊາຊົນຜູ້ທີ່ມີລາຍໄດ້ເພີ່ມຂຶ້ນຕາມພາວະເສດຖະກິດທີ່ຂະຫຍາຍຕົວ ຫັນມາໃຊ້ບໍລິການການບິນຫຼາຍຂຶ້ນ ເນື່ອງຈາກລາຄາຄ່າປີ້ຍົນສູງກວ່າຄ່າລົດໂດຍສານພຽງເລັກໜ້ອຍ ແລະ ຖືກວ່າລົດໄຟ, ປັດໄຈເຫຼົ່ານີ້ ບວກກັບການບຸກເພື່ອເພີ່ມສ່ວນແບ່ງຕະຫຼາດຢ່າງຕໍ່ເນື່ອງ ມີສ່ວນເຮັດໃຫ້ຫວຽດເຈັດແອ ສາມາດບັນທຶກອັດຕາການຂະຫຍາຍຕົວຂອງຈຳນວນຜູ້ໂດຍສານສູງເຖິງ 69.8% ຕໍ່ປີໃນໄລຍະ 7 ປີທີ່ຜ່ານມາ (2012-2018).

ຈາກລາຍງານ ທີ່ນຳສະເໜີຕໍ່ຕະຫຼາດຫຼັກຊັບ ຫວຽດເຈັດແອມີຍອດສັ່ງຊື້ຍົນນັບຈາກນີ້ ເຖິງປີ 2025 ຫຼາຍເຖິງ 371 ລຳ, ປະກອບດ້ວຍແອບັສ A320/321 ຈຳນວນ 171 ລຳ ແລະ ໂບອິ້ງ 737MAX 200 ຈຳນວນ 200 ລຳ, ເຊິ່ງນັ້ນໝາຍເຖິງຫວຽດເຈັດແອຕັ້ງເປົ້າການຂະຫຍາຍຕົວໄວ້ບໍ່ຕ່ຳກວ່າ 7 ເທົ່າຕົວ ຈາກປັດຈຸບັນທີ່ມີຍົນທັງໝົດ 57 ລຳ ປະກອບດ້ວຍແອບັສ A320s ຈຳນວນ 23 ລຳ ແລະ A321s ຈຳນວນ 34 ລຳ (ຂໍ້ມູນ 30 ກັນຍາ 2018).

ທ່ານ ນາງ ຫງວຽນ ທິ ເຟືອງ ທາວ ຕັ້ງວິໄສທັດຫວຽດເຈັດແອຄື ຕ້ອງກ້າວຕໍ່ໄປໃນລະດັບພູມມິພາກ ແລະ ໃນລະດັບໂລກ ຜ່ານການສ້າງການຮ່ວມມື ແລະ ພັນທະມິດກັບສາຍການບິນອື່ນໆ ເຊິ່ງທີ່ຜ່ານມາບໍລິສັດໄດ້ມີການກະກຽມໄວ້ແລ້ວ ດ້ວຍການຈັດຫານັກບິນຈາກປະເທດຕ່າງໆຫຼາຍກວ່າ 30 ປະເທດທົ່ວໂລກ ເພື່ອຮອງຮັບການຂະຫຍາຍເສັ້ນທາງການເບິນຂອງຫວຽດເຈັດແອໄປຍັງປະເທດຕ່າງໆ ເຊິ່ງປັດຈຸບັນລາຍໄດ້ຈາກເສັ້ນທາງການບິນລະຫວ່າງປະເທດໄດ້ຂຶ້ນແຊງໜ້າລາຍໄດ້ຈາກການບິນພາຍໃນປະເທດແລ້ວ.

ປັດຈຸບັນ, ຫວຽດເຈັດແອບິນທັງໝົດ 103 ເສັ້ນທາງໃນໄລຍະ 9 ເດືອນທຳອິດຂອງປີ 2018 ປະກອບດ້ວຍເສັ້ນທາງການບິນພາຍໃນ 39 ເສັ້ນທາງ ແລະ ລະຫວ່າງປະເທດ 64 ເສັ້ນທາງ, ຫວຽດເຈັດແອ ສາມາດຈັດຢູ່ໃນມາດຕະຖານສູງສຸດຂອງໂລກລະດັບ 7 ດາວ ເປັນສາຍການບິນທີ່ສ້າງຜົນກຳໄລໄດ້ໄວທີ່ສຸດ ຄືສາມາດສ້າງກຳໄລໄດ້ພາຍໃນໄລຍະເວລາ 2 ປີ ຫຼັງຈາກເປີດດຳເນີນການ, ຂຶ້ນມາເປັນຜູ້ນຳຕະຫຼາດໄດ້ໃນເວລາພຽງ 4 ປີ, ປະສົບຄວາມສຳເລັດໃນການຂາຍຮຸ້ນໃນຕະຫຼາດຫຼັກຊັບ ແລະ ສາມາດສ້າງຜົນຕອບແທນ ແລະ ຄວາມສຸກໃຫ້ຜູ້ຖືຮຸ້ນໄດ້ຢ່າງແທ້ຈິງ ໂດຍມູນຄ່າຕະຫຼາດເພີ່ມຂຶ້ນເຖິງ 3 ເທົ່າຈາກເມື່ອຕອນອອກຮຸ້ນຄັ້ງທຳອິດ (IPO) ເມື່ອເດືອນກຸມພາ 2017 ເປັນປະມານ 3.6 ພັນລ້ານໂດລາສະຫະລັດໃນປັດຈຸບັນ.