ປາກິດສະຖານຈັບນັກບິນອິນເດຍ ເປັນຊະເລີຍເສິກ

ສຳນັກຂ່າວຕ່າງປະເທດລາຍງານ 28 ກຸມພາ 2019 ວ່າ: ກະຊວງການຕ່າງປະເທດອິນເດຍອອກຖະແຫຼງເມື່ອວັນພຸດທີ່ຜ່ານມາ ໃຫ້ປາກິດສະຖານປ່ອຍຕົວທ່ານ ອະພິນັນທານ ໂດຍດ່ວນທີ່ສຸດ ແລະ ດ້ວຍຄວາມປອດໄພ, ເຊິ່ງທ່ານ ອະພິນັນທານກາຍເປັນຊະເລີຍເສິກຫຼັງຈາກຍົນຮົບມິກ-21 ຂອງກອງທັບອິນເດຍຖືກຍິງຕົກໃນເຂດແຄສເມຍຝັ່ງປາກິດສະຖານ ຈາກການບິນຂ້າມເສັ້ນແບ່ງຄວບຄຸມ (LOC) ເຊິ່ງເປັນເຂດຢຸດຍິງໃນພູມມິພາກແຄສເມຍ ເມື່ອວັນພຸດ ທີ່ຜ່ານມາ, ສ່ວນຍົນອີກລຳໜຶ່ງເຖິງແມ່ນວ່າຈະສາມາດບິນກັບມາຕົກໃນເຂດແດນຂອງອິນເດຍໄດ້ ແຕ່ນັກບິນເທິງຍົນທັງສອງຄົນເສຍຊີວິດ ແລະ ປະຊາຊົນອີກໜຶ່ງຄົນເສຍຊີວິດ.

ໃນດ້ານຂອງທ່ານ ນາງ ສຸສະມາ ສະວະຣາດ ລັດຖະມົນຕີກະຊວງການຕ່າງປະເທດອິນເດຍ ໄດ້ເດີນທາງຢ້ຽມຢາມນະຄອນຫຼວງປັກກິ່ງເປັນການດ່ວນ ເພື່ອພົບປະຫາລືກັບເຈົ້າໜ້າທີ່ລະດັບສູງຂອງທາງການຈີນ ແລະ ລັດເຊຍ ເຊິ່ງທ່ານ ນາງກ່າວໃນເວລາຕໍ່ມາວ່າ ລັດຖະບານອິນເດຍບໍ່ຕ້ອງການໃຫ້ສະຖານະການບານປາຍໄປຫຼາຍກວ່ານີ້ ແລະ ຢືນຢັນວ່າອິນເດຍຈະສະແດງອອກດ້ວຍຄວາມສຸຂຸມ ແລະ ອົດທົນອົດກັ້ນ.

ຂະນະທີ່ທ່ານ ພົນຕີ ອາຊີບ ກາຟູ ໂຄສົກກອງທັບປາກິດສະຖານ ຢືນຢັນວ່າປາກິດສະຖານບໍ່ຕ້ອງການເຮັດສົງຄາມກັບອິນເດຍເຊັ່ນກັນ ແລະ ກ່າວເຖິງສະຖານະຂອງທ່ານ ອະພິນັນທານ ວ່າໄດ້ຮັບການເບິ່ງແຍງເປັນຢ່າງດີຕາມຄວາມເໝາະສົມ ບົນພື້ນຖານຂອງຫຼັກການສົງຄາມ ພ້ອມທັງປະຕິເສດລາຍງານຂອງສື່ອິນເດຍວ່າ ຍົນຂັບໄລ່ F-16 ຂອງປາກິດສະຖານຖືກຍິງຕົກໃນເຂດແຄສເມຍຝັ່ງອິນເດຍ ສ່ວນສຳນັກງານການບິນພົນລະເຮືອນຂອງປາກິດສະຖານອອກຄຳສັ່ງປິດນ່ານຟ້າທົ່ວປະເທດໂດຍບໍ່ມີກຳນົດ.

