ລັດເຊຍ ແລະ ຈີນ – ສ.ອາເມຣິກາ ຕ່າງກໍ່ບໍ່ເຫັນດີໃນແນວທາງແກ້ໄຂບັນຫາເວເນຊູເອລາຂອງກັນ ແລະ ກັນ

ສຳນັກຂ່າວຕ່າງປະເທດລາຍງານເມື່ອວັນທີ 28 ກຸມພາ 2019 ທີ່ຜ່ານມາວ່າ: ສະພາຄວາມໝັ້ນຄົງແຫ່ງສະຫະປະຊາຊາດ ອະພິປາຍ ແລະ ລົງມະຕິກ່ຽວກັບສະຖານະການໃນເວເນຊູເອລາ ໂດຍຍັດຕິທີ່ສະຫະລັດ ອາເມຣິກາສະເໜີໃຫ້ມີການເລືອກຕັ້ງປະທານປະເທດເວເນຊູເອລາຄືນໃໝ່ ແລະ ໜ່ວຍງານດ້ານຄວາມໝັ້ນຄົງຂອງທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ຕ້ອງບໍ່ຂັດຂວາງການລຳລຽງເຄື່ອງຊ່ວຍເຫຼືອບັນເທົາທຸກຈາກສະຫະລັດ ອາເມຣິກາທີ່ຈະຂ້າມແດນຈາກໂກໂລມບີເຂົ້າສູ່ເວເນຊູເອລາ.

Security Council Considers Situation in Venezuela (PHOTO: UN)

Voting Russia signals NO (PHOTO: UN)

ເຖິງແມ່ນວ່າຍັດຕິຂອງສະຫະລັດ ອາເມຣິກາໄດ້ຮັບສຽງສະໜັບສະໜູນຜ່ານເກນຂັ້ນຕ່ຳຢ່າງໜ້ອຍ 9 ສຽງ ຈາກທັງໝົດ 15 ສຽງ ແຕ່ຍັດຕິບໍ່ສາມາດມີຜົນບັງຄັບໃຊ້ໄດ້ ເນື່ອງຈາກລັດເຊຍ ແລະ ຈີນ ເຊິ່ງເປັນ 2 ໃນ 5 ສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໃຊ້ສິດຄັດຄ້ານເພື່ອຢຸດຢັ້ງ, ເຖິງຢ່າງໃດກໍ່ຕາມ ຍັດຕິທີ່ສະເໜີໂດຍລັດເຊຍ ວ່າດ້ວຍການຜ່ອນຄາຍຄວາມຂັດແຍ່ງທາງການເມືອງໃນເວເນຊູເອລາໂດຍສັນຕິວິທີ ແລະ ການສົ່ງມອບຄວາມຊ່ວຍເຫຼືອດ້ານມະນຸດສະທຳທີ່ຕ້ອງຜ່ານຄວາມເຫັນດີຈາກທ່ານ ນິໂຄລັສ ມາດູໂຣ ກ່ອນ ບໍ່ຜ່ານການລົງມະຕິເຊັ່ນກັນ ເນື່ອງຈາກສະຫະລັດ ອາເມຣິກາທີ່ເປັນສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດໃຊ້ສິດຄັດຄ້ານເພື່ອຢຸດຢັ້ງໄວ້ເຊັ່ນກັນ.

The US envoy on Venezuela Elliott Abrams raises his hand to vote to the United Nations Security Council during a meeting, to vote for a resolution on controlling the turmoil in Venezuela on February 28, 2019 at the United Nations in New York. (Photo by Johannes EISELE / AFP)

ຂະນະທີ່ທ່ານ ເອວລຽດ ອັບຣາມ ທູດພິເສດດ້ານວຽກງານເວເນຊູເອລາຂອງລັດຖະບານສະຫະລັດ ອາເມຣິກາ ກ່າວເຖິງຜົນການລົງມະຕິວ່າ ຍັງມີບາງປະເທດປົກປ້ອງລັດຖະບານເວລາຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ ແຕ່ຜັດນິ້ງເສີຍຕໍ່ຄວາມທຸກທໍລະມານຂອງປະຊາຊົນເວເນຊູເອລາ ທີ່ເກີດຂຶ້ນດ້ວຍສີມືມະນຸດ, ນອກຈາກນີ້ ຄວາມເດືອດຮ້ອນບໍ່ໄດ້ສົ່ງຜົນພຽງສະເພາະພາຍໃນປະເທດ ແຕ່ຍັງແຜ່ຂະຫຍາຍໄປເຖິງປະເທດເພື່ອນບ້ານຂອງເວເນຊູເອລາ ທີ່ຕ້ອງຮ່ວມແບກຮັບພາລະໂດຍບໍ່ຈຳເປັນ.

ໃນດ້ານຂອງທ່ານ ວາສຊິລີ ເນເບນເຊຍ ເອກອັກຄະລັດຖະທູດລັດເຊຍປະຈຳສະຫະປະຊາຊາດ ກ່າວວ່າລັດຖະບານລັດເຊຍມີຄວາມເປັນຫ່ວງເປັນຢ່າງຍິ່ງມາໂດຍຕະຫຼອດ ຕໍ່ກັບວິກິດການໃນເວເນຊູເອລາ ແຕ່ຕ້ອງປ້ອງກັນການຊ່ວຍເຫຼືອທີ່ແອບແຝງ ທີ່ບໍ່ແມ່ນຄວາມບໍລິສຸດໃຈ ແຕ່ເຊື່ອງຊ້ອນໄປດ້ວຍເຈດຕະນາທີ່ຈະຮຸກຮານ ແລະ ແຊກແຊງອະທິປະໄຕຂອງເວເນຊູເອລາ.

ສ່ວນທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດຂອງເວເນຊູເອລາ ທີ່ປະກາດຕົນເອງຂຶ້ນມາເປັນຜູ້ນຳຮັກສາການ ຄູ່ຂະໜານກັບລັດຖະບານພາຍໃຕ້ການນຳຂອງທ່ານ ນິໂຄລັສ ມາດູໂຣ ເມື່ອທ້າຍເດືອນມັງກອນ ທີ່ຜ່ານມາ ແລະ ຕໍ່ມາໄດ້ຢືນຢັນຄວາມພ້ອມທີ່ຈະເປັນຜູ້ນຳທີ່ມີອຳນາດເຕັມ ກ່າວເມື່ອວັນພຸດທີ່ຜ່ານມາວ່າ: ຕົນໄດ້ກຽມເດີນທາງກັບປະເທດຈາກໂກໂລມບີພາຍໃນອີກບໍ່ພໍເທົ່າໃດຊົ່ວໂມງຂ້າງໜ້າ ພາຍຫຼັງລັກລອບຂ້າມແດນໄປເມື່ອອາທິດທີ່ຜ່ານມາ ເພື່ອພະຍາຍາມຂົນສົ່ງເຄື່ອງຊ່ວຍເຫຼືອຂ້າມແດນ ແຕ່ສະຖານະການບານປາຍເປັນການປະທະຈົນມີຜູ້ເສຍຊີວິດຢ່າງໜ້ອຍ 5 ຄົນ ເພື່ອປະຕິບັດໜ້າທີ່ໃນຖານະຜູ້ນຳປະເທດ ເຖິງແມ່ນວ່າອາດຕ້ອງປະເຊີນກັບຄວາມສ່ຽງສູງທີ່ຈະຖືຈັບກຸມໂດຍເຈົ້າໜ້າທີ່ລັດຖະບານຂອງທ່ານ ນິໂຄລັສ ມາດູໂຣ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube