ກອງທັບມຽນມາບໍ່ພໍໃຈ ທີ່ທ່ານ ນາງ ອອງ ຊານ ຊູຈີ ຕ້ອງການແກ້ໄຂລັດຖະທຳມະນູນ

ສຳນັກຂ່າວຕ່າງປະເທດລາຍງານ 24 ກຸມພາ 2019 ວ່າ: ເຈົ້າໜ້າທີ່ລະດັບສູງຈາກຄະນະກຳມາທິການການຂ່າວກອງທັບມຽນມາ ໄດ້ຈັດຖະແຫຼງເມື່ອວັນເສົາທີ່ຜ່ານມາ ກ່ຽວກັບການທີ່ລັດຖະບານພາຍໃຕ້ການນຳຂອງທ່ານ ນາງ ອອງ ຊານ ຊູຈີ ມີຄວາມຕ້ອງການແກ້ໄຂບາງມາດຕາ ຂອງລັດຖະທຳມະນູນສະບັບປັດຈຸບັນ ທີ່ໃຊ້ມາຕັ້ງແຕ່ປີ 2008 ແລະ ຂຽນຂຶ້ນໂດຍກອງທັບວ່າ ຝ່າຍທະຫານບໍ່ເຫັນດີເປັນຢ່າງຍິ່ງຕໍ່ກັບຄວາມພະຍາຍາມໃນການປ່ຽນແປງເນື້ອໃນສຳຄັນຂອງລັດຖະທຳມະນູນ.

ເຊິ່ງທ່ານ ພົນຕີ ຕຸນ ຕຸນ ຢີ ກ່າວວ່າກອງທັບບໍ່ຄັດຄ້ານການແກ້ໄຂລັດຖະທຳມະນູນ ແຕ່ບໍ່ເຫັນດີກັບແນວທາງປະຕິບັດທີ່ບໍ່ເປັນທຳ ໂດຍຈາກຈຳນວນສະມາຊິກຄະນະກຳມາທິການຮ່າງລັດຖະທຳມະນູນຈຳນວນ 45 ທ່ານ ເຊິ່ງສະພາທີ່ມີພັກສັນນິບາດແຫ່ງຊາດເພື່ອປະຊາທິປະໄຕ ຂອງທ່ານ ນາງ ອອງ ຊານ ຊູຈີນ ຄອງສຽງສ່ວນໃຫຍ່ທັງໃນສະພາລ່າງ ແລະ ສະພາສູງ ຈະມີສັດສ່ວນຫຼາຍເຖິງ 18 ທ່ານ, ໃນຂະນະທີ່ຕົວແທນຈາກກອງທັບມີພຽງ 8 ທ່ານ ແລະ ທີ່ເຫຼືອຈະເປັນການແບ່ງສ່ວນລະຫວ່າງພັກການເມືອງຂະໜາດນ້ອຍໃນສະພາ ທີ່ເກືອບບໍ່ມີອຳນາດຕໍ່ລອງຫຍັງ.

ໃນດ້ານຂອງທ່ານ ພົນເອກ ພິເສດ ຖັ່ນ ຊໍ ເຊິ່ງເປັນສະມາຊິກສະພາໃນໂຄຕ້າຂອງກອງທັບກ່າວວ່າ ທະຫານຈະເຂົ້າຮ່ວມເປັນສ່ວນໜຶ່ງຂອງຄະນະກຳມາທິການປະຕິຮູບຊຸດນີ້ໃນສັດສ່ວນທີ່ກຳນົດ ແຕ່ຈະຄັດຄ້ານການປ່ຽນແປງໃດກໍ່ຕາມທີ່ຈະສົ່ງຜົນຕໍ່ແກ່ນແທ້ຂອງລັດຖະທຳມະນູນ, ໂດຍການສະແດງຈຸດຢືນຂອງກອງທັບມຽນມາຄັ້ງນີ້ ສອດຄ່ອງກັບຄຳກ່າວຂອງທ່ານ ພົນເອກ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດ ທີ່ໃຫ້ສຳພາດກັບໜັງສືພິມອາຊາຮີຂອງຍີ່ປຸ່ນ ເມື່ອອາທິດທີ່ຜ່ານມາວ່າ ກອງທັບມຽນມາບໍ່ຕໍ່ຕ້ານການແກ້ໄຂລັດຖະທຳມະນູນ ແຕ່ການປ່ຽນແປງທີ່ຈະເກີດຂຶ້ນຕ້ອງບໍ່ສົ່ງຜົນກະທົບຕໍ່ຫຼັກການພື້ນຖານ.

ຂະນະທີ່ນັກວິເຄາະຕີລາຄາວ່າ: ມາດຕາທີ່ມີຄວາມເປັນໄປໄດ້ຫຼາຍທີ່ສຸດວ່າຈະມີການຕີຄວາມໝາຍໃໝ່ຄື ມາດຕາ 436 ທີ່ເປີດໂອກາດໃຫ້ກອງທັບສາມາດໃຊ້ອຳນາດຢຸດຢັ້ງມະຕິກອງປະຊຸມ ຫຼື ການສະເໜີແກ້ໄຂຮ່າງກົດໝາຍໃດກໍ່ຕາມ, ສ່ວນມາດຕາກ່ຽວກັບການຫ້າມບຸກຄົນທີ່ມີຄູ່ສົມລົດເປັນຊາວຕ່າງປະເທດຈາກການດຳລົງຕຳແໜ່ງປະທານປະເທດ ທີ່ແນ່ນອນວ່າກອງທັບຂຽນມາດຕານີ້ຂຶ້ນມາເພື່ອປ້ອງກັນ ບໍ່ໃຫ້ທ່າງ ນາງ ອອງ ຊານ ຊູຈີ ຂຶ້ນສູ່ຕຳແໜ່ງສູງສຸດທາງການເມືອງຢ່າງເປັນທາງການ ອາດຍັງບໍ່ຈຳເປັນໃນຕອນນີ້ ເນື່ອງຈາກນັບຕັ້ງແຕ່ເຂົ້າມາບໍລິຫານປະເທດເມື່ອເດືອນເມສາ 2017 ອຳນາດບໍລິຫານທັງໝົດຢູ່ທີ່ທ່ານ ນາງ ອອງ ຊານ ຊູຈີນ ໃນຖານະທີ່ປຶກສາແຫ່ງລັດ ເຊິ່ງເປັນຕຳແໜ່ງທີ່ລັດຖະບານຕັ້ງຂຶ້ນເພື່ອໃຫ້ທ່ານ ນາງ ເປັນຜູ້ນຳທາງພຶດຕິໄນຫຼາຍກວ່າປະທານປະເທດຄົນປັດຈຸບັນຄື ທ່ານ ອູ ວິນ ມິນ ເຊິ່ງເປັນໜຶ່ງໃນພັນທະມິດຍາວນານຂອງທ່ານ ນາງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube