ທ່ານນາຍົກ ເຊີນຊວນນັກທຸລະກິດຍີ່ປຸ່ນ ໃຫ້ມາລົງທຶນໃນ ສປປ.ລາວ ຫຼາຍຂຶ້ນ

ໃນຕອນບ່າຍ ຂອງວັນທີ 27 ກຸມພາ 2019 ທີ່ຜ່ານມາ, ຢູ່ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ  ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ໂຢອິຈິ ໂກບາຢາຊິ ຮອງປະທານ ສະພາອຸດສາຫະກໍາ ແລະ ການຄ້າຢີ່ປຸ່ນ, ປະທານຄະນະກໍາມະການ ຮ່ວມມືດ້ານທຸລະກິດ ແມ່ນໍ້າຂອງ-ຢີ່ປຸ່ນ ພ້ອມດ້ວຍຄະນະ ເນື່ອງໃນໂອກາດ ເດີນທາງເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ.ລາວ ຢ່າງເປັນທາງການ.

ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ.ລາວ ຂອງ ທ່ານ ໂຢອິຈິ ໂກບາຢາຊິ ພ້ອມດ້ວຍຄະນະ ໃນຄັ້ງນີ້ ເປັນການປະກອບສ່ວນສໍາຄັນ ໃນການສືບຕໍ່ຮັດແໜ້ນ ສາຍພົວພັນຮ່ວມມື ໃນການເປັນຄູ່ຮ່ວມຍຸດທະສາດ ຂອງສອງປະເທດ ລາວ-ຢີ່ປຸ່ນ ໃຫ້ມີການຂະຫຍາຍຕົວ ເຂົ້າສູ່ລວງເລິກ ແລະ ແຕກດອກອອກຜົນ ຈະເລີນງອກງາມຍິ່ງໆຂຶ້ນ. ພ້ອມດຽວກັນນີ້, ທ່ານນາຍົກລັດຖະມົນຕີ ໄດ້ກ່າວຕື່ມວ່າ: ປັດຈຸບັນ ສປປ.ລາວ ໄດ້ສືບຕໍ່ປັບປຸງ ສະພາບແວດລ້ອມ ຂອງການລົງທຶນ ໂດຍການຈັດຕັ້ງປະຕິບັດນະໂຍບາຍ 3 ເປີດ 1). ເປີດປະຕູ, 2). ເປີດສິ່ງກີດຂວາງ ແລະ 3). ເປີດໃຈ ລວມທັງ ການປັບປຸງນະໂຍບາຍ, ນິຕິກໍາ ແລະ ກົນໄກ ການປະສານງານພາຍໃນ ໃຫ້ມີຄວາມກະທັດຮັດ, ວ່ອງໄວ, ໂປ່ງໃສ ແລະ ຜ່ານລະບົບປະຕູດຽວ ເພື່ອຫຼຸດຜ່ອນອຸປະສັກ ໃນການສ້າງຕັ້ງ ແລະ ດໍາເນີນທຸລະກິດຢູ່ ສປປ.ລາວ, ໂດຍອີງໃສ່ທ່າແຮງ ທາງດ້ານຊັບພະຍາກອນ ທໍາມະຊາດ ແລະ ສິ່ງແວດລ້ອມ ລັດຖະບານ ໄດ້ກຳນົດຈຸດສຸມ ໃນການພັດທະນາ ໂດຍເນັ້ນໃສ່ການຜະລິດ ກະສິກໍາສະອາດ, ອຸດສາຫະກໍາປຸງແຕ່ງ, ການພັດທະນາ ການທ່ອງທ່ຽວທາງວັດທະນະທໍາ, ປະຫວັດສາດ ແລະ ທໍາມະຊາດ ໄປຄຽງຄູ່ກັບການປົກປັກຮັກສາ ສິ່ງແວດລ້ອມ.

ພ້ອມດຽວກັນນີ້, ເພື່ອຮອງຮັບໃຫ້ແກ່ການພັດທະນາ, ລັດຖະບານ ໄດ້ສຸມໃສ່ປັບປຸງ ພື້ນຖານໂຄງລ່າງ, ສ້າງລະບົບຕ່າງໜ່າງເສັ້ນທາງຄົມມະນາຄົມ ໃຫ້ມີຄວາມສະດວກ, ວ່ອງໄວ ເປັນຕົ້ນ ໂຄງການກໍ່ສ້າງ ທາງລົດໄຟ ລາວ-ຈີນ, ໂຄງການກໍ່ສ້າງທາງດ່ວນ ວຽງຈັນ-ຮ່າໂນຍ…ການຈັດຕັ້ງປະຕິບັດ ບັນດາໂຄງການ ແລະ ແຜນງານຕ່າງໆ ທີ່ຢູ່ພາຍໃຕ້ການຮ່ວມມື ສອງຝ່າຍ ກໍ່ຄື ຫຼາຍຝ່າຍ ລວມທັງ ຂອບການຮ່ວມມື ແມ່ນໍ້າຂອງ-ຢີ່ປຸ່ນ ເຫັນວ່າບັນດາໂຄງການດັ່ງກ່າວ ໄດ້ປະກອບສ່ວນ ຢ່າງໃຫຍ່ຫຼວງ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ.ລາວ ກໍ່ຄື ພາກພື້ນ. ສໍາລັບການລົງທຶນ ຂອງບັນດາບໍລິສັດຢີ່ປຸ່ນ ຢູ່ ລາວ ແມ່ນມີທ່າອ່ຽງເພີ່ມຂຶ້ນ ຈາກ 143 ບໍລິສັດ ໃນປີ 2018 ມາເປັນ 151 ບໍລິສັດ ໃນຕົ້ນປີນີ້ ເຊິ່ງສະແດງໃຫ້ເຫັນເຖິງ ຄວາມເອົາໃຈໃສ່ ແລະ ປະຕິບັດໜ້າທີ່ ຢ່າງຫ້າວຫັນ ຂອງທຸກໜ່ວຍງານ ທີ່ກ່ຽວຂ້ອງ ຂອງທັງສອງຝ່າຍ.​

ໂອກາດດັ່ງກ່າວ, ທ່ານ ໂຢອິຈິ ໂກບາຢາຊິ ພ້ອມດ້ວຍຄະນະ ໄດ້ສະແດງຄວາມຂອບໃຈ ຕໍ່ທ່ານນາຍົກລັດ ຖະມົນຕີຂອງ ສປປ.ລາວ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບ ຢ່າງອົບອຸ່ນ ໃນຄັ້ງນີ້ ພ້ອມທັງ ໃຫ້ຄຳໝັ້ນສັນຍາວ່າ ຈະສືບຕໍ່ໃຫ້ການພົວພັນຮ່ວມມື ແລະ ຂົນຂວາຍນັກລົງທຶນຢີ່ປຸ່ນ ມາລົງທຶນ ແລະ ຂະຫຍາຍທຸລະກິດ ຢູ່ ສປປ.ລາວ ໃຫ້ຫຼາຍຂຶ້ນ.