ສປປ.ລາວ-ຫວຽດນາມ ລົງນາມເອກະສານການຮ່ວມມື 9 ສະບັບ

ວິທະຍຸກະຈາຍສຽງແຫ່ງຊາດລາຍງານວ່າ: ໂດຍຕອບສະໜອງຕາມຄຳເຊີນຂອງທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ຫງວຽນຟູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍຄະນະຜູ້ແທນຂັ້ນສູງຂອງພັກ-ລັດ ໄດ້ເດີນທາງມາຢ້ຽມຢາມ ສປປ.ລາວ ຢ່າງເປັນທາງການ ແຕ່ວັນທີ 24-25 ກຸມພາ 2019.

ພິທີຕ້ອນຮັບທ່ານ ຫງວຽນຟູຈ້ອງ ຢ່າງເປັນທາງການ ໄດ້ຈັດຂຶ້ນຢ່າງສົມກຽດ ທີ່ທຳນຽບປະທານປະເທດ ໂດຍມີ ທ່ານ ບຸນຍັງ ວໍລະຈິດ ແລະ ບັນດາການນຳຂັ້ນສູງຂອງລາວເຂົ້າຮ່ວມຢ່າງພ້ອມພຽງ.

ພາຍຫຼັງສຳເລັດພິທີຕ້ອນຮັບຢ່າງເປັນທາງການ ທີ່ທຳນຽບປະທານປະເທດແລ້ວ, ທັງສອງຝ່າຍໄດ້ດຳເນີນການພົບປະເຈລະຈາກັນ, ພາຍຫຼັງການພົບປະສອງຝ່າຍ, ທ່ານ ບຸນຍັງ ວໍລະຈິດ ແລະ ທ່ານ ຫງວຽນຟູຈ້ອງ ໄດ້ເປັນສັກຂີພິຍານ ໃນການລົງນາມບັນດາເອກະສານຮ່ວມມື ລະຫວ່າງ ສອງປະເທດ ຈຳນວນ 09 ສະບັບຄື:

  1. ສັນຍາລະຫວ່າງກະຊວງການເງິນລາວ ແລະ ກະຊວງການເງິນຫວຽດນາມ ວ່າດ້ວຍການກູ້ຢືມເງິນ,
  2. ສັນຍາວ່າດ້ວຍການຮ່ວມມືພັດທະນາພະລັງງານໄຟຟ້າ ແລະ ບໍ່ແຮ່ ລະຫວ່າງ ລັດຖະບານລາວ ແລະ ຫວຽດນາມ,
  3. ຂໍ້ຕົກລົງລະຫວ່າງ ລັດຖະບານລາວ ແລະ ຫວຽດນາມ ວ່າດ້ວຍການຂຸດຄົ້ນທ່າແຮງບົ່ມຊ້ອນໃນການກໍ່ສ້າງທາງລົດໄຟວຽງຈັນ-ຫວຸງອາງ,
  4. ບົດບັນທຶກການຮ່ວມມືລະຫວ່າງ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມລາວ ແລະ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຫວຽດນາມໃນຂົງເຂດຕ້ານການປ່ຽນແປງສະພາບດິນຟ້າອາກາດ ແລະ ອະນຸລັກຊີວະນາຯ ພັນ,
  5. ບົດບັນທຶກມອບ-ຮັບຖານຂໍ້ມູນຂ່າວສານພູມສັນຖານຮັບໃຊ້ການວາງແຜນພັດທະນາເສດຖະ ກິດ-ສັງຄົມ ແລະ ຕິດຕາມຊັບພະຍາກອນທໍາມະຊາດ ແລະ ສິ່ງແວດລ້ອມຢູ່ລາວ ລະຫວ່າງກະຊວງພາຍໃນລາວ ແລະ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມລາວຫວຽດນາມ,
  6. ບົດບັນທຶກການຮ່ວມມືວ່າດ້ວຍຈັດຕັ້ງຜັນຂະຫຍາຍປ່ຽນຖ່າຍອຸປະກອນໃຫ້ແກ່ວິທະຍຸກະ ຈາຍສຽງແຫ່ງຊາດລາວ ລະຫວ່າງ ກະຊວງ ຖະແຫລງຂ່າວ ວັດທະນະທຳ ແລະ ທ່ອງທ່ຽວລາວ ແລະ ວິທະຍຸກະຈາຍສຽງແຫ່ງຊາດຫວຽດນາມ,
  7. ບົດບັນທຶກມອບ-ຮັບໂຄງການສ້າງສູນບໍລິການເຕັກນິກກະສິກຳແຂວງ ຫົວພັນ ລະຫວ່າງລັດຖະບານລາວ ແລະ ລັດຖະບານຫວຽດນາມ,
  8. ຂໍ້ຕົກລັງລະຫວ່າງຄະນະຮັບຜິດຊອບພິພິດທະພັນໄກສອນ ພົມວິຫານ ແລະ ກະຊວງ ວັດທະນະທຳ ແລະ ທ່ອງທ່ຽວຫວຽດນາມ ວ່າດ້ວຍການປະຕິບັດໂຄງການສ້ອມແປງ, ຍົກລະດັບອະນຸສອນສະຖານປະທານ ໂຮຈິມິນ ຢູ່ ບ້ານ ຊຽງຫວາງ, ເມືອງໜອງບົກ ແຂວງ ຄຳມ່ວນ
  9. ບົດບັນທຶກການມອບ-ຮັບ ໂຄງການເພີ່ມທະວີຄວາມອາດສາມາດໃນການຄົ້ນຄ້ວາວິທະຍາສາດ ແລະ ພັດທະນາເຕັກໂນໂລຊີ ໃຫ້ແກ່ສະພາວິທະຍາສາດແຫ່ງຊາດລາວ ລະຫວ່າງສະພາວິທະຍາສາດແຫ່ງຊາດລາວ ແລະ ສະພາບັນດິດວິທະຍາສາດ-ເຕັກໂນໂລຊີຫວຽດນາມ.
- Advertisement -