ສ.ອາເມຣິກາ ສົ່ງເຮືອຮົບ 2 ລຳເຂົ້າມາໃນທະເລຈີນໃຕ້ ທ່າມກາງຄວາມເຄັ່ງຕຶງຂອງສົງຄາມການຄ້າ

ສຳນັກຂ່າວຕ່າງປະເທດລາຍງານ 6 ພຶດສະພາ 2019 ວ່າ: ເຮືອຮົບຂອງສະຫະລັດ ອາເມຣິກາ 2 ລຳ ໄດ້ແລ່ນຜ່ານທະເລຈີນໃຕ້ ເຊິ່ງເປັນການກະທຳທີ່ເຮັດໃຫ້ຈີນບໍ່ເພິ່ງພໍໃຈເປັນຢ່າງຍິງ. ການເຄື່ອນໄຫວດັ່ງກ່າວເກີດຂຶຶ້ນພາຍຫຼັງທີ່ທ່ານ ໂດໂນ ທຣຳ ປະທານປະເທດ ສະຫະລັດ ອາເມຣິກາ ປະກາດວ່າຈະເກັບພາສີສິນຄ້າຈາກຈີນເພີ່ມຂຶ້ນ ໂດຍຖືເປັນສ່ວນໜຶ່ງຂອງສົງຄາມການຄ້າ.

ເຊິ່ງກອງທັບສະຫະລັດ ອາເມຣິກາ ຢືນຢັນວ່າ ມີເຮືອຮົບ 2 ລຳ ແລ່ນຢູ່ໃກ້ກັບເກາະທີ່ຈີນອ້າງກຳມະສິດ ແລະ ຈີນຖືວ່າຂົງເຂດນັ້ນເປັນສ່ວນໜຶ່ງຂອງນ່ານນ້ຳຕົນ, ໃນຂະນະທີ່ສະຫະລັດ ອາເມຣິກາ ກໍ່ຢືນຢັນວ່າພື້ນທີ່ດັ່ງກ່າວເປັນນ່ານນ້ຳສາກົນ ທີ່ຢູ່ພາຍໃຕ້ຫຼັກການເສລີພາບໃນການເດີນເຮືອ.

ເຮືອຮົບ Preble ແລະ Chung Hoon ຂອງກອງທັບສະຫະລັດ ອາເມຣິກາ ທີ່ຕິດຕັ້ງຂີປະນາວຸດນຳວິຖີ ໄດ້ເຂົ້າໃກ້ແນວປະກາລັງກາເວັນ ແລະ ຈອນສັນ ໝູ່ເກາະສະແປຼດລີ ໃນໄລຍະພຽງ 12 ໄມທະເລ ຫຼື ປະມານ 22​ ກວ່າກິໂລແມັດ.

ໂດຍທ່ານ ເຄລ ໂດສ ໂຄສົກກອງເຮືອທີ 7 ກອງທັບເຮືອສະຫະລັດ ອາເມຣິກາກ່າວວ່າ ເປັນການເດີນເຮືອຕາມປົກກະຕິ ບໍ່ໄດ້ທ້າທາຍໃດໆ ແລະ ເປັນໄປການເຄື່ອນໄຫວທີ່ຢູ່ພາຍໃຕ້ກົດໝາຍລະຫວ່າງປະເທດ.

ໃນດ້ານຂອງກອງທັບເຮືອຈີນ ກໍ່ໄດ້ແຈ້ງເຕືອນ ໃຫ້ເຮືອຮົບຂອງສະຫະລັດ ອາເມຣິກາທັງ 2 ລຳອອກໄປຈາກຂົງເຂດດັ່ງກ່າວ, ໂດຍທ່ານ ເກິ້ງ ຊວງ ໂຄສົກກະຊວງການຕ່າງປະເທດຂອງຈີນກ່າວວ່າ: ການກະທຳດັ່ງກ່າວຂອງສະຫະລັດ ອາເມຣິກາ ເປັນການລະເມີດອະທິປະໄຕຂອງຈີນ, ເປັນການທຳລາຍຄວາມສະຫງົບ ແລະ ຄວາມປອດໄພທາງທະເລ ລັດຖະບານຈີນບໍ່ພໍໃຈເປັນຢ່າງຍິ່ງ ແລະ ຄັດຄ້ານການກະທຳດັ່ງກ່າວ ທີ່ແລ່ນເຮືອເຂົ້າມາໂດຍບໍ່ໄດ້ຮັບອະນຸຍາດ.

ການເຄື່ອນໄຫວດັ່ງກ່າວ ເກີດຂຶ້ນພາຍຫຼັງທີ່ທ່ານ ໂດໂນ ທຣຳ ປະກາດວ່າຈະເກັບພາສີສິນຄ້າຈາກຈີນເພີ່ມ ມູນຄ່າ 200,000 ລ້ານໂດລາສະຫະລັດໃນອາທິດນີ້, ເຊິ່ງການຂົ່ມຂູ່ດັ່ງກ່າວເກີດຂຶ້ນທ່າມກາງການເຈລະຈາລະຫວ່າງລັດຖະບານສະຫະລັດ ອາເມຣິກາ ກັບ ລັດຖະບານຈີນ ເພື່ອຢຸດຕິສົງຄາມການຄ້າທີ່ແກ່ຍາວມາຫຼາຍເດືອນ.

ທະເລຈີນໃຕ້ອຸດົມໄປດ້ວຍຊັບພະຍາກອນທາງທຳມະຊາດ ແລະ ເປັນພື້ນທີ່ຂັດແຍ່ງລະຫວ່າງຫຼາຍປະເທດ ໃນນັ້ນມີຈີນ, ຫວຽດນາມ, ຟິລິບປິນ, ອິນໂດເນເຊຍ, ມາເລເຊຍ ແລະ ບຣູໄນ. ສ່ວນສະຫະລັດ ອາເມຣິກາ ແມ່ນໄດ້ສົ່ງເຮືອຮົບເຂົ້າມາປະຕິບັດການລາດຕະເວັນໃນພື້ນທີ່ຄວາມຂັດແຍ່ງດັ່ງກ່າວເປັນປະຈຳ ເພື່ອຄານອຳນາດຈີນ.

ນອກຈາກການເດີນເຮືອຮົບເຂົ້າມາໃນທະເລຈີນໃຕ້ແລ້ວ, ເມື່ອວັນອາທິດທີ່ຜ່ານມາ ທຳນຽບຂາວຖະແຫຼງວ່າໄດ້ສົ່ງເຮືອບັນທຸກຍົນຮົບ USS Abraham Lincoln Carrier Strike Group ແລະ ຝູງຍົນຖິ້ມລະເບີດ ໄດ້ຍັງກອງບັນຊາການກາງສະຫະລັດ ອາເມຣິກາ ປະຈຳພູມມິພາກຕາເວັນອອກກາງ ເພື່ອສົ່ງສັນຍານເຕືອນວ່າ ຫາກຜົນປະໂຫຍດໃດໆຂອງສະຫະລັດ ອາເມຣິກາ ຫຼື ປະເທດພັນທະມິດຖືກໂຈມຕີ ອີຣານຕ້ອງປະເຊີນກັບການຕອບໂຕ້ຢ່າງໜັກໜ່ວງ.

- Advertisement -