ອິນເດຍອົບພະຍົບ 800,000 ຄົນ ໜີພາຍຸໄຊໂຄຼນຟານີ

ສຳນັກຂ່າວຕ່າງປະເທດລາຍງານ 3 ພຶດສະພາ 2019 ວ່າ: ສຳນັກງານອຸຕຸນິຍົມແຫ່ງຊາດອິນເດຍ (IMD) ອອກປະກາດໃນວັນສຸກນີ້ ຄາດການພາຍຸໄຊໂຄຼນຟານີ ຈະເລີ່ມຂຶ້ນຝັ່ງບໍລິເວນເມືອງປູຣິ ຝັ່ງທະເລຂອງລັດໂອທິສາ ທາງພາກຕາເວັນອອກຂອງປະເທດ ແລະ ຕິດກັບອ່າວເບງກອນ ໃນເວລາປະມານ 9:30 ໂມງ ຕາມເວລາທ້ອງຖິ່ນ ດ້ວຍຄວາມໄວລົມສູງສຸດໃກ້ຈຸດສູນກາງເກືອບເຖິງ 200 ກິໂລແມັດຕໍ່ຊົ່ວໂມງ ຫຼັງຈາກນັ້ນຈະມຸ່ງໜ້າຂຶ້ນເໜືອເຂົ້າສູ່ບັງກະລາເທດເປັນຈຸດໝາຍຕໍ່ໄປ.

ເຊິ່ງ IDM ເຕືອນໄພການເກີດພາຍຸລົມຝົນຮຸນແຮງ, ນ້ຳຖ້ວມກະທັນຫັນ ແລະ ດິນເຈື່ອນ ຕະຫຼອດຮອດເຕືອນໃຫ້ເຮືອປະມົງກັບເຂົ້າຝັ່ງ ເນື່ອງຈາກອິດທິພົນຂອງພາຍຸອາດຈະກໍ່ໃຫ້ເກີດຄື້ນທະເລສູງເຖິງ 1.5 ແມັດ ນອກຈາກນີ້, ລັດຖະບານອິນເດຍໄດ້ສັ່ງໃຫ້ຮີບເລັ່ງອົບພະຍົບປະຊາຊົນເກືອບ 800,000 ຄົນໃນພື້ນທີ່ສ່ຽງ ເຊິ່ງເປັນບໍລິເວນດຽວກັບທີ່ເຄີຍໄດ້ຮັບຄວາມເສຍຫາຍຢ່າງໜັກໜ່ວງຈາກອິດທິພົນຂອງພາຍຸໄຊໂຄຼນໂອທິສາ ເມື່ອປີ 1999 ມີຜູ້ເສຍຊີວິດຫຼາຍກວ່າ 100,000 ຄົນ, ໃນດ້ານຂອງສຳນັກງານບໍລິຫານຈັດການໄພພິບັດແຫ່ງຊາດອິນເດຍ ລາຍງານຄວາມພ້ອມ ໃນການກະກຽມວັດຖຸສິ່ງຂອງຊ່ວຍເຫຼືອຫຼາຍກວ່າ 100,000 ຊຸດ ແລະ ການປ່ຽນສະພາບໂຮງຮຽນຫຼາຍກວ່າ 3,000 ແຫ່ງໃຫ້ເປັນສູນພັກເຊົາຊົວຄາວ, ສ່ວນກອງທັບອິນເດຍໄດ້ສຳຮອງກຳລັງພົນກຽມພ້ອມສະໜັບສະໜູນທຸກໜ່ວຍງານ ແລະ ການສົ່ງມອບຄວາມຊ່ວຍເຫຼືອແກ້ຜູ້ປະສົບໄພຕະຫຼອດ 24 ຊົ່ວໂມງ.

ໃນເວລາດຽວກັນ, ສຳນັກງານບໍລິຫານຈັດການໄພພິບັດແຫ່ງຊາດຂອງບັງກະລາເທດລາຍງານພື້ນທີ່ສ່ຽງ 19 ເຂດໃນປະເທດທີ່ຕັ້ງຢູ່ເທິງເສັ້ນທາງຜ່ານຂອງໄຊໂຄຼນຟານີ ລວມທັງນະຄອນຫຼວງທາກາ, ເຊິ່ງໄຊໂຄຼນຟານີຖືເປັນພາຍຸຫົວທີ 4 ທີ່ເກີດຂຶ້ນໃນອ່າວເບງກອນ ແລະ ພັດຜ່ານພາກຕາເວັນອອກຂອງອິນເດຍໃນຮອບ 3 ທົດສະວັດ ໂດຍພາຍຸຫົວຫຼ້າສຸດທີ່ກໍ່ຕົວໃນທະເລບໍລິເວນດັ່ງກ່າວຄື ໄຊໂຄຼນອອກຄີ ເມື່ອປີ 2013 ສ້າງຄວາມເສຍຫາຍຢ່າງໜັກໜ່ວງໃຫ້ແກ່ລັດທະມິນນາທູ ແລະ ລັດເກຣະລະ ສົ່ງຜົນໃຫ້ມີຜູ້ເສຍຊີວິດຢ່າງເປັນທາງການຫຼາຍກວ່າ 250 ຄົນ.

- Advertisement -