ເກົາຫຼີເໜືອ ຕ້ອງການສິ່ງຄ້ຳປະກັນຄວາມປອດໄພ ຫາກຕົນຈະປົດອາວຸດນິວເຄຼຍ

ສຳນັກຂ່າວຕ່າງປະເທດລາຍງານ 25 ເມສາ 2019 ວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ໃຫ້ການຕ້ອນຮັບທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ທີ່ຫໍປະຊຸມຂອງມະຫາວິທະຍາໄລຟາ ອິສເທິນ ໃນເມືອງວະລາມິວັອສຕັອກ ທາງພາກຕາເວັນອອກຂອງປະເທດລັດເຊຍ ເຊິ່ງເປັນການພົບປະຫາລືກັນຢ່າງເປັນທາງການຄັ້ງທຳອິດຂອງທັງສອງ, ຂະນະດຽວກັນຍັງຖືເປັນການຢ້ຽມຢາມລັດເຊຍເປັນຄັ້ງທຳອິດຂອງທ່ານ ຄິມ ຈອງ-ອຶນ ແລະ ເປັນການນຳຮອຍຜູ້ເປັນພໍ່ ທ່ານ ຄິມ ຈອງ-ອິວ ອະດີດຜູ້ນຳສູງສຸດເກົາຫຼີເໜືອ ທີ່ເດີນທາງດ້ວຍຂະບວນລົດໄຟຂ້າມແດນມາຍັງເມືອງວະລາດີວັອສຕັອກເພື່ອພົບກັບທ່ານ ປູຕິນ 2 ຄັ້ງ ເມື່ອປີ 2002 ແລະ 2011.

ເຊິ່ງຜູ້ນຳລັດເຊຍກ່າວເຖິງການມາຢ້ຽມຢາມຂອງທ່ານ ຄິມ ຈອງ-ອຶຶນ ໃນຄັ້ງນີ້ວ່າຈະເຮັດໃຫ້ທຸກຝ່າຍທີ່ກ່ຽວຂ້ອງກັບສະຖານະການຢູ່ແຫຼມເກົາຫຼີ ເຂົ້າໃຈທິດທາງສາຍພົວພັນການເມືອງ ແລະ ແນວທາງການເມືອງໃນບໍລິເວນນີ້ດີຍິ່ງຂຶ້ນ ແລະ ລັດຖະບານລັດເຊຍມີຄວາມພ້ອມທີ່ຈະໃຫ້ການສະໜັບສະໜູນຕໍ່ຂະບວນການພັດທະນາຢ່າງສ້າງສັນ ເພື່ອການເກີດສັນຕິພາບຢູ່ແຫຼມເກົາຫຼີ, ຂະນະດຽວກັນລັດເຊຍກໍ່ມີຄວາມຍິນດີຕໍ່ສາຍພົວພັນລະຫວ່າງສອງເກົາຫຼີ ທີ່ມີພັດທະນາການໄປໃນດ້ານບວກຢ່າງຕໍ່ເນື່ອງ ແລະ ການທີ່ຜູ້ນຳສູງສຸດຂອງເກົາຫຼີເໜືອພົບປະຫາລືກັບຜູ້ນຳສະຫະລັດ ອາເມຣິກາຄົນປັດຈຸບັນ ນັ້ນກໍ່ຄືທ່ານ ໂດໂນ ທຣຳ ເຖິງ 2 ຄັ້ງ.

ຂະນະທີ່ຜູ້ນຳສູງສຸດເກົາຫຼີເໜືອ ໄດ້ກ່າວສະແດງຄວາມຍິນດີຢ່າງເປັນທາງການ ໃນນາມຂອງລັດຖະບານເກົາຫຼີ ຕໍ່ການທີ່ທ່ານ ປູຕິນ ໄດ້ຮັບໄຊຊະນະຈາກການເລືອກຕັ້ງປະທານປະເທດເມື່ອປີທີ່ຜ່ານມາ ແລະ ຈະຢູ່ໃນວາລະອີກ 6 ປີ ແລະ ສະແດງຄວາມເຊື່ອໝັ້ນວ່າ ການມາຢ້ຽມຢາມເມືອງວະລາດີວັອສຕັອກໃນຄັ້ງນີ້ ຈະເປັນການພົບປະຫາລືຢ່າງສ້າງສັນກັບຜູ້ນຳລັດເຊຍ ແລະ ບັນດາການນຳຂອງລັດເຊຍ ລວມທັງຈະເປັນກອງປະຊຸມທີ່ປະສົບຄວາມສຳເລັດ ແລະ ມີຜົນປະໂຫຍດ.

ໂດຍບັນຫາສຳຄັນທີ່ຜູ້ນຳທັງສອງໄດ້ປຶກສາຫາລືກັນມີຄື ເລື່ອງການປົດອາວຸດນິວເຄຼຍຢູ່ແຫຼມເກົາຫຼີ, ມາດຕະການຂວໍ້າບາດເກົາຫຼີເໜືອ ແລະ ບັນຫາກ່ຽວກັບສະຫະລັດ ອາເມຣິກາ ໂດຍທ່ານ ປູຕິນ ກ່າວວ່າ ເກົາຫຼີເໜືອຕ້ອງການສິ່ງຄ້ຳປະກັນຄວາມໝັ້ນຄົງຈາກນານາຊາດ ໃນການຍົກເລີກໂຄງການນິວເຄຼຍ ເຊິ່ງສິ່ງຄ້ຳປະກັນດັ່ງກ່າວນັ້ນ ຫາກຈະໃຫ້ໄດ້ຜົນກໍ່ຈະຕ້ອງຢູ່ໃນຂອບເຂດຂອງການຮ່ວມມືກັນຫຼາຍປະເທດອີກດ້ວຍ.

ເຊິ່ງການຢ້ຽມຢາມລັດເຊຍຂອງທ່ານ ຄິມ ຈອງ-ອຶນ ເກີດຂຶ້ນປະມານ 2 ເດືອນຫຼັງຈາກກອງປະຊຸມສຸດຍອດ ຄັ້ງທີ 2 ກັບ ຜູ້ນຳສະຫະລັດ ອາເມຣິກາ ທີ່ນະຄອນຫຼວງຮ່າໂນ້ຍ ປະເທດຫວຽດນາມ ເມື່ອທ້າຍເດືອນກຸມພາທີ່່ຜານມາ ເຊິ່ງເປັນກອງປະຊຸມທີ່ຈົບລົງຢ່າງເໜືອຄວາມຄາດໝາຍຂອງຫຼາຍຝ່າຍ ນັ້ນຄືການຢຸດຕິກອງປະຊຸມກ່ອນກຳນົດເວລາ ແລະ ບໍ່ມີການລົງນາມໃນຂໍ້ຕົກລົງໃດໆ.