ສະຖານະການເຄັ່ງຕຶງ ອິນເດຍ-ປາກິດສະຖານ ຮຽກທູດຕົນກັບປະເທດ ຈາກເຫດໂຈມຕີລົດເມທະຫານອິນເດຍ

ສຳນັກຂ່າວຕ່າງປະເທດລາຍງານ 18 ກຸມພາ 2019 ວ່າ: ກະຊວງການຕ່າງປະເທດປາກິດສະຖານອອກຖະແຫຼງການ ເລື່ອງການຮຽກຕົວທ່ານ ໂຊເຮວ ມາໝູດ ເອກອັກຄະລັດຖະທູດປາກິດສະຖານ ປະຈຳນະຄອນຫຼວງນິວເດລີ ປະເທດອິນເດຍ ໃຫ້ເດີນທາງກັບປະເທດທັນທີ, ການເຄື່ອນໄຫວດັ່ງກ່າວເກີດຂຶ້ນພາຍຫຼັງທີ່ລັດຖະບານອິນເດຍ ຮຽກຕົວທ່ານ ອາເຈ ພິສາເຣຍ ເອກອັກຄະລັດຖະທູດອິນເດຍ ປະຈຳນະຄອນຫຼວງອິດສະລາມາບັດ ປະເທດປາກິດສະຖານ ໃຫ້ເດີນທາງກັບປະເທດ ພຽງບໍ່ພໍເທົ່າໃດຊົ່ວໂມງພາຍຫຼັງເກີດເຫດຄົນຮ້າຍຂັບລົດແລ່ນເຂົ້າໃສ່ແລ້ວລະເບີດຂ້າຕົວຕາຍ ໂຈມຕີຂະບວນລົດເມໂດຍສານຂອງທະຫານອິນເດຍ ທີ່ເຂດປຸລະວານາ ໃນລັດຊຳມູ ແລະ ກັສມີ ພາກເໜືອຂອງອິນເດຍ ທີ່ມີຊາຍແດນຕິດກັບພູມມິພາກແຄສເມຍຝັ່ງປາກິດສະຖານ ສົ່ງຜົນໃຫ້ມີທະຫານເສຍຊີວິດຫຼາຍກວ່າ 40 ຄົນ ເມື່ອວັນທີ 14 ກຸມພາ ທີ່ຜ່ານມາ.

ເຊິ່ງພາຍຫຼັງເກີດເຫດກຸ່ມຫົວຮຸນແຮງ “ຈາອິສ-ອີ-ໂມຮຳໝັດ” ເຊິ່ງມີຖານປະຕິບັດການຢູ່ໃນປາກິດສະຖານ ຮັບວ່າເປັນຜູ້ລົງມືກໍ່ເຫດ, ດ້ານລັດຖະບານປາກິດສະຖານປະຕິເສດການມີສ່ວນກ່ຽວຂ້ອງບໍ່ວ່າໃນທາງໃດກໍ່ຕາມ, ຂະນະທີ່ອິນເດຍຮຽກຮ້ອງປະເທດເພື່ອນບ້ານ ເພີ່ມຄວາມຈິງຈັງໃນການປາບປາມກຸ່ມຕິດອາວຸດ ແລະ ເຕືອນເລື່ອງໃຊ້ມາດຕະການຕອບໂຕ້ ເຊິ່ງເລີ່ມດ້ວຍການທີ່ທ່ານ ອະຣຸນ ເຈດຕະລີ ລັດຖະມົນຕີກະຊວງການເງິນຂອງອິນເດຍ ຖອນຊື່ປາກິດສະຖານອອກຈາກການເປັນພັນທະມິດທາງການຄ້າ ແລະ ຂຶ້ນພາສີສິນຄ້ານຳເຂົ້າຈາກປາກິດສະຖານເປັນ 200​% ມີຜົນບັງຄັບໃຊ້ຕັ້ງແຕ່ວັນທີ 16 ກຸມພາ 2019 ທີ່ຜ່ານມາ