ອິດສະຣາແອນ-ປາແລັດສະຕິນ ໂຈມຕີຕອບໂຕ້ກັນຢ່າງໜັກໜ່ວງ (ວິດີໂອ)

ສຳນັກຂ່າວຕ່າງປະເທດລາຍງານ 6 ພຶດສະພາ 2019 ວ່າ: ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ກ່າວເມື່ອວັນອາທິດທີ່ຜ່ານມາວ່າ ຕົນໄດ້ສັ່ງໃຫ້ກອງກຳລັງປ້ອງກັນຕົນເອງອິດສະຣາແອນ (IDF) ເດີນໜ້າປະຕິບັດການໂຈມຕີຢ່າງໜັກໜ່ວງຕໍ່ເຂດທີ່ໝັ້ນທຸກແຫ່ງຂອງກຸ່ມຮາມາສທີ່ຍັງຄົງປົກຄອງເຂດກາຊາ ແລະ ກຸ່ມຫົວຮຸນແຮງທຸກແຫ່ງທີ່ເປັນພັນທະມິດກັບກຸ່ມຮາມາສ ພາຍຫຼັງທີ່ນັບຕັ້ງແຕ່ທ້າຍອາທິດທີ່ຜ່ານມາ ກຸ່ມຮາມາສໄດ້ຍິງຈະຫຼວດຂ້າມຊາຍແດນໄປຍັງອິດສະຣາແອນແລ້ວຫຼາຍກວ່າ 600 ລູກ ໃນຈຳນວນນີ້ຫຼາຍກວ່າ 250 ລູກເປັນການຍິງຂ້າມຊາຍແດນເມື່ອວັນເສົາທີ່ຜ່ານມາພຽງວັນດຽວ.

ຂະນະທີ່ລະບົບປ້ອງກັນໄພທາງອາທິດ Iron Dome ຂອງອິດສະຣາແອນສາມາດສະກັດຈະຫຼວດຂອງກຸ່ມຮາມາສໄດ້ຫຼາຍກວ່າ 150 ລູກ ໂດຍສຳລັບສ່ວນທີ່ພາດໄປນັ້ນ ລັດຖະບານອິດສະຣາແອນຢືນຢັນວ່າຕົກໃນພື້ນທີ່ຮົກຮ້າງເປັນສ່ວນໃຫຍ່, ເຖິງຢ່າງໃດກໍ່ຕາມ ມີລາຍງານວ່າຈຳນວນພົນລະເມືອງອິດສະຣາແອນທີ່ເສຍຊີວິດຈາກການຍິງຈະຫຼວດຂອງກຸ່ມຮາມາສໃນຮອບນີ້ມີຢ່າງໜ້ອຍ 4 ຄົນແລ້ວ ຖືເປັນການເສຍຊີວິດຂອງພົນລະເມືອງອິດສະຣາແອນຫຼາຍທີ່ສຸດນັບຕັ້ງແຕ່ສົງຄາມກາຊາ ເມື່ອປີ 2014 ເຊິ່ງຜູ້ເສຍຊີວິດຝ່າຍອິດສະຣາແອນເກືອບທັງໝົດເປັນທະຫານ.

ໃນດ້ານຂອງກະຊວງສາທາລະນະສຸກຂອງປາແລັດສະຕິນລາຍງານວ່າ ກອງທັບອິດສະຣາແອນປະຕິບັດການໂຈມຕີຕອບໂຕ້ທັງທາງບົກ ແລະ ທາງອາກາດຢ່າງຕໍ່ເນື່ອງ ເຮັດໃຫ້ປະຊາຊົນໃນເຂດກາຊາເສຍຊີວິດຢ່າງໜ້ອຍ 19 ຄົນ ລວມເຖິງເດັກນ້ອຍເພດຍິງອາຍຸ 14 ເດືອນ, ເດັກນ້ອຍຊາຍ ອາຍຸ 12 ປີ ແລະ ທ່ານ ຮາເໝັດ ອາເໝັດ ອັນ-ໂຄດາຣີ ໜຶ່ງໃນແກ່ນນຳຂອງກຸ່ມຮາມາສ ນອກຈາກນີ້ ຍັງມີຜູ້ໄດ້ຮັບບາດເຈັບອີກຫຼາຍຮ້ອຍຄົນ.

ໃນເວລາດຽວກັນ, ສະຫະປະຊາຊາດ ເຜີຍແຜ່ຖະແຫຼງການຂອງທ່ານ ອັນໂຕນິໂອ ກູເຕເຣສ ເລຂາທິການໃຫຍ່ສະຫະປະຊາຊາດ ຮຽກຮ້ອງໃຫ້ທັງອິດສະຣາແອນ ແລະ ຮາມາສ ອົດທົນອົດກັ້ນ ພ້ອມທັງຢຸດຕິການໃຊ້ຄວາມຮຸນແຮງຕໍ່ກັນ ເພື່ອຄວາມປອດໄພຂອງປະຊາຊົນ, ສ່ວນທ່ານ ນິໂຄໄລ ມະລາດິນັອບ ທູດພິເສດວຽກງານອິດສະຣາແອນ-ປາແລັດສະຕິນຂອງສະຫະປະຊາຊາດ ຍັງຄົງປຶກສາຫາລືກັບລັດຖະບານເອຢິບ ກ່ຽວກັບສະຖານະການທີ່ເກີດຂຶ້ນ, ນອກເໜືອຈາກການສູ້ຮົບຂ້າມຊາຍແດນແລ້ວ ອິດສະຣາແອນຍັງປິດຈຸດຜ່ານແດນສຳລັບຂົນສົ່ງສິນຄ້າເຂົ້າສູ່ເຂດກາຊາ ແລະ ຫຼຸດອານາເຂດການຈັບປາຂອງເຮືອປະມົງປາແລັດສະຕິນ ສ່ວນທຳນຽບຂາວສະແດງຈຸດຢືນສະໜັບສະໜູນປະຕິບັດການທາງທະຫານຂອງອິດສະຣາແອນໃນຄັ້ງນີ້.

- Advertisement -