ຜູ້ນຳເກົາຫຼີເໜືອ ເດີນທາງເຖິງປະເທດຫວຽດນາມແລ້ວ (ວິດີໂອ)

ສຳນັກຂ່າວຕ່າງປະເທດລາຍງານ 26 ກຸມພາ 2019 ວ່າ: ຂະບວນລົດໄຟສາຍພິເສດຂອງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ແລະ ຄະນະທີ່ລວມເຖິງທ່ານ ຄິມ ຢອງ-ຊອນ ຮອງປະທານຄະນະກຳມະການສູນກາງພັກແຮງງານເກົາຫຼີ ແລະ ທ່ານ ນາງ ຄິມ ໂຢ-ຈອງ ນ້ອງສາວ ໄດ້ຈອດທຽບສະຖານທີ່ໃນເມືອງດົ່ງດາງ ແຂວງຫຼັ່ງເຊິນ ເຊິ່ງຕັ້ງຢູ່ພາກເໜືອສຸດຂອງປະເທດຫວຽດນາມ ເມື່ອຕອນເຊົ້າຂອງວັນອັງຄານນີ້ ຕາມເວລາທ້ອງຖິ່ນ ພາຍຫຼັງໃຊ້ເວລາເດີນທາງ 2 ມື້ເຄິ່ງ ເປັນໄລຍະທາງເຖິງ 4,000 ກິໂລແມັດ.

ເຊິ່ງຜູ້ນຳເກົາຫຼີເໜືອໄດ້ຮັບການຕ້ອນຮັບຈາກເຈົ້າໜ້າທີ່ລະດັບສູງຂອງພັກຄອມມູນິດຫວຽດນາມ ຕົວແທນເຍົາວະຊົນທີ່ມອບຊໍ່ດອກໄມ້ໃຫ້ ແລະ ການກວດແຖວກອງທະຫານກຽດຕິຍົດ ກ່ອນອອກເດີນທາງຕໍ່ດ້ວຍລົດອີກເປັນໄລຍະທາງ 170 ກິໂລແມັດສູ່ນະຄອນຫຼວງຮ່າໂນ້ຍ ທ່າມກາງມາດຕະການຮັກສາຄວາມປອດໄພຢ່າງເຂັ້ມງວດຂັ້ນສູງສຸດ ໂດຍລັດຖະບານຫວຽດນາມປິດການຈະລາຈອນຕາມເສັ້ນທາງສາຍຫຼັກຈາກແຂວງຫຼັ່ງເຊິນສູ່ນະຄອນຫຼວງຮ່າໂນ້ຍຕະຫຼອດວັນທີ 26 ກຸມພານີ້.

US President Donald Trump boards Air Force One before departing from Joint Base Andrews in Maryland, February 25, 2019, as he travels to Hanoi, Vietnam for a second summit with North Korean leader Kim Jong Un. (Photo by MANDEL NGAN / AFP)

ຂະນະທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ເດີນທາງດ້ວຍຍົນໂດຍສານປະຈຳຕຳແໜ່ງ Air Force One ມີກຳນົດເຖິງນະຄອນຫຼວງຮ່າໂນ້ຍໃນຕອນຄ່ຳຂອງວັນອັງຄານນີ້ ໂດຍຄະນະຜູ້ຕິດຕາມຂອງທ່ານ ໂດໂນ ທຣຳ ລວມມີທ່ານໄມ ພອມແພວ ລັດຖະມົນຕີກະຊວງການຕ່າງປະເທດ ທີ່ຢ້ຽມຢາມນະຄອນຫຼວງຮ່າໂນ້ຍຫຼາຍຄັ້ງຕັ້ງແຕ່ຮັບຕຳແໜ່ງເມື່ອເດືອນເມສາ ປີທີ່ຜ່ານມາ.

ສຳລັບການພົບປະຫາລືລະຫວ່າງຜູ້ນຳສະຫະລັດ ອາເມຣິກາ ກັບຜູ້ນຳເກົາຫຼີເໜືອ ທີ່ຈະເກີດຂຶ້ນໃນນະຄອນຫຼວງຮ່າໂນ້ຍລະຫວ່າງວັນທີ 27-28 ກຸມພານີ້ ຖືເປັນການປະຊຸມຮ່ວມກັນຢ່າງເປັນທາງການຄັ້ງທີ 2 ຕໍ່ຈາກການປະຊຸມຄັ້ງທຳອິດທີ່ປະເທດສິງກະໂປ ເມື່ອວັນທີ 12 ມິຖຸນາ 2018 ທີ່ຜ່ານມາ, ເຖິງຢ່າງໃດກໍ່ຕາມ ຫຼາຍຝ່າຍໃຫ້ຄວາມເຫັນໄປໃນທິດທາງດຽວກັນວ່າ ເກືອບບໍ່ມີຄວາມຄືບໜ້າເກີດຂຶ້ນ ພາຍຫຼັງການປະຊຸມທີ່ສິງກະໂປ ໂດຍສະເພາະເລື່ອງການປົດອາວຸດນິວເຄຼຍ ທີ່ສະຫະລັດ ອາເມຣິກາ ແລະ ເກົາຫຼີເໜືອຕ່າງກໍ່ຍັງມີທ່າທີບໍ່ຊັດເຈນ ຕະຫຼອດຮອດການທີ່ລັດຖະບານເກົາຫຼີເໜືອຢືນຢັນຄວາມຕ້ອງການໃຫ້ສະຫະລັດ ອາເມຣິກາຜ່ອນຄາຍມາດຕະການຂວໍ້າບາດ ແລະ ການປົດອາວຸດນິວເຄຼຍຂອງເກົາຫຼີເໜືອຕ້ອງບໍ່ແມ່ນການດຳເນີນການແຕ່ພຽງຝ່າຍດຽວ ສ່ວນຄະນະຂອງທ່ານ ໂດໂນ ທຣຳ ຍັງຄົງຢ້ຳເຖິງມາດຕະການຂວໍ້າບາດຈົນກວ່າຂະບວນການປົດອາວຸດນິວເຄຼຍຈະສຳເລັດສົມບູນ ແລະ ບັນຫາການຫຼຸດຈຳນວນທະຫານອາເມຣິກາໃນເກົາຫຼີໃຕ້ຈະບໍ່ລວມຢູ່ໃນຫົວຂໍ້ຂອງການປະຊຸມຄັ້ງນີ້.