ເປີດເຜີຍວາລະກອງປະຊຸມສຸດຍອດ ຄັ້ງທີ II ຜູ້ນຳ ສ.ອາເມຣິກາ ແລະ ເກົາຫຼີເໜືອ

ສຳນັກຂ່າວຕ່າງປະເທລາຍງານ 27 ກຸມພາ 2019 ວ່າ: ກອງປະຊຸມສຸດຍອດລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ຄັ້ງທີ 2 ຈະເປີດສາກຂຶ້ນທີ່ໂຮງແຮມໂຊຟິເທວ ເລເກັນ ເມໂທຣໂພ (Sofitel Legend Metropole) ໃນນະຄອນຫຼວງຮ່າໂນ້ຍ ປະເທດຫວຽດນາມ ເວລາ 18:30 ຕາມເວລາທ້ອງຖິ່ນ ໂດຍທ່ານ ໂດໂນ ທຣຳ ແລະ ທ່ານ ຄິມ ຈອງ-ອຶນ ຈະເດີນທາງມາເຖິງໂຮງແຮມ ແລະ ພົບປະຫາລືກັນແບບຕົວຕໍ່ຕົວໃນເວລາ 18:40 ໂມງ ເຊິ່ງຄາດວ່າທັງສອງຈະໃຊ້ເວລາສົນທະນາກັນປະມານ 20 ນາທີ.

ຈາກນັ້ນທັງສອງຈະຮັບປະທານອາຫານຄ່ຳຮ່ວມກັນໃນເວລາ 19:00 ໂມງ ໂດຍຈະມີເຈົ້າໜ້າທີ່ລະດັບສູງຂອງທັງສອງຝ່າຍເຂົ້າຮ່ວມນຳ ເຊິ່ງຄາດວ່າຝ່າຍສະຫະລັດ ອາເມຣິກາ ຈະມີທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ແລະ ທ່ານ ມິກ ມັນເວນີ ຜູ້ຮັກສາການຕຳແໜ່ງເສນາທິການປະຈຳທຳນຽບຂາວ, ສ່ວນຝ່າຍເກົາຫຼີເໜືອຈະມີທ່ານ ຄິມ ຢອງ-ຊອນ ມືຂວາ ແລະ ທ່ານ ນາງ ຄິມ ໂຢ-ຈອງ ນ້ອງສາວຂອງຜູ້ນຳເກົາຫຼີເໜືອ.

ພາຍຫຼັງຮັບປະທານອາຫານຄ່ຳ ທັງສອງຝ່າຍຈະແຍກຍ້າຍກັນເດີນທາງກັບໂຮງແຮມທີ່ພັກຂອງຕົນ ໂດຍທ່ານ ໂດໂນ ທຣຳຈະກັບໂຮງແຮມ ເຈດັບເບິນຢູ ແມຣິອັອດ (J.W. Marriott), ສ່ວນທ່ານ ຄິມ ຈອງ-ອຶນ ຈະເດີນທາງກັບໂຮງແຮມເມເລຍ (Melia Hanoi) ຮ່າໂນ້ຍ ເພື່ອກຽມປະຊຸມຢ່າງເປັນທາງການໃນມື້ຖັດໄປ.

ສຳລັບການເຈລະນາໃນຫົວຂໍ້ສຳຄັນຕ່າງໆເຊັ່ນ: ການປົດອາວຸດນິວເຄຼຍນັ້ນ ແມ່ນຈະເຈລະຈາກັນໃນວັນທີ 28 ກຸມພາ 2019.

ບັນດານັກວິເຄາະເຊື່ອວ່າ: ຄະນະຂອງທ່ານ ໂດໂນ ທຣຳ ຕ້ອງການນຳສະເໜີຮູບແບບການພັດທະນາປະເທດແບບຫວຽດນາມໃຫ້ເກົາຫຼີເໜືອພິຈາລະນາປັບໃຊ້ກັບປະເທດຕົນ ໂດຍພະຍາຍາມຈະສະແດງໃຫ້ເຫັນວ່າ ຜົນຈາກການປັບປ່ຽນສາຍພົວພັນກັບສະຫະລັດ ອາເມຣິກາ ແລະ ການເດີນໜ້າປະຕິຮູບຕະຫຼາດຂອງຫວຽດນາມ ເຮັດໃຫ້ເສດຖະກິດຂອງຫວຽດນາມເຕີບໃຫຍ່ຂະຍຫາຍຕົວຢ່າງວ່ອງໄວ ແລະ ສິ່ງທີ່ເກົາຫຼີເໜືອຄວນປະຕິບັດຄືການຢຸດຕິໂຄງການພັດທະນາອາວຸດນິວເຄຼຍ ເພື່ອອະນາຄົດທີ່ດີກວ່າ, ໂດຍຫວຽດນາມໄດ້ປ່ຽນສະຖານະສາຍພົວພັນກັບສະຫະລັດ ອາເມຣິກາຈາກສັດຕູໃນສະໄໝສົງຄາມຫວຽດນາມ, ສົງຄາມເຢັນ ມາເປັນພັນທະມິດໃກ້ຊິດພາຍໃນໄລຍະເວລາບໍ່ເຖິງ 50 ປີ.

ໃນດ້ານຂອງທ່ານ ຫງວຽນ ຊວນ-ຟຸກ ນາຍົກລັດຖະມົນຕີຫວຽດນາມ ໃນຖານະເຈົ້າພາບຈັດກອງປະຊຸມໃນເທື່ອນີ້ ໄດ້ອວຍພອນໃຫ້ກອງປະຊຸມປະສົບຄວາມສຳເລັດ ແລະ ເກີດໝາກຜົນທີ່ເປັນປະໂຫຍດ “ເພື່ອສັນຕິພາບຂອງໂລກ ເພື່ອເຊື່ອມຈອດເຖິງກັນ ແລະ ກັນໃນການພັດທະນາຍຸກແຫ່ງການເຊື່ອມໂຍງໃນທົ່ວໂລກ ຈັບມືພັດທະນາໄປດ້ວຍກັນ ແລະ ຮ່ວມກັນສ້າງສະຖຽນລະພາບໃຫ້ກັບໂລກ”.