ຜູ້ນຳເກົາຫຼີເໜືອ ອອກເດີນທາງດ້ວຍຂະບວນລົດໄຟມາຍັງຫວຽດນາມ

ສຳນັກຂ່າວຕ່າງປະເທດລາຍງານ 24 ກຸມພາ 2019 ໂດຍອ້າງອີງຈາກການລາຍງານຂອງສຳນັກຂ່າວກາງເກົາຫຼີ (KCNA) ວ່າຂະບວນລົດໄຟໂດຍສານຂອງທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ພ້ອມດ້ວຍຄະນະ ທີ່ລວມເຖິງທ່ານ ຄິມ ຢອງ-ຊອນ ຮອງປະທານຄະນະກຳມະການສູນກາງພັກແຮງງານເກົາຫຼີ ແລະ ທ່ານ ນາງ ຄິມ ໂຢ-ຈອງ ນ້ອງສາວ ອອກຈາກສະຖານທີ່ນະຄອນຫຼວງປຽງຢາງເມື່ອຕອນຄ່ຳຂອງວັນເສົາທີ່ຜ່ານມາ ຕາມເວລາທ້ອງຖິ່ນ ແລະ ເດີນທາງເຖິງເມືອງຕານຕົງ ມົນທົນຫຼຽວໜິງ ພາກຕາເວັນອອກສຽງເໜືອຂອງຈີນ ເມື່ອຄືນວັນເສົາຂອງວັນດຽວກັນ.

ເຖິງແມ່ນວ່າບໍ່ມີລາຍງານຢ່າງເປັນທາງການວ່າຂະບວນລົດໄຟຂອງຜູ້ນຳເກົາຫຼີເໜືອຈະໃຊ້ເສັ້ນທາງໃດ ແລະ ຈະຜ່ານນະຄອນຫຼວງປັກກິ່ງໃນຂາໄປ ຫຼື ຂາກັບ ແຕ່ເສັ້ນທາງລົດໄຟຕັ້ງແຕ່ຂົວຂ້າມແມ່ນ້ຳຢາລູ່ ທີ່ເປັນຊາຍແດນທາງທຳມະຊາດລະຫວ່າງຈີນກັບເກົາຫຼີເໜືອ ແລະ ກຳລັງເຈົ້າໜ້າທີ່ໃນເຄື່ອງແບບໄດ້ກັ້ນປະຊາຊົນໃຫ້ອອກຫ່າງຈາກລາງລົດໄຟບໍ່ຕ່ຳກວ່າ 100 ​ແມັດ ໃນເວລາດຽວກັນໂຮງແຮມແໜ່ງໜຶ່ງທີ່ຕັ້ງຢູ່ແຄມແມ່ນ້ຳຢາລູ່ປະກາດປິດປັບປຸງຢ່ງກະທັນຫັນ ແລະ ເຊີນແຂກທຸກຄົນອອກຈາກສະຖານທີ່ເມື່ອວັນສຸກ ທີ່ຜ່ານມາ ຍິ່ງເພີ່ມຄວາມເປັນໄປໄດ້ວ່າຄະນະຂອງທ່ານ ຄິມ ຈອງ-ອຶນ ອາດແວ່ພັກທີ່ໂຮງແຮມແຫ່ງນີ້, ຂະນະທີ່ມີລາຍງານວ່າ ຂະບວນລົດໄຟມີຄວາມຍາວກວ່າລົດໄຟທົ່ວໄປ ແລະ ເຄື່ອນທີ່ດ້ວຍຄວາມໄວຊ້າກວ່າປົກກະຕິ.

ໃນດ້ານຂອງກະຊວງການຕ່າງປະເທດຫວຽດນາມ ອອກຖະແຫຼງການເມື່ອວັນເສົາທີ່ຜ່ານມາ ມີເນື້ອໃນວ່າ ທ່ານ ຄິມ ຈອງ-ອຶນ ແລະ ຄະນະຈະເດີນທາງເຖິງນະຄອນຫຼວງຮ່າໂນ້ຍ ພາຍໃນອີກບໍ່ພໍເທົ່າໃດວັນຂ້າງໜ້າ ເພື່ອເຂົ້າຮ່ວມກອງປະຊຸມກັບທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລະຫວ່າງວັນທີ 27-28 ກຸມພາ 2019 ເຊິ່ງຈະເປັນການພົບປະຫາລືກັນຄັ້ງທີ 2 ຕໍ່ຈາກຄັ້ງທຳອິດ ເມື່ອວັນທີ 12 ມິຖຸນາ 2018 ທີ່ປະເທດສິງກະໂປ, ຂະນະດຽວກັນລັດຖະບານຫວຽດນາມ ໄດ້ຍົກລະດັບມາດຕະການຮັກສາຄວາມປອດໄພເປັນຂັ້ນສູງສຸດຢູ່ຈຸດຜ່ານແດນເມືອງດົງດາງ ແຂວງຫຼັ່ງເຊິນ ເຊິ່ງຕັ້ງຢູ່ພາກເໜືອຂອງປະເທດ ແລະ ມີຊາຍແດນຕິດກັບຈີນ ຕັ້ງແຕ່ວັນທີ 25 ເປັນຕົ້ນໄປ ແລະ ການປິດການຈະລາຈອນຂອງເສັ້ນທາງຫຼວງສາຍຫຼັກສູ່ນະຄອນຫຼວງຮ່າໂນ້ຍເກືອບຕະຫຼອດໄວໃນວັນທີ 26 ກຸມພາ 2019 ນີ້.

ເຊິ່ງການເດີນທາງໄປຕ່າງປະເທດດ້ວຍຂະບວນລົດໄຟຖືເປັນໜຶ່ງໃນທຳນຽມຂອງຕະກູນຄິມກໍ່ວ່າໄດ້ ໂດຍທ່ານ ຄິມ ອິວ-ຊຸງ ຜູ້ສະຖາປະນາສ້າງຕັ້ງປະເທດເກົາຫຼີເໜືອ ແລະ ເປັນປະທານປະເທດຕະຫຼອດການຂອງເກົາຫຼີເໜືອ ທີ່ເປັນປູ່ຂອງທ່ານ ຄິມ ຈອງ-ອຶນ ເຄີຍເດີນທາງຢ້ຽມຢາມຫວຽດນາມ ເມື່ອປີ 1958 ດ້ວຍການຂີ່ລົດໄຟຈົນເຖິງນະຄອນຫຼວງປັກກິ່ງແລ້ວຕໍ່ຍົນມາຍັງນະຄອນຫຼວງຮ່າໂນ້ຍ, ສ່ວນທ່ານ ຄິມ ຈອງ-ອິວ ພໍ່ຂອງທ່ານ ຄິມ ຈອງ-ອຶນ ຢ້ຽມຢາມລັດເຊຍດ້ວຍການຂີ່ລົດໄຟ ເມື່ອປີ 2001 ເຊິ່ງມີການວິເຄາະວ່າ ການທີ່ທ່ານ ຄິມ ຈອງ-ອຶນ ເລືອກທີ່ຈະຂີ່ລົດໄຟມາຍັງຫວຽດນາມ ອາດເປັນຄວາມຕ້ອງການສົ່ງສັນຍານວ່າ ຄວາມເປັນຕະກູນຄິມຍັງຄົງຢູ່ ແລະ ຍັງເຂັ້ມແຂງ.

- Advertisement -