ຜົນການເລືອກຕັ້ງໄທຢ່າງເປັນທາງການ ພັກເພື່ອໄທ ມີຈຳນວນ ສ.ສ ຫຼາຍທີ່ສຸດ

ສຳນັກຂ່າວຕ່າງປະເທດລາຍງານ 8 ພຶດສະພາ 2019 ວ່າ: ທ່ານ ສະແຫວງ ບຸນມີ ຮອງເລຂາທິການກຳມະການການເລືອກຕັ້ງແຫ່ງຊາດໄທ ໄດ້ຮັບຮອງການເລືອກຕັ້ງສະມາຊິກສະພາ (ສ.ສ) ແບບບັນຊີລາຍຊື່ ໂດຍຢືນຢັນວ່າເປັນໄປຕາມກົດໝາຍທຸກປະການ ໂດຍມີ ສ.ສ ບັນຊີລາຍຊື່ທັງໝົດ 149 ຄົນ.

ສຳລັບພັກການເມືອງທີ່ໄດ້ຮັບ ສ.ສ ແບບບັນຊີລາຍຊື່ມີທັງໝົດ 25 ພັກ ໂດຍພັກທີ່ໄດ້ ສ.ສ ແບບບັນຊີລາຍຊື່ສູງສຸດຄື: ພັກອະນາຄົດໃໝ່ ຈຳນວນ 50 ຄົນ, ຮອງລົງມາພັກປະຊາທິປັດ 19 ຄົນ ແລະ ພັກພະລັງປະຊາລັດ 18 ຄົນ.

ຂະນະທີ່ພັກເພື່ອໄທ ເປັນພັກການເມືອງດຽວໃນສະພາ ທີ່ໝົດສິດໄດ້ຮັບປັນສ່ວນ ສ.ສ ແບບບັນຊີລາຍຊື່ ເນື່ອງຈາກມີຈຳນວນ ສ.ສ ແບບແບ່ງເຂດເຂົ້າສະພາເກີນກວ່າຈຳນວນ “ສ.ສ ທີ່ຄວນມີ” ຕາມທີ່ກົດໝາຍກຳນົດແລ້ວ.

ໂດຍສູດການຄິດໄລ່ທີ່ກຳມະການການເລືອກຕັ້ງຂອງໄທໃຊ້ ແມ່ນຄິດໄລ່ຈາກຖານຄະແນນສຽງມະຫາຊົນຂອງ 74 ພັກການເມືອງລວມກັນ 35,441,920 ສຽງ ເມື່ອນຳມາຄິດໄລ່ຫາຈຳນວນ ສ.ສ ແບບບັນຊີລາຍຊື່ ພົບວ່າ ສ.ສ 1 ຄົນ ຕ້ອງໄດ້ຄະແນນ 71,168.5141 ສຽງ ໂດຍກຳມະການການເລືອກຕັ້ງ ໄດ້ເປີດທາງໃຫ້ພັກທີ່ໄດ້ຄະແນນຕ່ຳກວ່າຄ່າສະເລ່ຍໃນການມີ ສ.ສ ຄວນມີໄດ້ 1 ຄົນ ມີໂອກາດໄດ້ຮັບ ສ.ສ ແບບບັນຊີລາຍຊື່ 1 ຄົນ ເຮັດໃຫ້ພັກຂະໜາດນ້ອຍ ຫຼຸດເຂົ້າສະພາເຖິງ 11 ພັກ ທັງນີ້ພັກໄທຣັກທຳ ເປັນພັກອັນດັບສຸດທ້າຍທີ່ມີໂອກາດເຂົ້າສູ່ສະພາດ້ວຍຄະແນນມະຫາຊົນພຽງ 33,754 ສຽງ.

ການປະກາດຮັບຮອງຜົນການເລືອກຕັ້ງ ສ.ສ ແບບບັນຊີລາຍຊື່ ເກີດຂຶ້ນພາຍຫຼັງທີ່ສານລັດຖະທຳມະນູນຂອງໄທ ມີມະຕິເປັນເອກະສັນ ວ່າກົດໝາຍວ່າດ້ວຍການເລືອກຕັ້ງ ສ.ສ ມາດຕາ 128 ບໍ່ຂັດຕໍ່ລັດຖະທຳມະນູນ ມາດຕາ 91.

ສະຫຼຸບ 5 ອັບດັບພັກການເມືອງທີ່ໄດ້ ສ.ສ ທັງແບບແບ່ງເຂດ ແລະ ບັນຊີລາຍຊື່ລວມກັນຫຼາຍທີ່ສຸດໄດ້ແກ່:

1. ພັກເພື່ອໄທ 136 ຄົນ

2. ພັກພະລັງປະຊາລັດ 115 ຄົນ

3. ພັກອະນາຄົດໃໝ່ 80 ຄົນ

4. ພັກປະຊາທິປັດ 52 ຄົນ

5. ພັກພູມໃຈໄທ 51 ຄົນ

ເຖິງຢ່າງໃດກໍ່ຕາມ, ການລົງຄະແນນເລືອກເອົານາຍົກລັດຖະມົນຕີໃນສະພາ ບໍ່ໄດ້ໃຊ້ສະເພາະສຽງຈາກ ສ.ສ ທີ່ມາຈາກການເລືອກຕັ້ງ ແຕ່ຕ້ອງລວມກັບການລົງຄະແນນສຽງຂອງສະມາຊິກສະພາສູງ ຫຼື ທາງການໄທຮຽກວ່າ ສ.ວ ຈຳນວນ 250 ສຽງ ທີ່ມາຈາກການແຕ່ງຕັ້ງຂອງຄະນະຮັກສາຄວາມສະຫງົບແຫ່ງຊາດ ຫຼື ຄສຊ ເຊິ່ງເປັນຄະນະຢຶດອຳນາດການປົກຄອງ ໂດຍການກໍ່ລັດຖະປະຫານເມື່ອປີ 2014 ພາຍໃຕ້ການນຳຂອງທ່ານ ພົນເອກ ປຣະຍຸດ ຈັນໂອຊາ ເຊິ່ງປັດຈຸບັນໄດ້ຜັນຈາກຄະນະຢຶດອຳນາດມາສ້າງຕັ້ງພັກພະລັງປະຊາລັດ ແລະ ຄາດວ່າທ່ານ ພົນເອກະ ປຣະຍຸດ ຈັນໂອຊາ ຈະໄດ້ເປັນນາຍົກລັດຖະມົນຕີຂອງໄທ ໃນການເລືອກຕັ້ງຄັ້ງນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube