ສ.ອາເມຣິກາ ສົ່ງຍົນຖິ້ມລະເບີດ B-52 ໄປຕາເວັນອອກກາງ ເພື່ອເຕືອນອີຣານ

ສຳນັກຂ່າວຕ່າງປະເທດລາຍງານເມື່ອວັນທີ 7 ພຶດສະພາ 2019 ທີ່ຜ່ານມາວ່າ: ສູນບັນຊາການກາງກອງທັບສະຫະລັດ ອາເມຣິກາ ອອກຖະແຫຼງການເມື່ອວັນຈັນ ເລື່ອງການສົ່ງຍົນຖິ້ມລະເບີດທາງຍຸດທະສາດ B-52 ຈຳນວນໜຶ່ງເດີນທາງໄປເສີມທັບກັບກອງເຮືອພິເສດ ນຳໂດຍເຮືອບັນທຸກຍົນຮົບພະລັງງານນິວເຄຼຍ USS Abraham Lincoln ທີ່ເດີນທາງອອກຈາກສະຫະລັດ ອາເມຣິກາ ເມື່ອຕົ້ນເດືອນທີ່ຜ່ານມາ ແລະ ລາຍງານຫຼ້າສຸດລະບຸວ່າກອງເຮືອດັ່ງກ່າວຢູ່ບໍລິເວນຊ່ອງແຄບຢິບບຼໍຕາ ແລະ ເປົ້າໝາຍຂອງກອງເຮືອຄືການປະຈຳການຢູ່ບໍລິເວນນ່ານນ້ຳສາກົນຂອງຊ່ອງແຄບຮໍມຸສ ເພື່ອຮັບມືກັບໄພຄຸກຄາມທີ່ຈະເກີດຂຶ້ນໂດຍກອງກຳລັງປະຕິວັດອີຣານ.

ເຖິງແມ່ນວ່າສູນບັນຊາການກາງກອງທັບສະຫະລັດ ອາເມຣິກາ ຈະບໍ່ໄດ້ລະບຸຈຳນວນຂອງຍົນຖິ້ມລະເບີດ B-52 ທີ່ສົ່ງໄປວ່າມີທັງໝົດຈັກລຳ ແຕ່ແຫຼ່ງຂ່າວດ້ານຄວາມໝັ້ນຄົງຂອງສະຫະລັດ ອາເມຣິກາລະບຸວ່າ ມີຢ່າງໜ້ອຍ 4 ລຳ ແລະ ອາດເພີ່ມຂຶ້ນຫຼາຍກວ່ານັ້ນ ຂຶ້ນຢູ່ກັບສະຖານະການຄວາມເຄັ່ງຕຶງ ພ້ອມທັງຢືນຢັນວ່າເຮືອບັນທຸກຍົນຮົບ USS Abraham Lincoln ມີກຳນົດເດີນທາງໄປປະຕິບັດພາລະກິດຢູ່ຕາເວັນອອກກາງຢູ່ແລ້ວ ແຕ່ໄດ້ຮັບຄຳສັ່ງໃຫ້ເພີ່ມຄວາມໄວໃນການເດີນທາງ ເນື່ອງຈາກຂໍ້ມູນຂ່າວກອງກ່ຽວກັບການເຄື່ອນໄຫວຂອງອີຣານໃນພູມມິພາກ, ດ້ານກະຊວງການຕ່າງປະເທດອີຣານອອກຖະແຫຼງການວ່າ ສະຫະລັດ ອາເມຣິກາ ຕ້ອງການສ້າງສົງຄາມຈິດຕະສາດ.

ເຊິ່ງການເຄື່ອນໄຫວທາງທະຫານດັ່ງກ່າວຂອງສະຫະລັດ ອາເມຣິກາ ເກີດຂຶ້ນໃນເວລາດຽວກັນທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ເດີນທາງຢ້ຽມຢາມອິຣັກເປັນການດ່ວນ ເພື່ອສະແດງເຖິງການສະໜັບສະໜູນທີ່ສະຫະລັດ ອາເມຣິກາມີຕໍ່ລັດຖະບານອິຣັກ ໃນຂະນະທີ່ສາຍພົວພັນລະຫວ່າງອິຣັກ ກັບ ອີຣານກຳລັງຈະດີຂຶ້ນ.

HTML tutorial