ທາງການໄທມີແຜນປະກາດ ໃຫ້ງົດຂາຍສິ່ງມຶນເມົາໃນວັນສົງການ ເພື່ອຫຼຸດຜ່ອນອຸປະຕິເຫດ

ສື່ໄທລາຍງານ 17 ກຸມພາ 2019 ວ່າ: ຈາກການເກັບກຳສະຖິຕິໃນຊຸມປີຜ່ານໆມາ ແຕ່ປີ 2012-2016 ມີຜູ້ປະສົບອຸປະຕິເຫດໃນຊ່ວງສົງການທັງໝົດ 137,385 ຄົນ, ເຊິ່ງເປັນຜູ້ທີ່ດື່ມສິ່ງມຶນເມົາເຖິງ 44,590 ຄົນ ຫຼື 32.5% ຈາກອຸປະຕິເຫດທັງໝົດ ແລະ ມື້ທີ່ມີຜູ້ເສຍຊີວິດຫຼາຍທີ່ສຸດຄືວັນທີ 13 ເມສາ.

ຈາກຖິຕິດັ່ງກ່າວ, ເມື່ອວັນທີ 15 ກຸມພາ ທີ່ຜ່ານມາ, ກະຊວງສາທາລະນະສຸກ ແລະ ຄະນະກຳມະການຄວບຄຸມເຄື່ອງດື່ມມຶນເມົາຂອງໄທ ຈຶ່ງໄດ້ມີການປະຊຸມປຶກສາຫາລືເຖິງການຫຼຸດຜ່ອນອຸປະຕິເຫດໃນໄລຍະເທດສະການສົງການ ແລະ ມີມະຕິໃຫ້ວັນທີ 13 ເມສາ ເປັນວັນງົດການຈຳໜ່າຍເຄື່ອງດື່ມມຶນເມົາ.

ພາຍຫຼັງມີມະຕິແລ້ວ, ຂັ້ນຕອນຕໍ່ໄປໃນເດືອນມີນາທີ່ຈະມາເຖິງນີ້ ຈະໄດ້ນຳສະເໜີຕໍ່ກອງປະຊຸມຄະນະກຳມະການນະໂຍບາຍເຄື່ອງດື່ມມຶນເມົາແຫ່ງຊາດເພື່ອພິຈາລະນາ ໃຫ້ອອກປະກາດຈາກສຳນັກງານນາຍົກລັດຖະມົນຕີ ຫ້າມຈຳໜ່າຍເຄື່ອງດື່ມມຶນເມົາໃນວັນທີ 13 ເມສາ 2019 ເພື່ອເປັນຕົ້ນແບບ ຫາກປະສົບຄວາມສຳເລັດຈະມີການສະເໜີໃຫ້ປະກາດງົດຈຳໜ່າຍເຄື່ອງດື່ມມຶນເມົາໃນວັນທີ 13 ເມສາ ຂອງທຸກໆປີໃນຕໍ່ໜ້າ.

HTML tutorial