ຕໍ່ມາທ່ານ ອິມຣານ ຂ່ານ ນາຍົກລັດຖະມົນຕີປາກິດສະຖານ ຖະແຫຼງຜ່ານສະຖານນີໂທລະພາບແຫ່ງຊາດວ່າ ກໍລະນີນີ້ບໍ່ມີໃຜເປັນຝ່າຍຊະນະ ແຕ່ກອງທັບປາກິດສະຖານຕ້ອງປະຕິບັດການດັ່ງກ່າວ ເພື່ອສະແດງໃຫ້ອິນເດຍໄດ້ເຫັນແຈ້ງເຊັ່ນກັນວ່າ ລັດຖະບານປາກິດສະຖານພ້ອມປົກປ້ອງ ແລະ ຕອບໂຕ້ເມື່ອອະທິປະໄຕຖືກລ່ວງລ້ຳ ພ້ອມທັງສະເໜີເຈລະຈາກັບທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ເຊິ່ງຍັງບໍ່ສະແດງທ່າທີຢ່າງເປັນທາງການຕໍ່ການຮຽກຮ້ອງຈາກຜູ້ນຳປາກິດສະຖານ ແຕ່ຮຽກປະຊຸມໜ່ວຍງານດ້ານຄວາມໝັ້ນຄົງທັງໝົດເປັນການສຸກເສີນ.

ໃນອີກດ້ານໜຶ່ງທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຈີນ ກ່າວວ່າລັດຖະບານຈີນມີຄວາມເປັນຫ່ວງຢ່າງຍິ່ງ ຕໍ່ສະຖານະການຫຼ້າສຸດໃນແຄສເມຍ ທີ່ຖືເປັນຄັ້ງທຳອິດນັບຕັ້ງແຕ່ປີ 1971 ທີ່ທັງສອງຝ່າຍຕ່າງໂຈມຕີຂ້າມເສັ້ນແບ່ງ LOC ພ້ອມທັງເປີດເຜີຍວ່າ ຈະຊຸກດັນເລື່ອງນີ້ເຂົ້າສູ່ສະພາຄວາມໝັ້ນຄົງແຫ່ງສະຫະປະຊາຊາດ, ເຖິງຢ່າງໃດກໍ່ຕາມ ທ່ານ ອາຊາດ ມາຈີດຂ່ານ ເອກອັກຄະລັດຖະທູດປາກິດສະຖານປະຈຳນະຄອນຫຼວງວໍຊິງຕັນ ກ່າວວ່າລັດຖະບານປາກິດສະຖານຜິດຫວັງເປັນຢ່າງຍິ່ງ ຕໍ່ທ່າທີຂອງສະຫະລັດ ອາເມຣິກາ ເຊິ່ງເຂົ້າຂ້າງລັດຖະບານອິນເດຍ ຈາກການທີ່ບໍ່ປະນາມ ຫຼື ວິຈານອິນເດຍເຊິ່ງເປັນຝ່າຍລະເມີດເສັ້ນແບ່ງ LOC ກ່ອນ.

ເຊິ່ງພູມມິພາກແຄສແມຍ ເປັນດິນແດນແຫ່ງຄວາມຂັດແຍ່ງລະຫວ່າງອິນເດຍ ກັບ ປາກິດສະຖານ ນັບຕັ້ງແຕ່ນາທີທຳອິດທີ່ໄດ້ຮັບເອກະລາດຈາກອັງກິດ ເມື່ອປີ 1947 ໂດຍທັງສອງປະເທດເຊິ່ງຖືເປັນ “ມະຫາອຳນາດດ້ານິວເຄຼຍ” ແຫ່ງອາຊີໃຕ້ ເຮັດສົງຄາມຄັ້ງໃຫຍ່ເພື່ອຍາດແຍ່ງກຳມະສິດເໜືອດິນແດນແຄສເມຍມາແລ້ວ 2 ຄັ້ງ, ຂະນະທີ່ສະຖານະການຄວາມເຄັ່ງຕຶງຮອບນີ້ເປັນຜົນມາຈາກເຫດລະເບີດໂຈມຕີລົດເມໂດຍສານຂອງທະຫານອິນເດຍໃນເຂດປຸລະວາມາຂອງລັດຊຳມູ ແລະ ກັສມີ ເຮັດໃຫ້ທະຫານອິນເດຍເສຍຊີວິດ 40 ຄົນ ເມື່ອວັນທີ 14 ກຸມພາ ທີ່ຜ່ານມາ, ພາຍລັງເກີດເຫດກຸ່ມຈາອິສ-ອີ-ໂມຮຳເໝັດ ເຊິ່ງສະມາຊິກສ່ວນໃຫຍ່ທີ່ຖານທີ່ໝັ້ນໃນປາກິດສະຖານ ອອກມາຮັບອ້າງວ່າເປັນຜູ້ຢູ່ເບື້ອງຫຼັງການດັ່ງກ່າວ.