ສ.ອາເມຣິກາ ຕັ້ງຄ່າຫົວລ່າລູກຊາຍບິນລາເດນ 1 ລ້ານໂດລາສະຫະລັດ

ສຳນັກຂ່າວຕ່າງປະເທດລາຍງານເມື່ອວັນທີ 28 ກຸມພາ 2019 ວ່າ: ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການ ພ້ອມທີ່ຈະມອບເງິນລາງວັນ 1 ລ້ານໂດລາສະຫະລັດ ໃຫ້ແກ່ບຸກຄົນ ຫຼື ໜ່ວຍງານແຫ່ງໃດກໍ່ຕາມ ທີ່ສາມາດແຈ້ງເບາະແສຈົນນຳໄປສູ່ການຈັບກຸມ ຮຳຊາ ບິນ ລາເດນ ລູກຊາຍຂອງ ໂອຊາມາ ບິນ ລາເດນ ຜູ້ສ້າງຕັ້ງ ແລະ ອະດີຜູ້ນຳສູງສຸດຂອງກຸ່ມອັນ-ກໍອິດະ ທີ່ຖືກຍິງເສຍຊີວິດ ຈາກປະຕິບັດການຂອງໜ່ວຍຮົບພິເສດ (SEAL) ສະຫະລັດ ອາເມຣິກາ ຕາມຄຳສັ່ງຂອງທ່ານ ບາຣັກ ໂອບາມາ ຜູ້ນຳສະຫະລັດ ອາເມຣິກາ ໃນຂະນະນັ້ນ ເມື່ອວັນທີ 2 ພຶດສະພາ 2011.

ເຊິ່ງຂໍ້ມູນຂ່າວກອງຂອງລັດຖະບານສະຫະລັດ ອາເມຣິກາ ເຊື່ອວ່າ ຮຳຊາ ບິນ ລາເດນ ເຊິ່ງເກີດທີ່ເມືອງເຈດດາ ໃນອາຣັບບີ ຊາອູດິດ, ປັດຈຸບັນມີອາຍຸປະມານ 30 ປີ ແລະ ຫຼົບຊ້ອນຢູ່ໃນປາກິດສະຖານ, ອາຟະການິດສະຖານ, ຊີຣີ ຫຼືແມ່ນແຕ່ອາດຈະອາໄສຢູ່ໃນອີຣານ ໂດຍນັບຕັ້ງແຕ່ ໂອຊາມາ ບິນ ລາເດນ ເສຍຊີວິດ ຮຳຊາ ບິນ ລາເດນ ທີ່ກຳລັງມີອິດທິພົນໃນກຸ່ມຫົວຮຸນແຮງ ອອກມາປະກາດເປັນໄລຍະໆວ່າຈະ ແກ້ແຄ້ນໃຫ້ກັບຜູ້ເປັນພໍ່ ດ້ວຍການໂຈມຕີສະຫະລັດ ອາເມຣິກາ ແລະ ພັນທະມິດ ໂດຍພັນລະຍາຂອງ ຮຳຊາ ບິນ ລາເດນ ຄືລູກສາວຂອງ ໂມຮຳເໝັດ ອັດຕາ ໜຶ່ງໃນຜູ້ຈີ້ຍົນ ເພື່ອກໍ່ເຫດໂສກອະນາດຕະກຳ 911 ທີ່ສະຫະລັດ ອາເມຣິກາເມື່ອວັນທີ 11 ກັນຍາ 2001.