ອິນເດຍເປີດສາກໂຈມຕີທາງອາກາດ ໃນແຄສເມຍ ພື້ນທີ່ຄວາມຂັດແຍ່ງກັບປາກິດສະຖານ

ສຳນັກຂ່າວຕ່າງປະເທດລາຍງານ 26 ກຸມພາ 2019 ວ່າ​:​ ທ່ານພົນຕີ ອາຊີບ ກາຟູ ໂຄສົກກອງທັບປາກິດສະຖານ ຖະແຫຼງວ່າ ຍົນຂອງກອງທັບອິນເດຍຫຼາຍລຳ ປະຕິບັດການໂຈມຕີທາງອາກາດຂ້າມເສັ້ນຄວບຄຸມ (LoC) ເຊິ່ງເປັນເຂດຢຸດຍິງໃນແຄສເມຍ ພູມມິພາກທີ່ຢູ່ທາງພາກເໜືອຂອງອິນເດຍ ແລະ ເປັນພື້ນທີ່ຄວາມຂັດແຍ່ງທີ່ຍາດຊິງກັນລະຫວ່າງອິນເດຍ ກັບປາກິດສະຖານມາຫຼາຍທົດສະວັດ ໂດຍຜົນການກວດສອບໃນເບື້ອງຕົ້ນພົບວ່າເປົ້າໝາຍຖືກໂຈມຕີຈົນເສຍຫາຍຫຼາຍສົມຄວນ.

ເຖິງແມ່ນຍັງບໍ່ມີລາຍງານວ່າເກີດຄວາມເສຍຫາຍກັບລະບົບໂຄງສ້າງພື້ນຖານຂະໜາດໃຫຍ່ຂອງປາກິດສະຖານໃນບໍລິເວນທີ່ມີການໂຈມຕີຄື: ເຂດມູຊາຟາຣາບັດ ເຊິ່ງເປັນພື້ນທີ່ສ່ວນໜຶ່ງຂອງແຄສເມຍ ທີ່ຢູ່ໃນອານາເຂດຂອງປາກິດສະຖານຫຼືບໍ່, ເຊັ່ນດຽວກັບຈຳນວນຜູ້ເສຍຊີວິດ ແລະ ຜູ້ໄດ້ຮັບບາດເຈັບ ແຕ່ປະຕິບັດການດັ່ງກ່າວຂອງອິນເດຍຖືວ່າລະເມີດອະທິປະໄຕ ແລະ ຂໍ້ຕົກລົງຢຸດຍິງສະບັບປີ 2003 ຢ່າງຊັດເຈນ ແລະ ກອງທັບປາກິດສະຖານຈະຕອບໂຕ້ຕາມຄວາມເໝາະສົມ.

ຕໍ່ມາທ່ານ ປະກາດ ຈາວາເດກາ ລັດຖະມົນຕີກະຊວງພັດຍາກອນມະນຸດດຂອງອິນເດຍ ກ່າວວ່າປະຕິບັດການດັ່ງກ່າວຂອງກອງທັບອິນເດຍ ເປັນໄປຕາມຄຳສັ່ງຂອງທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ເຊິ່ງປະກາດມອບອຳນາດຢ່າງເຕັມທີ່ໃຫ້ແກ່ກອງທັບໃນການປະຕິບັດການດ້ານຄວາມໝັ້ນຄົງໃນແຄສເມຍ ເພື່ອປົກປ້ອງອະທິປະໄຕຂອງປະເທດ ແລະ ຢືນຢັນວ່າເປົ້າໝາຍຂອງການໂຈມຕີໃນຄັ້ງນີ້ ຄືເຂດທີ່ໝັ້ນຂອງກຸ່ມຈາອິສ-ອີ-ໂມຮຳເໝັດ ເຊິ່ງສະມາຊິກສ່ວນໃຫຍ່ຫຼົບຊ້ອນຢູ່ໃນປາກິດສະຖານ ແລະ ອ້າງວ່າເປັນຜູ້ຢູ່ເບື້ອງຫຼັງເຫດການລະເບີດໂຈມຕີລົດເມໂດຍສານຂອງທະຫານອິນເດຍ ທີ່ເຂດປຸລະວາມາ ໃນລັດຊຳມູ ແລະ ກັສມີ ເມື່ອວັນທີ 14 ກຸມພາ ທີ່ຜ່ານມາ ເຮັດໃຫ້ມີທະຫານເສຍຊີວິດຫຼາຍກວ່າ 40 ຄົນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube