UN, EU ປະນາມກົດໝາຍອາຍາບຣູໄນວ່າ ໂຫດຮ້າຍປ່າເຖື່ອນ ທີ່ຈະປະຫານຊີວິດຜູ້ຮັກຮ່ວມເພດ

ສຳນັກຂ່າວຕ່າງປະເທດລາຍງານ 3 ເມສາ 2019 ວ່າ: ກົດໝາຍອາຍາຊາຣີອະ ສະບັບໃໝ່ຂອງບຣູໄນ ທີ່ເລີ່ມມີຜົນບັງຄັບໃຊ້ຕັ້ງແຕ່ວັນພຸດ (3 ເມສາ 2019)  ໄດ້ກຳນົດໂທດໜັກຂຶ້ນ ລວມເຖິງໂທດປະຫານຊີວິດດ້ວຍການລຸມດຶຶກແກວ່ງດ້ວຍກ້ອນຫິນຈົນຕາຍ ສຳລັບຄວາມຜິດຖານມີຊູ້ ຫຼື ການມີເພດສຳພັນລະຫວ່າງຄົນເພດດຽວກັນ ທັງຊາຍ ແລະ ຍິງ, ສ່ວນຄວາມຜິດຖານຂີ້ລັກຂະໂມຍ ຈະຖືກຕັດຂໍ້ມືຂວາ ສຳລັບຄວາມຜິດຄັ້ງທຳອິດ ແລະ ຕັດຂໍ້ຕີນຊ້າຍ ຫາກກະທຳຜິດອີກເປັນຄັ້ງທີສອງ, ກົດໝາຍສະບັບນີ້ໄດ້ເຮັດໃຫ້ເກີດສຽງວິພາກວິຈານຈາກທົ່ວໂລກ ທັງຈາກນັກການເມືອງ, ກຸ່ມຄົນທີ່ໂດດເດັ່ນໃນສັງຄົມໂລກ ແລະ ກຸ່ມສິດທິມະນຸດ.

ເຊິ່ງສະຫະພາບເອີຣົບ ໄດ້ຖະແຫຼງເມື່ອວັນອັງຄານທີ່ຜ່ານມາວ່າ: ບົດລົງໂທດບາງຢ່າງໃນກົດໝາຍອາຍາສະບັບໃໝ່ຂອງບຣູໄນ ເທົ່າກັບເປັນການທາລຸນ, ເປັນການກະທຳທີ່ໂຫດຮ້າຍປ່າເຖື່ອນ, ໄຮ້ມະນຸດສະທຳ ແລະ ຫຼຸດຄ່າຄວາມເປັນຄົນ, ບົດລົງໂທດຂັດຕໍ່ອະນຸສັນຍາຂອງອົງການສະຫະປະຊາຊາດວ່າດ້ວຍການທາລຸນ ເຊິ່ງບຣູໄນຮ່ວມລົງນາມໃນປີ 2015.

ຖະແຫຼງການກ່າວອີກວ່າ ເປັນສິ່ງສຳຄັນຢ່າງຍິ່ງທີ່ລັດຖະບານບຣູໄນ ຕ້ອງຮັບປະກັນວ່າການດຳເນີນການຕາມກົດໝາຍອາຍາຊາຣີອະ ຈະບໍ່ເປັນການລະເມີດສິດທິມະນຸດ ແລະ ສອດຄ່ອງກັບທຸກພັນທະດ້ານສິດທິມະນຸດຂອງພູມມິພາກ ແລະ ລະຫວ່າງປະເທດ, ສະຫະພາບເອີຣົບຫວັງວ່າບຣູໄນ ຈະພັກໂທດປະຫານຊີວິດອອກໄປກ່ອນ.

ກົດໝາຍສະບັບນີ້ເຮັດໃຫ້ບຣູໄນ ກາຍເປັນປະເທດທຳອິດໃນອາຊີຕາເວັນອອກສຽງໃຕ້ ທີ່ມີກົດໝາຍອາຍາຊາຣີອະບັງຄັບໃຊ້ລະດັບປະເທດ ເຂົ້າຮ່ວມກັບຫຼາຍປະເທດໃນຕາເວັນອອກກາງເຊັ່ນ: ອາຣັບບີ ຊາອຸດິດ.

ການຕັດສິນໃຈບັງຄັບໃຊ້ກົດໝາຍອາຍາຊາຣີອະ ທີ່ຊັກຊ້າມາຫຼາຍປີ ໄດ້ກໍ່ໃຫ້ເກີດປະຕິກິລິຍາຄັດຄ້ານຈາກທົ່ວໂລກ, ສະຫະປະຊາຊາດອອກຖະແຫຼງການປະນາມວ່າ ເປັນກົດໝາຍທີ່ໂຫດຮ້ານປ່າເຖື່ອນ ແລະ ໄຮ້ມະນຸດສະທຳ, ຂະນະທີ່ກຸ່ມຄົນດັງໃນວົງການບັນເທີງຂອງບັນດາປະເທດຕາເວັນຕົກຫຼາຍຕໍ່ຫຼາຍຄົນ ອອກມາຮຽກຮ້ອງໃຫ້ຮ່ວມກັນຂວໍ້າບາດງົດໃຊ້ບໍລິການ ໂຮງແຮມຫຼູ 9 ແຫ່ງທີ່ຊາວບຣູໄນເປັນເຈົ້າຂອງໃນສະຫະລັດ ອາເມຣິກາ, ອັງກິດ, ຝຣັ່ງ ແລະ ອິຕາລີ.

HTML tutorial