ຜູ້ນຳເກົາຫຼີເໜືອ ຈະພົບປະເຈລະຈາເລື່ອງນິວເຄຼຍກັບຜູ້ນຳລັດເຊຍ

ສຳນັກຂ່າວຕ່າງປະເທດລາຍງານເມື່ອວັນທີ 23 ເມສາ 2019 ທີ່ຜ່ານມາວ່າ: ທຳນຽບປະທານປະເທດລັດເຊຍອອກຖະແຫຼງການວ່າ ທ່ານ ວະລາດິເມຍ ປູຕິນ ປະທານປະເທດລັດເຊຍ ຈະພົບປະເຈລະຈາກັບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອໃນການປະຊຸມສຸດຍອດທີ່ຈະຈັດຂຶ້ນໃນວັນທີພະຫັດ 25 ເມສາ ນີ້ ທີ່ເມືອງວະລາດິວັອສຕັອກ ປະເທດລັດເຊຍ ເຊິ່ງມີການກະກຽມດ້ານສະຖານທີ່ໄວ້ຮຽບຮ້ອຍແລ້ວ ແຕ່ຍັງຂໍປິດລັບໄວ້ກ່ອນ, ດ້ວຍເຫດຜົນດ້ານຄວາມປອດໄພຂອງຝ່າຍເກົາຫຼີເໜືອ.

ທ່າຍ ຢູຣິ ອູຊາຄັອບ ທີ່ປຶກສາປະຈຳທຳນຽບປະທານປະເທດລັດເຊຍຖະແຫຼງວ່າ ການເຈລະຈາຈະເນັ້ນໄປທີ່ບັນຫາທີ່ຍັງຕົກລົງກັນບໍ່ໄດ້ ວ່າດ້ວຍໂຄງການນິວເຄຼຍເກົາຫຼີເໜືອ ໂດຍລັດເຊຍຈະຫາທາງຊຸກດັນໄປໃນທິດທາງບວກເຊິ່ງເຄີຍຖືກຂັດຂວາງຈາກຝ່າຍສະຫະລັດ ອາເມຣິກາ ທີ່ນຳໂດຍທ່ານ ໂດໂນ ທຣຳ ຈາກກອງປະຊຸມສຸດຍອດທີ່ຜ່ານມາກັບຜູ້ນຳເກົາຫຼີເໜືອ, ນອກຈາກນັ້ນລັດເຊຍຈະຫາທາງຊ່ວຍສ້າງ ຫຼື ກຳນົດເງື່ອນໄຂ ແລະ ບັນດາກາດທີ່ດີເພື່ອໃຫ້ບັນລຸຂໍ້ຕົກລົງຕໍ່ກັບບັນຫາຢູ່ແຫຼມເກົາຫຼີ.

ທີ່ປຶກສາທຳນຽບປະທານປະເທດລັດເຊຍຍັງກ່າວອີກວ່າ: ລັດເຊຍ-ຈີນ ມີແຜນທີ່ຈະສະເໜີແນວທາງເທື່ອລະຂັ້ນຕອນຂອງການແກ້ໄຂບັນຫານິວເຄຼຍເກົາຫຼີເໜືອ ແລະ ຮຽກຮ້ອງໃຫ້ຜ່ອນຄາຍມາດຕະການຂວໍ້າບາດເກົາຫຼີເໜືອ ແລະ ການຄ້ຳປະກັນດ້ານຄວາມໝັ້ນຄົງໃຫ້ກັບເກົາຫຼີເໜືອ ນອກຈາກນັ້ນແລ້ວການຢຸດຕິການທົດລອງນິວເຄຼຍເກົາຫຼີເໜືອ ແລະ ຫຼຸດລະດັບການຮ່ວມຊ້ອມຮົບລະຫວ່າງສະຫະລັດ ອາເມຣິກາ ກັບ ເກົາຫຼີໃຕ້ ຈະຊ່ວຍຜ່ອນຄາຍຄວາມເຕັ່ງຕຶງ ແລະ ສ້າງເງື່ອນໄຂສຳລັບຄວາມຄືບໜ້າໃນການເຈລະຈາໃນຕອນຕໍ່ໄປ.

ວາລະຂອງການປຶກສາຫາລືລະຫວ່າງຜູ້ນຳລັດເຊຍ ກັບ ຜູ້ນຳເກົາຫຼີເໜືອຍັງລວມເຖິງການຮ່ວມມືສອງຝ່າຍ ເພາະມູນຄ່າການຄ້າລະຫວ່າງລັດເຊຍ ກັບ ເກົາຫຼີເໜືອນັ້ນໜ້ອຍຫຼາຍ ເມື່ອປີທີ່ຜ່ານມາມີມູນຄ່າການຄ້າລະຫວ່າງກັນ 34 ລ້ານໂດລາສະຫະລັດເທົ່ານັ້ນ ສາເຫດສຳຄັນເປັນເພາະມາດຕະການຂວໍ້າບາດຈາກສະຫະປະຊາຊາດ.